Türkiyənin Ardahan şəhərində 31.8 dərəcə şaxta qeydə alınıb
İstanbul, 10 fevral, AZƏRTAC
Türkiyənin şərqi Anadolu hissəsində “Sibir soyuqları” müşahidə edilir.
AZƏRTAC xəbər verir ki, bir neçə gündür davam edən əlverişsiz hava şəraiti səbəbindən Türkiyənin 33 bölgəsində təhsil müəssisələri bağlanıb.
Ölkənin Rizə, Ərzurum, Ərzincan, Qars, Ağrı, Ardahan və İğdır şəhərlərində əhaliyə qar uçqunu və qarlı hava şəraiti səbəbindən baş verə biləcək digər hadisələrlə bağlı xəbərdarlıq edilib. Türkiyə ərazisində ən aşağı temperatur - 31.8 dərəcə şaxta Ardahanda qeydə alınıb.
Hidrometeoroloqların proqnozlarına görə, ölkə ərazisində hökm sürən əlverişsiz hava şəraiti bir neçə gün daha davam edəcək. Bu səbəbdən xüsusilə səhər və axşam saatlarında əhalinin, o cümlədən sürücülərin ehtiyatlı olmaları bildirilir.
Lakin bütün bu mənfi fəsadlara baxmayaraq ölkə ərazisində davam edən qarlı hava şəraiti göz oxşayan mənzərələrin ortaya çıxmasına da səbəb olub.
Günel Məlikova
AZƏRTAC-ın xüsusi müxbiri
İstanbul
Bölmənin digər xəbərləri
