Əmman, 5 iyun (AZƏRTAC). Dünya Xəbər Agentliklərinin V Konqresinin Bakıda keçirilməsi barədə qəbul olunmuş qərar şübhəsiz ki, Azərbaycanın beynəlxalq aləmdə yüksək nüfuzuna və üzv agentliklərin sizin ölkənizlə daha yaxından tanış olmaq istəyinə dəlalət edir.

İordaniya Haşimilər Krallığının Petra dövlət informasiya agentliyinin baş direktoru Feysəl əl-Şbul bu sözləri AZƏRTAC-ın xüsusi müxbirinə müsahibəsində söyləmişdir.

Feysəl əl-Şbul demişdir ki, Ər-Riyadda keçirilən Konqresdə AZƏRTAC-ın baş direktoru Aslan Aslanovun növbəti Konqresin Azərbaycanda keçirilməsi barədə təklifi bütün iştirakçıların diqqətini cəlb etdi və onun təklifi səsə qoyuldu, hərçənd başqa təkliflər də var idi, ancaq hamı böyük əksəriyyət AZƏRTAC-ın rəhbərinin təklifini dəstəklədi.

Bu, onu göstərir ki, təkcə ərəb dünyasında deyil, Qərbdə də çoxları sizin ölkənizlə daha yaxından tanış olmağa çalışır. Konqresin Bakıda keçirilməsi həm də ona görə vacibdir ki, dünya dövlətləri Azərbaycan ilə əməkdaşlığın perspektivlərinin müəyyən edilməsi, onun potensialı, son 20 ildə inkişafı, habelə ölkənin problemləri ilə tanış ola bilsin, - deyə Petra-nın baş direktoru vurğulamışdır.

Feysəl əl-Şbul AZƏRTAC ilə Petra arasında münasibətlərin inkişafı perspektivlərindən söhbət açaraq qeyd etmişdir ki, iki agentlik arasında əməkdaşlıq haqqında saziş 2007-ci ildə imzalanmışdır. Petra agentliyinin baş direktoru qeyd etmişdir: “Lakin məlum olduğu kimi, həmin sazişdə əməkdaşlığın bəzi çərçivələri müəyyən edilmişdir. Razılaşmaların tam həcmdə həyata keçirilməsi və əməkdaşlığımıza yeni təkan verilməsi üçün mövcud potensialdan tam istifadə etmək lazımdır. Bizim razılaşmaların tam həcmdə həyata keçirilməsi ölkələrimizin bir-birini daha yaxşı tanımasına imkan verəcəkdir. Fürsətdən istifadə edərək həmkarım Aslan Aslanovu İordaniyaya səfərə dəvət edirəm”.

Petra agentliyinin rəhbəri Azərbaycanda hər il Bakı Beynəlxalq Humanitar Forumunun keçirilməsini də yüksək qiymətləndirərək qeyd etmişdir ki, bu beynəlxalq tədbirdə məmnuniyyətlə iştirak edərdi, çünki bu, fikir mübadiləsi üçün yaxşı imkandır.

Feysəl əl-Şbul demişdir: “Azərbaycan ilə əməkdaşlıq bizim üçün çox böyük əhəmiyyət kəsb edir, dövlətlərimiz və rəhbərlərimiz arasında dostluq və qarşılıqlı hörmət münasibətləri mövcuddur. Xalqlarımız arasında daha sıx əlaqə yaradılması da vacibdir, bunun üçün isə daha çox informasiya, daha çox qarşılıqlı səfərlər olmalıdır. Ölkələrimiz arasında birbaşa aviasiya marşrutunun olmaması buna mane olan amillərdən biridir. Belə bir reysin açılması ölkələrimiz arasında əlaqələrin intensivliyinə kömək edərdi. Əvvəllər ola bilsin ki, daha bir maneə vardı - dil maneəsi. Lakin bu gün internetin, peyklərin geniş yayıldığı şəraitdə dil ciddi maneə deyildir, çünki bu gün İordaniyanın Petra agentliyində Azərbaycan haqqında informasiyanı ərəb və ingilis dillərində yaymaq mümkündür. AZƏRTAC da İordaniya haqqında məlumatı müxtəlif dillərdə yaya bilər. Ən başlıcası əməkdaşlıq üçün qəti iradənin olmasıdır ki, bu da vardır”.

Petra agentliyinin baş direktoru xüsusi vurğulamışdır ki, agentliklərin rəhbərləri arasında şəxsi münasibətlər çox böyük əhəmiyyət kəsb edir və əməkdaşlığın inkişafına müsbət təsir göstərir. Buna görə də biz peşəkar əlaqələri möhkəmlətməkdə maraqlıyıq.

Feysəl əl-Şbul keçən ilin noyabrında Ər-Riyadda dünyanın 70-dən çox nüfuzlu agentliyinin, informasiya alyanslarının media-strukturların rəhbərlərini, o cümlədən AZƏRTAC-ın və Petra agentliklərinin rəhbərlərinin də iştirak etdikləri Dünya Xəbər Agentliklərinin IV Konqresinin yekunlarını şərh edərək bildirmişdir ki, bu forum çox mühüm tədbir və bir sıra aktual məsələlərə dair fikir mübadiləsi üçün yaxşı bir şans idi. Orada dünyanın bütün aparıcı agentliklərinin, KİV-lərin , peyk kanallarının, qəzetlərin və informasiya yayımı ilə bağlı digər strukturların rəhbərləri iştirak edirdilər. Konqres bilavasitə yalnız xəbər agentliklərinə aid olduğuna baxmayaraq, orada müasir dövrün qlobal çağırışları da müzakirə olunmuşdur. Zənnimcə, rəqabət qabiliyyəti və rəqabət şəraitində peşəkarlıq məsələsi mühüm mövzulardan biri idi. Əminəm ki, bunlar müasir medianın ən aktual mövzularıdır, çünki yeni texnologiyalar və müasir kommunikasiya vasitələri dünyanı təkcə KİV nümayəndələri üçün deyil, hər bir insan üçün açıq etmişdir. Bu gün müasir kommunikasiya vasitələri, mobil rabitə hər bir insanın istənilən informasiyanı əldə etməsinə və dərhal yaymasına imkan verir. Daimi və fasiləsiz informasiya axını baş verir, canlı səs, təsvir, video real zaman rejimində dünyanın bütün guşələrinə çatdırılır. Lakin hər şey peşəkarlıqla və jurnalist etikası anlayışı ilə, bu xəbərləri, təsvirləri yaymağın düzgün olub-olmaması barədə biliklərlə bağlıdır. Bu gün həmin məsələlər çox aktualdır və onları başa düşmək gələcək üçün çox vacibdir.

Ər-Riyad Konqresinin mühüm nəticələrindən biri də bu olmuşdur ki, müasir media qarşısında, xüsusən dünya xəbər agentlikləri qarşısında yaranan əsas çağırışlar müəyyən edilmişdir. Feysəl əl-Şbul demişdir: “Mənim fikrimcə, Səudiyyə Konqresi həm də ona görə çox faydalı olmuşdur ki, o, KİV rəhbərlərinin bir-birini daha yaxşı tanımasına, müasir jurnalistika qarşısında duran yeni çağırışlar haqqında öz təsəvvürlərini bölüşməsinə imkan vermişdir”.

“Bu gün dövlət KİV-lərinin rolu nədən ibarətdir və gələcəkdə onların rolu artacaqdırmı” sualının cavabında Feysəl əl-Şbul qeyd etmişdir ki, hazırda müasir kommunikasiya vasitələri KİV-lərlə sıx qaynayıb qarışmışdır. Bu səbəbdən və informasiya axınının çox böyük olması ilə əlaqədar ilk dəfə olaraq rəsmi KİV-lərin aktuallığı məsələsi yaranmışdır. Onlar etibarlı, yoxlanılmış informasiyanın ən başlıca mənbələri olmalıdır. Petra agentliyinin baş direktoru demişdir: “Məsələn, Petra agentliyinin fəaliyyətinin 1-2 günlüyə dayandırılacağı halda yerli KİV-lərin etibarlı informasiyanı haradan alacağını təsəvvür etmək çətindir, çünki bu agentlik indiyə qədər İordaniyada əsas informasiya təchizatçısı olaraq qalır. Beləliklə, müasir şəraitdə cəmiyyət üçün dəqiq informasiyanın əsas mənbəyi kimi başlıca funksiyasını qoruyub saxlamaqla müasir şəraitdə öz aparıcı rolunu təmin etmək üçün bütün cəmiyyətin artan tələbatına müvafiq olaraq təqdim edilən xidmətlərin çeşidinin genişləndirilməsi zəruridir. Əvvəllər informasiya agentlikləri yalnız xəbərləri təqdim edirdisə, indi bu məhsullara analitik materiallar, jurnalist təhqiqatları, aktual şərhlər də əlavə olunmuşdur. Agentliklər vətəndaş cəmiyyətinə, siyasi partiyalara aid bütün prosesləri addım- addım izləyir, onlarla sıx əlaqəli şəkildə işləyirlər. Hər şeydən əlavə, agentlik sosial şəbəkələrdə iştirak etməli və onların bir hissəsinə çevrilməli, video və fotomateriallar təqdim etməlidir. Bu funksiyalar əvvəllər xəbər agentliklərinin vəzifələrinə daxil deyildi. Ərəb dünyasında ilk dəfə biz Petra agentliyində infoqrafika, multimedia kimi vasitələri tətbiq etmişik və bu, bizim mövqeyimizi möhkəmlədir, mühüm rolumuzu qoruyub saxlayır”.

Asya Hacızadə

AZƏRTAC-ın xüsusi müxbiri

Əmman