Bakı, 15 yanvar, AZƏRTAC

Bir neçə gün əvvəl Prezident İlham Əliyevin yerli televiziya kanallarına müsahibəsi zamanı səsləndirdiyi fikirlər Azərbaycanın daxili və xarici siyasətinin əsas istiqamətləri barədə aydın, sistemli və açıq məlumatları özündə ehtiva edirdi. Dövlətimizin başçısı müxtəlif məsələlərlə yanaşı, parlamentimizə birbaşa aidiyyəti olan bir təşəbbüs, Qoşulmama Hərəkatına üzv ölkələrinin parlament nümayəndələrinin Bakıya toplanması ilə bağlı əsaslı razılığın əldə edildiyi barədə məlumat verdi.

Bu fikirləri AZƏRTAC-a açıqlamasında Milli Məclisin deputatı Nigar Arpadarai söyləyib.

Deputat deyib: “Məlum olduğu kimi, Azərbaycanın Qoşulmama Hərəkatında sədrliyi daha bir il uzadılıb. Prezident İlham Əliyev müsahibəsində bu müddət ərzində Hərəkatın qismən institusionallaşması üçün istifadə ediləcəyini də bildirdi. Fikrimcə, bu, çox vacib xəbərdir və bunun bir neçə səbəbi var. Biz müharibə zamanı Qoşulmama Hərəkatının dəstəyinin aydın şəkildə şahidi olduq. Amma 44 günlük Vətən müharibəsi dövründə əksər təşkilatlar ədalət və beynəlxalq hüquq prinsiplərinə uyğun olmayan mövqe sərgilədilər. BMT, ATƏT, Avropa Şurası, Aİ və digər təşkilatlar çox təəssüf ki, mühüm məqamda böyük oyunçuların təşkilatlar daxilində mövqeyini qoruduqlarını, onların maraqlarını dəstəklədiklərini bariz şəkildə nümayiş etdirdilər. Böyük güclər sözügedən təşkilatlara kiçik dövlətləri susdurmaq vasitəsi kimi baxmaları təəssüf doğuran məqamlardandır. Buna baxmayaraq, Azərbaycan nəticə etibarilə bu təşkilatlarda antiazərbaycan koalisiyasının yaradılmasının qarşısını alaraq, haqlı mövqeyini qorumağı bacardı. Amma daxilən hər birimizin ürəyində həmin təşkilatların Azərbaycanın ədalətli mövqeyini dəstəkləməməsi təəssüratı var idi. Qoşulmama Hərəkatında isə əksinə, onun üzvlərinin düzgün və dürüst mövqe nümayiş etdirdiklərini gördük. Çünki bu hərəkatda böyük dövlətlərin hökmranlığı yoxdur. Azərbaycanın sədrliyi, ilk növbədə, dövlətimizin başçısının, Hərəkatın sədrinin dünyanın ən təcrübəli və güclü diplomatlarından biri olması nəzərəçarpan müsbət nəticələr verməkdədir”.

Ötən ilin noyabrın 28-də Madriddə Parlamentlərarası İttifaqın 143-cü Assambleyası çərçivəsində Qoşulmama Hərəkatının sədri, Azərbaycan Respublikasının Prezidenti İlham Əliyevin təşəbbüsü ilə təşkilatın Parlament Şəbəkəsinin təsis yığıncağının keçirildiyini bildirən deputat bildirib ki, iclasa sədrlik edən Milli Məclisin sədri Sahibə Qafarova digər ölkələrdən olan həmkarlarının da bu təşəbbüsə cəlb olunması üçün geniş sayda ikitərəfli görüşlər keçirib. Həmçinin Qoşulmama Hərəkatının Parlament Şəbəkəsinin növbəti iclasının 2022-ci ildə Azərbaycanda keçirilməsinə dair razılığın əldə olunması çox önəmli hadisədir. Çünki bu, strateji əhəmiyyət daşıyaraq, ölkəmizin maraqlarına cavab verən bir məsələdir. Hesab etmək olar ki, bu, müstəqilliyinə dəyər verən və dünya liderlərinin hegemonluğu şəraitində yaşamaq istəməyən ölkələrin maraqlarına da cavab verir.

Dünyada bir neçə parlamentlərarası platforma var ki, onların ən qədimi və nüfuzlusu Avropa Şurası Parlament Assambleyasıdır (AŞPA). Azərbaycan AŞPA-nın tamhüquqlu üzvüdür. Lakin buna baxmayaraq, AŞPA elə qurulub ki, o, ilk növbədə, Avropanın əsas oyunçularının siyasi maraqlarına xidmət etməkdədir. Bir çox hallarda böyük platformalardan kiçik dövlətlərə təzyiq aləti kimi istifadə olunur. Heç şübhəsiz, AŞPA mühüm platformalardan biridir və yuxarıda qeyd olunanlara baxmayaraq, onun işində fəal iştirak etmək ölkəmiz üçün faydalıdır. Ancaq onu da unutmamalıyıq ki, orada gündəmi formalaşdıranlar böyük dövlətlərdir. Bununla belə, qeyd etmək lazımdır ki, AŞPA-nın özündə müxtəlif ölkələrdən çoxlu sayda layiqli, həqiqətən azad və dialoqa açıq nümayəndələr yer alır.

“Bizim üçün Qoşulmama Hərəkatının parlamentlər şəbəkəsinin yaradılmasına dəstək vermək gündəliyin böyük oyunçular tərəfindən deyil, bərabərhüquqlu tərəfdaşlar və iştirakçılar tərəfindən formalaşdırılacağı arenanın yaradılması istiqamətində bir addımdır”, - deyən Nigar Arpadarai vurğulayıb ki, Azərbaycan Prezidentinin bu istiqamətdə fəaliyyəti həm ölkəmiz, həm də digər iştirakçılar üçün xüsusilə önəm kəsb edir”.

Deputat əlavə edib ki, belə platformaların yaradılması asan proses deyil, çünki bu, çox sayda ölkənin maraqlarının nəzərə alınmasını, müəyyən mərhələlərdə kompromislərə gedilməsini tələb edir. Odur ki, görülən bütün hazırlıq işləri və Qoşulmama Hərəkatının Parlament Şəbəkəsinin iclasının Bakıda keçirilməsi böyük əhəmiyyət daşıyır.

“Biz daim dəyişən siyasi aləmdə ATƏT, BMT və ya AŞPA kimi ənənəvi formatların ölkəmizlə ədalətli münasibətlər qurmasına çalışaraq yeni formatlar yaratmalıyıq. Bu zaman köhnə parlamentlərarası təşkilatlar da islahatlarını sürətləndirəcək. Çünki onlar dəyişikliklərin və yeni reallıqların qaçılmazlığını artıq bariz şəkildə qəbul edəcəklər”, - deyə deputat fikirlərini yekunlaşdırıb.