Bakı, 13 oktyabr, AZƏRTAC

Azərbaycan Ordusu işğal altındakı torpaqlarımızın azad edilməsi və ölkəmizin ərazi bütövlüyünün qorunması uğrunda mübarizə aparır. Orduya dəstək məqsədilə yaradılmış Azərbaycan Silahlı Qüvvələrinin Yardım Fonduna “Melissa” Şirkətlər Qrupu (“Melissa Group”, “Performance Center” və “Collezione Italia”) tərəfindən 100 min manat məbləğində dəstək göstərilib.

Şirkətdən AZƏRTAC-a bildiriblər ki, ianədən əlavə “Melissa Group” vətənpərvərlik ruhunun yüksəldilməsi və hər kəsin mənəvi borcunu yerinə yetirməsi üçün “Evimizə dönürük” sosial fəaliyyətini həyata keçirir. Bu fəaliyyət çərçivəsində şirkətin əməkdaşları sakinlərlə birlikdə cəbhəyə yardım işinin koordinasiyasında iştirak edir, səfərbərliyə cəlb olunan sakinlərin kommunal ödənişlərini silir, döyüşdə iştirak edən əməkdaşlarının ailələrinə maddi və mənəvi dəstəyini əsirgəmirlər.

Şirkət, eyni zamanda, müharibə şəraitində vətənpərvərlik ruhunun yüksəldilməsi istiqamətində strateji planlamasının tərkib hissəsi olan “Evimizə dönürük” loqosunu təqdim edib.

Loqoda illərdir işğal altında olan tarixi Azərbaycan torpaqları, Qarabağın xəritəsi və bu qədim Azərbaycan diyarının rəmzinə çevrilmiş Qarabağ atı əks olunub. Atın üzərindəki sərkərdə bütün bu dönəmlərdə işğal altındakı torpaqların azad edilməsi uğrunda savaşan qəhrəmanlarını simvolizə edir. Loqoda Ali Baş Komandan İlham Əliyevin “Qarabağ Azərbaycandır! fikri xüsusi vurğulanıb.

Qeyd edək ki, “Melissa Group” şirkəti daha əvvəl Ekologiya və Təbii Sərvətlər Nazirliyinin dəstəyi ilə yüzlərlə ağacın əkilməsində vasitəçi olaraq “Yaşıllığı sevirəm”, SOS uşaq kəndlərində yaşayan valideyn himayəsindən məhrum uşaqlara dəstək göstərilməsini nəzərdə tutan “Xəyalların təbəssümü” və koronavirus pandemiyası dövründə “Ümidini itirmə” sosial fəaliyyət aksiyalarını da həyata keçirib.