“Enerji, qida, ətraf mühit və iqlim təhlükəsizliyi sahəsində çağırışlar” mövzusunda beynəlxalq konfrans işə başlayıb YENİLƏNİB VİDEO
Bakı, 15 oktyabr, AZƏRTAC
Oktyabrın 15-də Bakıda “Enerji, qida, ətraf mühit və iqlim təhlükəsizliyi sahəsində çağırışlar” mövzusunda beynəlxalq konfrans işə başlayıb.
AZƏRTAC xəbər verir ki, tədbir Elm və Təhsil Nazirliyi, Elm və Təhsil üzrə Dövlət Agentliyi və Molekulyar Biologiya və Biotexnologiyalar İnstitutunun birgə təşkilatçılığı ilə keçirilir.
Açılış mərasimində AMEA-nın prezidenti akademik İsa Həbibbəyli konfransın mövzusunun ötən il Azərbaycanın yüksək səviyyədə ev sahibliyi etdiyi BMT-nin İqlim Dəyişmələri üzrə Çərçivə Konvensiyasının Tərəflər Konfransının (COP29) proqramının əsas müddəaları ilə səsləşdiyini qeyd edib. O bildirib ki, COP29 Azərbaycanda cəmiyyət həyatının müxtəlif sahələrinə, ictimai həyata, iqtisadiyyata təsir etdiyi kimi, elmi təfəkkürdə də yeniliklər yaradıb.
“Azərbaycanda COP29 tədbiri çərçivəsində və ondan sonrakı dövrdə yaşıl iqtisadi zona, yaşıl enerji, yaşıl energetika, yaşıl texnologiya, yaşıl transformasiya kimi anlayışlar artıq elmi istiqamətlər olmaqdan daha çox reallığın ifadəsinə çevrilib”, - deyən AMEA rəhbəri Naxçıvan, Qarabağ və Şərqi Zəngəzur bölgələrində dövlətimizin başçısı tərəfindən elan edilmiş yaşıl enerji zonalarının öz fəaliyyətini uğurla davam etdirdiyini söyləyib.
Akademik İsa Həbibbəyli 14 ölkədən 140-dan çox alimin qatıldığı beynəlxalq konfransın Azərbaycan təcrübəsinin daha dərindən öyrənilməsinə, səmərəli elmi əməkdaşlıq əlaqələrinin qurulmasına, ortaq layihələrin və yeni ideyaların meydana çıxmasına təkan verəcəyinə əminliyini bildirib.
Sonra Elm və Ali Təhsil üzrə Dövlət Agentliyinin direktor müavini, AMEA-nın müxbir üzvü, professor Əminağa Sadıqov çıxış edərək ətraf mühit və iqlim təhlükəsizliyinin dünyada aktual elmi və praktiki problemlərdən biri olduğunu söyləyib. O, bu problemlərin həllinin qlobal səviyyədə dərin və fənlərarası yanaşmaların tətbiqini tələb etdiyini vurğulayıb. Bildirib ki, bu məqsədlə dünyanın bir sıra inkişaf etmiş ölkələrində müxtəlif elmi platformalar formalaşdırılır, genişmiqyaslı layihələr icra olunur.
Agentliyin direktor müavini vurğulayıb ki, Elm və Təhsil Nazirliyi dövlət siyasətinin prioritetlərinə uyğun olaraq dayanıqlı inkişafın təmin edilməsi, bərpaolunan enerji mənbələrindən səmərəli istifadə, ekoloji problemlərin azaldılması və s. istiqamətlərdə kompleks tədbirlər planı həyata keçirir. Nazirlik bu məqsədlə elmi-tədqiqat layihələrini, beynəlxalq və respublika səviyyəli konfransları, həmçinin müxtəlif təşəbbüsləri dəstəkləyir. Eyni zamanda, təhsil sistemində dayanıqlı inkişaf prinsiplərinin tədrisə inteqrasiyası məqsədilə dərslik və tədris proqramlarında müvafiq dəyişikliklər edilir.
Daha sonra konfransın həmsədri, ABŞ-ın Auburn Universitetində çalışan azərbaycanlı alim professor Rəşad Kərimov çıxış edərək beynəlxalq tədbirin mövzusunun müxtəlif elm sahələrini əhatə etməsinin təsadüfi olmadığını bildirib. Müasir dövrümüzdə qeyd edilən problemlərin yalnız bir elmi istiqamətin vasitəsilə həll edilməsinin mümkünsüz olduğunu vurğulayan alim multidisiplinar tədqiqatların vacibliyinə diqqət çəkib.
Daha sonra konfransda ABŞ-ın Emory Universitetinin Emerson Elmi Hesablamalar Mərkəzinin direktoru professor Camal Musayev, Almaniyanın Osnabruk Tətbiqi Elmlər Universitetinin professoru Ali Naz, Koreyanın Soqanq Universitetinin professoru, Bitki Gen Tənzimlənməsi Laboratoriyasının müdiri Byeong-ha Lee, Türkiyənin Ege Universitetinin professoru Aziz Eftekhari və Özbəkistan Milli Elmlər Akademiyasının Mikrobiologiya İnstitutunun direktor müavini professor Şahlo Miralimova çıxış edərək aktual mövzularda müzakirələrin aparılması və səmərəli nəticələrin əldə olunması baxımından beynəlxalq konfransın elmi əhəmiyyətini vurğulayıb, təşkilatçılara təşəkkürlərini bildiriblər.
Sonda AMEA-nın vitse-prezidenti, Molekulyar Biologiya və Biotexnologiyalar İnstitutunun direktoru akademik İradə Hüseynova çıxış edərək bildirib ki, konfransın əsas məqsədi elmi tərəfdaşlıq üçün strateji planların hazırlanması, gələcək tədqiqat istiqamətlərinin müəyyənləşdirilməsi, yaşıl enerji və təmiz mühitə keçidə xidmət edən innovativ həllərin paylaşılması, həmçinin cəmiyyətin və iqtisadiyyatın dayanıqlılığını təmin edən yeni elmi ideyaların meydana çıxmasıdır.
AMEA-nın vitse-prezidenti konfransın proqramında mühüm məqamlardan birinin sonuncu gün akademik Cəlal Əliyevin xatirəsinə həsr olunan növbəti “Cəlal Əliyev qiraətləri”nin keçirilməsi olduğunu bildirib.
Akademik İradə Hüseynova Azərbaycanda son illər dövlətin dəstəyi ilə bioiqtisadiyyat, yaşıl texnologiyalar və biotexnoloji tədqiqatlar sahəsində əldə olunmuş elmi və praktiki nailiyyətlərdən də bəhs edərək bildirib ki, Qarabağ və Şərqi Zəngəzurda formalaşdırılan yaşıl enerji zonası beynəlxalq maraq doğurur. Hazırda ölkə üzrə aqrobiotexnologiya, torpaq və su ehtiyatlarının idarə olunması, eləcə də iqlim modelləşdirməsində süni intellektə əsaslanan yeni metodoloji yanaşmalar formalaşmaqdadır.
Daha sonra tədbir öz işini plenar sessiya ilə davam etdirib.
Beynəlxalq konfrans oktyabrın 17-də başa çatacaq.
Bölmənin digər xəbərləri
