Respublika Gənclər Kitabxanası Məmməd Səid Ordubadiyə həsr olunmuş elektron məlumat bazası yaradıb
Bakı, 6 iyun, AZƏRTAC
Müasir Azərbaycan ədəbiyyatının tərəqqisində əvəzsiz xidmətləri olan görkəmli ədib Məmməd Səid Ordubadinin 150 illik yubileyi münasibətilə Cəfər Cabbarlı adına Respublika Gənclər Kitabxanasının əməkdaşları tərəfindən “Məmməd Səid Ordubadi-150” adlı elektron məlumat bazası hazırlanıb.
Kitabxanadan AZƏRTAC-a bildirilib ki, elektron bazada görkəmli dramaturqun həyat və fəaliyyəti, Azərbaycan tarixi roman janrında tutduğu müstəsna mövqeyi, ədib haqqında söylənilən dəyərli fikirlər, müəllifi olduğu əsərlər, eləcə də tərcümələr barəsində məlumatlar yerləşdirilib. Burada, həmçinin onun haqqında yazılan kitablar, dissertasiyalar və dövrü mətbuat nümunələrinin siyahıları da təqdim edilib. Bazada M.S.Ordubadinin "Molla Nəsrəddin" jurnalı ilə ünsiyyəti və sıx bağlılığı haqqında geniş məlumat verilib. Eləcə də M.S.Ordubadinin xatirəsinin əbədiləşdirilməsi məqsədilə adını daşıdığı ev-muzeyi haqqında da materiallar toplanıb.
Qeyd edək ki, incəsənətimizin, ümumiyyətlə, mənəvi mədəniyyətimizin inkişafında xüsusi mövqeyi olan Məmməd Səid Ordubadi Azərbaycan ədəbiyyatında tarixi roman janrının banisi olmaqla bərabər, görkəmli dramaturq, mahir jurnalist və publisist, tərcüməçi, eləcə də fəal ictimai xadim kimi də tanınır.
Kitabxananın rəsmi saytında yerləşdirilən “Məmməd Səid Ordubadi-150” adlı elektron bazası ilə tanış olmaq istəyənlər bu linkə -
https://ryl.az/melumat-bazalari/Memmed_Seid_Ordubadi_el_melumat_bazasi/index.html keçid edə bilərlər.
Bölmənin digər xəbərləri
