Erməni terroru şahidlərin dili ilə FOTO VİDEO
Ermənistan silahlı qüvvələrinin Gəncəni növbəti dəfə raket atəşinə tutmasından beş il ötür
Gəncə, 11 oktyabr, Elcan Məmmədov, AZƏRTAC
Gəncənin Ələkbər bəy Rəfibəyli küçəsində 2020-ci il ilin 11 oktyabr gecəsi insanlar dəhşət və faciə ilə üz-üzə qaldılar. Mənfur düşmənin raket hücumu nəticəsində 10 nəfər həyatını itirdi, 40-dan artıq mülki şəxs yaralandı. Düşmən cəbhədə hər dəfə məğlubiyyətə uğradıqca, döyüş bölgəsindən uzaqda yaşayan günahsız azərbaycanlıları hədəfə götürürdü. Əsgərlərimizin cəbhədə əldə etdiyi zəfərlərlə qürurlandığımız anlarda, digər tərəfdən taleləri yarımçıq qalan insanların dərdi ürəkləri dağlayırdı.
AZƏRTAC-ın bölgə müxbiri 2020-ci il oktyabrın 11-də erməni silahlı birləşmələrinin Gəncə şəhərini gecə saatlarında raket atəşinə tutması nəticəsində dağıntılar altında qalan Fuad Hüseynov və Rüfət Allahverdiyevlə görüşüb. Həmin günü acı xatirələrini onların dilindən dinləyib.
“Həmin gecə indiyədək yadımdadır. Dəhşətli partlayış və gurultu səslərinə oyandım. Tozdan və dağıntılardan heç nə görmək olmurdu. İnsanların qışqırıqları, ağlamaq səsləri... Tez qonşularımıza köməyə qaçdım. Bayıra çıxdıqda anladım ki, biz, əslində, möcüzə nəticəsində sağ qalmışıq”, - deyən erməni terrorunun canlı şahidlərindən olan Fuad Hüseynov köməksiz insanların çarəsiz baxışlarını hələ də unuda bilmədiyini söyləyir. Bildirir ki, Gəncə terroru qurbanlarının xatirəsinə ucaldılan Memorial Kompleksə tez-tez gələrək həlak olanların xatirələrini ehtiramla yad edir.
Rüfət Allahverdiyev isə həmin gün ailəsi ilə birlikdə dağıntılar altında qalmışdı. O deyir: “Gecənin yarısı idi, atam, anam və qardaşımla evdə idik. Erməni silahlı qüvvələrinin raket hücumu nəticəsində evimiz yerlə-yeksan oldu. Fövqəladə Hallar Nazirliyi əməkdaşları bizi dağıntılar altından çıxardılar. Həyətdə isə mənzərə son dərəcə ağır idi – yaralanan insanlar, körpəsi qucağında göz yaşı tökən analar, həlak olmuş qonşularımız və bizə yardım etməyə çalışan insanların çaşqınlığı...”. Rüfət hələ də o günlərdən danışarkən dili titrəyir, acı xatirələri dilə gətirməyin onun üçün heç də asan olmadığını bildirir.
Xatırladaq ki, Gəncə terroru qurbanlarının xatirəsinin əbədiləşdirilməsi məqsədilə Gəncə Memorial Kompleksi inşa olunub. Prezident İlham Əliyev sentyabrın 27-də – Anım Günündə Memorial Kompleksin açılışında iştirak edib.
Ermənistan silahlı qüvvələri atəşkəs rejimini və beynəlxalq hüquq normalarını, o cümlədən silahlı münaqişələr zamanı mülki şəxslərin müdafiəsinə dair 12 avqust 1949-cu il tarixli Cenevrə Konvensiyasının tələblərini kobud şəkildə pozaraq, 2020-ci il oktyabr ayının 4-də, 5-də, 8-də, 11-də və 17-də cəbhədən uzaqda yerləşən Gəncə şəhərində yaşayış məntəqələrinə, hərbi hədəf olmayan mülki obyektlərə, həmçinin mülki əhaliyə “Smerç” və “Elbrus” tipli raketlərlə zərbələr endirib. Raket hücumları nəticəsində 26 mülki şəxs öldürülüb, 175 nəfər isə müxtəlif dərəcəli bədən xəsarətləri alıb. Şəhərdə mülki infrastruktur obyektlərinə, nəqliyyat vasitələrinə, yaşayış evlərinə və digər tikililərə külli miqdarda ziyan dəyib.
Bölmənin digər xəbərləri
