Heydər Əliyev təqaüdçüsü: Musiqi mənim üçün sadəcə peşə deyil, həyatımın ayrılmaz hissəsidir VİDEO
Bakı, 2 iyun, AZƏRTAC
“Heydər Əliyev adına təqaüd”ə layiq görülmək mənim üçün hər zaman böyük qürur hissi olmaqla yanaşı, həm də böyük məsuliyyətdir. Uzun müddət düşünürdüm ki, musiqi istiqaməti üzrə bu təqaüdü qazanan Üzeyir Hacıbəyli adına Bakı Musiqi Akademiyasının (BMA) tələbəsi Kənan Məmmədzadə və Azərbaycan Milli Konservatoriyasının (AMK) tələbəsi Hüseyn Nağıyevlə birgə eyni səhnədə bir araya gəlib, konsert proqramı ilə çıxış edək. Üçlükdə Ümummilli Liderin əziz xatirəsinə yaddaqalan bir layihə ortaya qoyaq. Layihənin yaranma ideyası və konsepti də belə formalaşdı və biz bunu bacardıq.
Layihənin mənim üçün ən dəyərli tərəflərindən biri onun təhsil aldığım sənət ocağı - Azərbaycan Dövlət Mədəniyyət və İncəsənət Universitetinin (ADMİU) təşkilatçılığı və dəstəyi ilə keçirilməsi idi. Bir tələbə və gənc musiqiçi olaraq yaradıcılıq ideyalarımın və təşəbbüslərimin təhsil aldığım universitet tərəfindən dəstəklənməsi, həyata keçirilməsi mənim üçün böyük motivasiyadır.
Bu layihəni ilk gündən dəstəkləyən, diqqətdə saxlayan və həyata keçirilməsində xüsusi rol oynayan Azərbaycan Dövlət Mədəniyyət və İncəsənət Universitetinin rektoru, professor, Əməkdar incəsənət xadimi Ceyran Mahmudovaya sonsuz minnətdarlığımı bildirirəm.
Bu sözləri AZƏRTAC-a müsahibəsində Azərbaycan Dövlət Mədəniyyət və İncəsənət Universitetinin birinci kurs magistrantı, fortepiano ifaçısı, Heydər Əliyev təqaüdçüsü, respublika və beynəlxalq müsabiqələr laureatı, “Heydər Əliyev adına təqaüdçülərin ilk birgə konserti” layihəsinin müəllifi Həmayə Baxışova deyib.
O qeyd edib ki, layihə həm də gənc musiqiçilər arasında yaradıcı əməkdaşlığının və sənət birliyinin gözəl nümunəsinə çevrilib.
“Layihənin əsas məqsədi Ümummilli Liderin Azərbaycan musiqi mədəniyyətinin inkişafındakı misilsiz xidmətlərini bir daha təqaüdçülərin ifasında ehtiramla anmaq və Azərbaycan musiqisinə bağlılığımızı nümayiş etdirmək idi. Konsert proqramında Ümummilli Lider Heydər Əliyevin sevdiyi musiqi nümunələrinə, eləcə də Azərbaycan bəstəkarlıq məktəbinin görkəmli nümayəndələri — Üzeyir Hacıbəyli, Qara Qarayev, Fikrət Əmirov, Arif Məlikov və Cövdət Hacıyev kimi sənətkarların əsərlərinə geniş yer verilmişdi. Konsertdə həm solist, həmdə konsertmeyster kimi çıxış edirdim. Trio nömrələr sırasında Niyazinin “Rast” simfonik muğamından fraqmentlər, eləcədə M.Maqomayevin “Azərbaycan” mahnısı yer alırdı. Layihənin xüsusi cəhətlərindən biri də fortepiano, skripka və kamançanın eyni səhnədə yaratdığı musiqi vəhdəti idi”,-deyə H.Baxışova əlavə edib.
Musiqinin onun üçün sadəcə peşə və ya sənət növü deyil, həyatının ayrılmaz hissəsi olduğunu vurğulayan həmsöhbətim deyib: “Bu günə qədər keçdiyim təhsil yolu, əldə etdiyim təcrübələr və gələcəklə bağlı bütün məqsədlərim məhz musiqi ilə bağlıdır. Musiqi mənə özümü ifadə etmək, daim öyrənmək və inkişaf etmək imkanı yaradır.
Musiqi sonsuz bir inkişaf yoludur. Bu özümü bu yolun başlanğıcında hesab edirəm. Qarşıda öyrəniləcək, araşdırılacaq və üzərində çalışılacaq çox şey var. Məhz bu düşüncə məni daim üzərimdə işləməyə və daha böyük hədəflərə doğru irəliləməyə sövq edir. Bakalavr təhsilimi də ADMİU-nun sənətşünaslıq üzrə fəlsəfə doktoru, beynəlxalq müsabiqələr laureatı, dosent Səbinə Mehdiyevanın sinfində almışam və fərqlənmə diplomu ilə bitirmişəm. Hazırda da təhsilimi elə onun sinfində davam etdirirəm. Mənə ifaçılıq sirlərini öyrədən ,daim dəstək olan dəyərli ixtisas müəllimim Səbinə Mehdiyevaya və bütün müəllimlərimə dərin minnətdarlığımı bildirirəm. Təhsil aldığım illər ərzində bir çox respublika və beynəlxalq müsabiqələrdə çıxış etmiş və laureatı olmuşam. Bu uğurların əldə olunmasında təhsil aldığım universitetin, müəllimlərimin böyük rolu olub. Mənə bu yolda dəstək olan bütün müəllimlərimə, universitetin rəhbərliyinə dərin minnətdarlığımı bildirirəm.
Bölmənin digər xəbərləri
