Yan Ola Sand: Bakıda hər kəs gözəl, möhtəşəm və inanılmaz şounun şahidi oldu VİDEO
Kopenhagen, 6 may (AZƏRTAC). Bakıda hər kəs gözəl, möhtəşəm və inanılmaz şounun şahidi oldu. Düsseldorfda keçirilmiş "Eurovision-2011" mahnı müsabiqəsində qələbədən sonra dünyanın diqqəti ölkənizə yönəldi. Azərbaycan bu müsabiqəyə yüksək səviyyədə ev sahibliyi etdi. Mən Azərbaycana bu müsabiqəyə yüksək səviyyədə ev sahibliyi etdiyi üçün minnətdarlığımı bildirirəm.
Bu fikirləri “Eurovision” mahnı müsabiqəsinin icraedici rəhbəri Yan Ola Sand AZƏRTAC-ın müxbirinə müsahibəsində söyləmişdir.
Yan Ola Sand müsabiqəyə olan marağın gələcəkdə də itməməsi üçün çalışacağını bildirmişdir.
- Cənab Sand, artıq yarımfinal ərəfəsindəyik. Siz Danimarkanın müsabiqəyə ev sahibliyinin səviyyəsindən razısınızmı?
- Bu il, bildiyiniz kimi, Danimarkanın müsabiqədə rəsmi yayım hüququnu “DR” telekanalı həyata keçirir. Görüntü olaraq bu il Danimarka tamaşaçılara maraqlı şou təqdim edəcəkdir. Artıq birinci yarımfinalda iştirak edən 16 ölkə təmsilçisi əsas məşqlərini başa vurmaqdadır. Danimarka bu yarışmada böyük təcrübəyə malik olan ölkələrdən biridir. Şübhəsiz, Bakı şousu səviyyəsinə və əhatə dairəsinə görə daha böyük idi. İnsanlarınız çox qonaqpərvərdirlər. Düşünürəm ki, azərbaycanlılar bütün dünyaya unudulmaz şou təqdim etdilər. Hələ də bütün Avropa ölkənizdə keçirilmiş müsabiqənin möhtəşəmliyindən danışır. Bu, həm də Azərbaycanın dünyada gündən-günə artan nüfuzuna bariz nümunədir.
- Sizin "Eurovision" mahnı müsabiqəsi sahəsində kifayət qədər təcrübəniz vardır. Müsabiqədə iştirak edən bəzi ölkələr yarışmada iştiraklarını dayandırırlar. Siz bunun səbəbini nədə görürsünüz?
- Zənnimcə, Avropada hökm sürən iqtisadi böhran müsabiqədə iştirak edən ölkələrin sayına təsir edən əsas səbəblərdəndir. Böhran Avropa Yayımları Birliyinin üzvü olan ölkələrin sayının azalmasına da səbəb olur. Lakin mən bu məsələyə nikbin yanaşıram. Düşünürəm ki, növbəti illərdə iştirakçı ölkələrin sayı yenidən artmağa başlayacaqdır. “Eurovision” mahnı müsabiqəsi hələ də Avropanın ən populyar şousu hesab olunur.
- Bu il müsabiqə gəmiqayırma zavodunda keçirilir. Danimarka müsabiqəyə ev sahibliyi etmək üçün daha münasib yer tapa bilərdimi?
- Danimarkada bu mötəbər yarışmanın keçirilməsi üçün əfsuslar olsun ki, başqa yer yoxdur. Bu il gəmiqayırma zavodunda keçirilən müsabiqə adada yerləşir. Hesab edirəm ki, bura gələn jurnalistlər və xarici qonaqlar adada gözəl mənzərənin şahidi olacaqlar. Bu bina Danimarkanın yayım hüququ olan “DR” telekanalının binasına yaxındır.
- Müsabiqəni işıqlandıracaq ölkələrin sayı barədə nə deyə bilərsiniz?
- Böhrana baxmayaraq 37 ölkə müsabiqəni canlı yayımlayacaqdır. “Eurovision” mahnı müsabiqəsində iştirak etməyən Avstraliyanın, Çinin, Qazaxıstanın, Kanadanın, Kiprin, Serbiyanın, Xorvatiyanın da bu mötəbər yarışmanı yayımlamaq üçün rəsmi yayım hüquqları vardır.
- Azərbaycanı bu il müsabiqədə təmsil edən Dilarə Kazımova ilə bağlı fikirlərinizi bilmək maraqlı olardı. Təmsilçimizin şansını necə qiymətləndirirsiniz?
- Mənim qənaətimə görə, Azərbaycan hər il müsabiqəyə böyük diqqət ayırır və güclü performanslarla bu mötəbər yarışmaya qatılır. Dilarə Kazımova həqiqətən güclü ifaçıdır. Hesab edirəm ki, Bakıda keçirilən “Eurovision- 2012” mahnı müsabiqəsi yarışmanın tarixində ən möhtəşəm şou olmuşdur. İstər təşkilatçılıq, istər jurnalistlər üçün yaradılan şərait, istər nəqliyyat, istərsə də müsabiqənin keçirilməsi üçün tikilən “Baku Crystal Hall” həqiqətən hamını heyran etmişdi. Azərbaycan fantastik təqdimat həyata keçirdi. Avropanın digər ölkələrinin bu sahədə ölkənizdən öyrənəcəkləri çox şeylər vardır. İnanmıram ki, digər ölkələr yarışmaya Azərbaycan kimi yüksək səviyyəli ev sahibliyi edə bilsin. Bakının artıq bu müsabiqədə böyük təcrübəsi vardır. “Baku Crystal Hall” - müasir standartlara cavab verən bu məkan, həmçinin çox gözəl memarlıq üslubuna da malikdir.
Anar Rzayev
AZƏRTAC-ın müxbiri
Kopenhagen
Bölmənin digər xəbərləri
