Məktəbli formaları ucuzlaşıb - Bakı Tikiş Evindən REPORTAJ VİDEO
Bakı, 12 sentyabr, Günel Türksoy, Mirrəsul Cəfərov, Nicat Haşımov, AZƏRTAC
Azərbaycanda yeni tədris ilinin başlanmasına sayılı günlər qalıb. Valideynlər övladlarını məktəbə yola salmaq üçün son hazırlıq işlərini görürlər. Onların indi üz tutduqları məkanlardan biri də Bakı Tikiş Evidir.
AZƏRTAC-ın əməkdaşları da şagirdlərin geyimlə təminatı sahəsində görülən işlərlə, eləcə də məktəbli formalarının keyfiyyəti, qiyməti və digər məsələlərlə maraqlanmaq üçün Tikiş Evində olublar.
Müşahidələr göstərib ki, dərslərin başlamasına çox az qalsa da, Tikiş Evinə gələnlərin sayı hələ də çoxdur. Valideynlər məktəbli övladlarına ölçülərinə uyğun geyimləri seçib alırlar. Qiymətlər isə ötən ilə nisbətən aşağı düşüb. Belə ki, həm oğlanlar, həm də qızlar üçün qısaqol polo köynəklər 8, uzunqol polo köynəklər 10, şalvar 15, jaket isə 20 manatadır. Qızlar üçün ətək 15 manatadır. Standart ölçüdən böyük geyimlər isə parça sərfiyyatına görə mövcud qiymətdən 5 manat bahadır. Ötən il isə müvafiq olaraq qısaqol və uzunqol polo köynəklər 12 manata satılıb. Şalvarlar 20, jaketlər isə 30 manata olub.
Bakı Tikiş Evi Açıq Səhmdar Cəmiyyətinin satış şöbəsinin müdiri Etibar Əzimov AZƏRTAC-a açıqlamasında satış prosesindən razı qaldığını bildirib. O deyib ki, yeni tədris ili üçün bu günədək 100 mindən çox məktəbli forması tikilib: “Qiymətlər ötən illərə nisbətən aşağı düşüb. Çünki bazarda çoxlu mənşəyi bilinməyən, süni materiallardan tikilmiş məktəbli formaları var. Belə formaları da ucuz satırlar. Ona görə qiymətləri minimum səviyyəyə endirdik ki, hər kəs üçün əlçatan olsun. Valideynlərə tövsiyə edirik ki, təsadüfi yerlərdən sertifikatı, zəmanəti olmayan məktəbli formaları almasınlar. Bizim məktəbli formalarının 1 il zəmanəti var. Bakı şəhərində 7 satış mərkəzimiz fəaliyyət göstərir. Onlar demək olar ki, şənbə-bazar günləri də daxil olmaqla, fasiləsiz işləyir. Mağazaların ünvanını Bakı Tikiş Evinin internet saytından və sosial şəbəkə hesabından əldə etmək olar. Hər yerdə eyni qiymətdir. Valideynlər bundan məmnundurlar, hər kəs gəlib, rahatlıqla ala bilir. Bəzi ölçülər olmadıqda, əlavə sifarişlər veririk. Ölçülər azalan kimi onun tikişini təşkil edirik. Daha böyük olan 56-60 santimetr ölçülü geyimlər də tikirik. Paytaxtda fəaliyyət göstərən dövlət məktəblərinin məktəbli formalarının hamısı bizdə var. Gimnaziya və liseylərin şagirdləri isə fərqli formalar geyindiyindən onların geyimləri bizdə olmur”.
Şöbə müdiri diqqətə çatdırıb ki, Nazirlər Kabinetinin qərarına əsasən, polo köynəklərin materialı 100 faiz pambıqdır və parçaları Özbəkistandan gətirilir. “Şalvar və ətəklərin materialı isə 60 faiz yun, 40 faiz polyesterdir. Həmin parçaları da Belarusdan və Türkiyədən sifariş edirik. Bütün parçaların sertifikatı var”, - deyə o vurğulayıb.
Müşahidələr onu da göstərib ki, Bakı Tikiş Evində alıcılara yüksək səviyyədə xidmət göstərilir.
Paytaxt sakini Zoya Hüseynova xidmətin yüksək olmasını deməklə yanaşı, bu il məktəbli formalarının ucuzlaşmasından da razılığını bildirib: “Geyimlərin keyfiyyəti digər yerlərdə satılan mallardan daha yaxşıdır. Uşağa ətək və şalvar almışam. Valideynlərə məsləhət görürəm ki, məktəbli formalarını gəlib, buradan alsınlar. Böyük övladım formanı iki il geyindi. Köynəklərdə ləkə belə qalmır”.
Bakı sakini Günel Hüseynova da hər il məktəbli geyimlərini Bakı Tikiş Evindən aldığını qeyd edib. O, burada müştərilərə göstərilən xidmətdən çox razı qaldığını diqqətə çatdırıb: “Geyimlərlə bağlı heç bir şikayətim yoxdur. Yuyulandan sonra da keyfiyyətini itirmir. Rəngi dəyişmir, solmur. Qiymətlər də cibimizə uyğundur. Sadəcə uşağın ölçüləri dəyişdiyi üçün mən yeni məktəbli forması aldım. Ölçülər dəyişməsəydi, əvvəlki formanı istifadə edərdik”.
Paytaxt sakini Faiq Qasımov uşaqlarının geyimlərini hər il Bakı Tikiş Evindən aldığını bildirib. “Qiymətlər münasibdir. Kiçik oğlum 10-cu sinifdə oxuyacaq. Ona böyük ölçü geyim lazımdır. Yəqin ki, gələn il də buradan alacağam”.
Məktəbli forması almaq üçün Bakı Tikiş Evinə gəlmiş 278 nömrəli məktəbin V sinif şagirdi Yusif Muxtarov AZƏRTAC-ın əməkdaşlarına yaxınlaşaraq buradakı geyimləri bəyəndiyini bildirib. Bu geyimlərin rahat və yaraşıqlı olduğunu deyib. Eyni zamanda, vurğulayıb ki, bütün məktəb ləvazimatları ilə təmin olunan şagirdlər dərslərini yaxşı oxumalı, nailiyyətlər əldə etməlidirlər.
Bölmənin digər xəbərləri
