Səyyah: Zəngəzur dəhlizi bizim üçün xüsusi maraq kəsb edir VİDEO

25.03.2026 [19:19]
Çap et
A⁺ A^-

Bakı, 25 mart, AZƏRTAC

Qarabağa böyük həcmdə investisiya yatırılır. Hər səfərdə yeni dəyişikliklər görmək maraqlıdır. Sabah tezdən Bakını tərk edəcəyik. İlk olaraq Ağdama gedəcəyik, orada müəyyən vaxt keçirib görülən işlərlə tanış olacağıq. Daha sonra Şuşaya, oradan isə Xankəndiyə yollanacağıq. Naharımız Xankəndidə olacaq və günün sonunda Laçına çatacağıq. Ertəsi gün Laçını gəzəcəyik. Məncə, Laçın Azərbaycanın coğrafi baxımdan ən gözəl yerlərindən biridir. Daha sonra Zəngəzur dəhlizinin başlanması nəzərdə tutulan nöqtəyə gedəcəyik və düşünürəm ki, ora gedən ilk xarici qrup biz olacağıq. Bu, bizim üçün çox maraqlı olacaq. Qayıdarkən isə Cəbrayılda, bəlkə də Füzulidə dayanacağıq. Qarşıdakı iki gün üçün marşrutumuz əsasən bundan ibarətdir.

AZƏRTAC xəbər verir ki, bunu jurnalistlərə açıqlamasında "NomadMania" klubunun təsisçisi və rəhbəri Hari Mitsidis deyib.

Əvvəllər yerləşmə imkanının məhdudluğu səbəbindən bəzi yerləri daha dərindən tanımaq imkanı əldə edə bilmədiklərini deyən britaniyalı səyyah artıq məsələnin tam həll olunduğunu bildirib. “İndiyədək biz həmişə iki gecə qalırdıq, amma Qarabağın özündə deyil, ətraf ərazilərdə. Uyğun yerləşmə imkanları yox idi, bəzən hərbi düşərgədə qalmalı olurduq. Bu dəfə səfər daha qısa olsa da, daha rahat keçə bilər, çünki hotellərdə qalacağıq. Marşrut baxımından bir çox yerləri görmüşük, amma Xankəndini yetərincə yaxından tanımamışıq. Ümid edirəm ki, bu dəfə oralara daha ətraflı baxmaq imkanı olacaq. Zəngəzur dəhlizi isə bizim üçün xüsusi maraq kəsb edir və şəxsən mənim ən çox diqqət yetirdiyim məkanlardan biridir", - deyə səyyah əlavə edib.

_{Fotoqraf - Səfiyar Məcnun}

_{Videooperator - İlham Nadirov}

Səyyah: Zəngəzur dəhlizi bizim üçün xüsusi maraq kəsb edir VİDEO

MÜƏLLİFLƏ ƏLAQƏ

Bölmənin digər xəbərləri