Sietse Bekker: Azərbaycanda keçirilmiş “Eurovision” mahnı müsabiqəsinin misilsiz şousu yaddaşlardan heç vaxt silinməyəcəkdir VİDEO
Kopenhagen, 7 may (AZƏRTAC). Azərbaycanda keçirilmiş “Eurovision” mahnı müsabiqəsinin misilsiz şousu yaddaşlardan heç vaxt silinməyəcəkdir.
Bu fikirləri “Eurovision” mahnı müsabiqəsinin təşkilati məsələlər üzrə rəhbəri Sietse Bekker AZƏRTAC-a müsahibəsində söyləmişdir.
Sietse Bekker demişdir:
- “Eurovision” yarışması həmişə parıldayan brilyant olmuşdur. Biz bu parıltının heç vaxt itirilməməsi üçün əlimizdən gələni edəcəyik.
- Deyə bilərsinizmi, Azərbaycanın bu möhtəşəm tədbirə hazırlığı özündən əvvəlkilərdən hansı keyfiyyətləri ilə seçilirdi?
- “Eurovision” mahnı müsabiqəsi hər il müəyyən yenilik və dəyişikliklərlə müşayiət olunur. Yüksək səviyyəli peşəkarların çalışması nəticəsində 2012-ci ilin may ayında bütün Avropa Azərbaycanın timsalında inanılmaz şounu izlədi. Mərkəzi Avropadan uzaqda olan Azərbaycanda zəngin Şərq və Qərb mədəniyyətlərinin ahəngdarlığı diqqəti cəlb edən məqamlardan oldu. Biz Azərbaycan xalqının qonaqpərvərliyindən çox razı qaldıq.
- Danimarkanın builki ev sahibliyini necə qiymətləndirirsiniz?
- Bu il müsabiqə məxsusi bir məkanda - gəmiqayırma zavodunda keçirilir. İlk baxışdan insana qeyri-adi təsir bağışlayır. Lakin Danimarkanın “DR” telekanalı Kopenhagen şəhərinin meriyası ilə əməkdaşlığı nəticəsində maraqlı şou təqdim edə bilmişdir.
- Əgər biz builki müsabiqəni Bakıda keçirilmiş “Eurovision-2012” yarışması ilə müqayisə etsək, bir çox çatışmazlıqların şahidi olarıq. Sizin bu barədə fikirlərinizi bilmək maraqlı olardı.
- Təbii ki, Bakıda keçirilən “Eurovision-2012” mahnı müsabiqəsi daha maraqlı idi. Müsabiqə üçün tikilən “Baku Crystal Hall” böyüklüyünə görə hamını heyran edirdi. “Baku Crystal Hall”un binasının 3 aydan az müddətdə tikilib başa çatdırılması həqiqətən inanılmaz oldu. Bakıda televiziya şousu fantastik idi və özündən əvvəlkilərlə müqayisədə müsabiqə ab-havası möhtəşəmliyi ilə seçilirdi.
Avropada müsabiqənin yayımını həyata keçirən telekanalların maliyyə problemləri vardır və bu kanallar proqramları yayımlamaq üçün seçim qarşısında qalırlar. “Eurovision” mahnı müsabiqəsi bu sahədə bir az uduzur. Lakin Portuqaliya, Polşa kimi ölkələr yarışmaya yenidən geri dönürlər. Əminəm ki, növbəti illərdə iştirakçı ölkələrin sayında artım müşahidə olunacaqdır. Müsabiqənin uzun ömürlü olacağına inanıram.
- Bu il müsabiqədə bir çox ölkələr balladalar, romantik mahnılar ilə təmsil olunurlar. Sizə elə gəlmirmi ki, bu, ekran qarşısında əyləşən və səs verən tamaşaçılar üçün darıxdırıcı olar bilər?
- Bu il bəzi iştirakçı ölkələr müsabiqəyə romantik balladalarla qatılmışlar. Bu, əslində prodüserlərə daha maraqlı, yaddaqalan şou təqdim etmək üçün imkan və şərait yaradır. Builki müsabiqəni əvvəlkilərlə müqayisə etsək, yarışmada güclü mahnıların təmsil olunduğunu görərik. İstər Şərqi, istərsə də Qərbi Avropa ölkələri müsabiqədə qalib olmaqda maraqlıdırlar. Bildiyiniz kimi, qalib ölkə müsabiqəyə ev sahibliyi etmək imkanı qazanır və bununla da hər bir ölkə öz mədəniyyətini, adət-ənənəsini təbliğ edə bilir.
- Müsabiqənin qaydalarında müəyyən dəyişikliklərin edilməsi nəzərdə tutulurmu?
- Bu il müsabiqənin səsvermə prosesində daha şəffaf qaydaları tətbiq etməyi düşündük. Müsabiqədə hər bir ölkədən olan münsiflər heyətinin adını mayın 1-dən açıqladıq. Bununla da təmsilçilərlə yanaşı, tamaşaçılar da hər bir münsiflər heyətinin nə dərəcədə professional olmasının şahid ola bilərlər. Müsabiqədən sonra hər bir münsiflər heyətinin səs verdiyi iştirakçıların adını açıqlayacağıq. Tamaşaçılar müsabiqənin şəffaflığının şahidi ola biləcəklər.
- “Baku Crystal Hall” 25 min nəfərlik tamaşaçı auditoriyasına malik idi. Lakin indiki müsabiqədə bu rəqəm aşağıdır. Yarışma dünyanın 45-dək ölkəsində yayımlanır. Necə hesab edirsiniz, bu rəqəm az deyilmi?
- Azərbaycanda keçirilmiş şouya dünyanın böyük təcrübəsi olan məşhur şirkətləri cəlb olunmuşdur. Nəzərə alın ki, 10 il bundan əvvəl müsabiqənin tamaşaçı auditoriyası 3 min nəfər idi. Bu baxımdan builki rəqəm heç də az deyil.
- Sizcə, Bakı səhnəsi müsabiqə iştirakçılarına və tamaşaçılara necə təsir bağışladı?
- Bakı səhnəsi həddindən artıq gözəlliyi ilə yadda qalmışdır. “Eurovision” mahnı müsabiqələrinin səhnələri ilə müqayisədə ölkənizin arenasında qurulmuş yeni texniki avadanlıqlar diqqəti cəlb edən əsas məqamlardan idi.
- 2012-ci ildə şounun baş tutduğu “Baku Crystal Hall” “Eurovision” mahnı müsabiqəsinin keçirildiyi əvvəlki məkanlardan nə ilə fərqlənirdi?
- Ən əvvəl onu demək istəyirəm ki, “Baku Crystal Hall” özlüyündə tamamilə bir yenilik idi. Bu, insanlarda unudulmaz təəssürat yaratdı. Ümumiyyətlə, “Baku Crystal Hall”un şoudan sonra da Azərbaycan paytaxtı üçün möhtəşəm konsertlərin, tədbirlərin, sərgilərin keçirilməsi üçün çox gözəl bir yer olması bu məkanın möhtəşəmliyindən xəbər verir.
Anar Rzayev
AZƏRTAC-ın müxbiri
Kopenhagen
Bölmənin digər xəbərləri
