Ağdam-Xankəndi yolunun qısa müddətdə tam funksionallığı ilə işə düşməsinin şahidi olacağıq - AÇIQLAMA
Bakı, 11 sentyabr, AZƏRTAС
Uzun müddətdir ki, Ermənistan tərəfi yenə də siyasi oyunlarını qurmaqdadır. İstər beynəlxalq təşkilatlar, istərsə də dövlətlər səviyyəsində bu ölkə yenə özünə dəstək axtarmaqdadır. Düşmən dövlətə havadarlıq edən qüvvələr ona müəyyən dəstək göstərirlər. Ona görə də hazırda təcavüzkar ölkə bu siyasi oyunu davam etdirməkdədir.
Bunu AZƏRTAC-a açıqlamasında “Avrasiya miqrasiya təşəbbüsləri platforması” İctimai Birliyinin sədri Azər Allahverənov deyib.
Bildirib ki, Ermənistanın siyasi oyununun əsas niyyəti yumşaq gücdən istifadə etməklə Laçın yolunun hər hansı yoxlama aparılmadan fəaliyyət göstərməsidir. Lakin bu hal yolverilməzdir. Burada söhbət ölkənin suveren ərazisindən gedir. İstənilən beynəlxalq yük ölkə ərazisinə daxil olarkən gömrük nəzarətindən keçməlidir. Bütün yüklərə zəruri baxış keçirildikdən sonra sənədləşmə işləri aparılmalıdır. Yalnız beynəlxalq hüququn və normanın verdiyi qaydalar çərçivəsində həmin yüklərin keçirilməsi mümkün ola bilər. Digər hər hansı şərtlə yükün yoxlanılması aparılmadan ölkəyə daxil olması qeyri-mümkündür. Laçın yolundan həm iqtisadi, həm təhlükəsizlik baxımından, həm də bir çox parametrlərə görə daha üstün olan Ağdam-Xankəndi yolu var. Azərbaycan tərəfi dəfələrlə müxtəlif instansiyalarda həmin yolun Xankəndiyə zəruri yüklərin daşınması üçün çox uyğun yol olduğunu vurğulayıb. Biz beynəlxalq hüquq və norma çərçivəsində fəaliyyət göstərən, tamamilə yeni, geniş imkanlara malik yoldur. Amma Ermənistan tərəfi bunu görməzdən gələrək öz havadarlarının dəstəyi ilə yalnız bir yolun üzərində fikrini cəmləşdirməyə çalışır və yaratdıqları sırf Laçın yolu ilə bağlı olan şoudur.
“Artıq son günlərdə prosesdə maraqlı olan müəyyən siyasi dairələr var ki, onlar da müxtəlif manevrlər edərək Laçın yolu mövzusu ətrafında burulğan effekti yaratmağa çalışırlar. Lakin bütün bu oyunlar puça uğrayır. Ona görə ki, Azərbaycanın mövqeyi dəqiqdir. Dünyanın mütərəqqi qüvvələri də Ağdam-Xankəndi yolunun çox uyğun və uğurlu yol olduğunu xüsusilə qeyd edirlər. Hətta istər ABŞ-dan, istərsə digər dövlətlərdən gələn dəstək mesajları, xüsusilə həmin yolların hər ikisinin açılması ilə bağlı məsələlər onu göstərir ki, bu qüvvələr Azərbaycanın məhz beynəlxalq hüquq çərçivəsində hərəkət etdiyini və ondan kənar olanların qarşısının qətiyyətlə alınacağını yaxşı anlayırlar. Bundan başqa, Rusiya Qırmızı Xaç Cəmiyyəti həmin yol vasitəsilə yüklərini Xankəndi istiqamətində daşımaq niyyətində idi. Amma Əsgəranda qurulmuş beton plitələr vasitəsilə yol kəsilib. Həmin yüklərin hələlik Əsgəran istiqamətində keçirilməsinə maneçilik törədilir. Bu, onu göstərir ki, nəinki Azərbaycanın, hətta Rusiyanın Qırmızı Xaç Cəmiyyətinin göndərdiyi yüklər Xankəndidə yalandan qurulmuş “aclıq” və “humanitar böhran”ı puç etməyə hazırlanmış davranışlardır. Əgər ermənilər bunun qarşısını alırsa, deməli, aclıq ətrafında gündəmə gətirilən məsələlərin əsası yoxdur”, - deyə A.Allahverənov vurğulayıb.
İctimai Birliyin sədrinin sözlərinə görə, Azərbaycan tərəfi hər zaman bunu deyib ki, istər dron çəkilişlər, istərsə də sosial mediada yayılan, xüsusilə də Xankəndidən olan videolar bu şəhərdə ərzaq qıtlığının olmadığını bir daha göstərir. İnsanlar deyilən kimi aclıqdan əziyyət çəkmirlər. Sadəcə olaraq, bu, Paşinyan hakimiyyətinin növbəti siyasi oyunudur və baş verən proseslər kimin hansı məqsədlərlə ona qoşulduğunu bir daha əyani şəkildə sübut edir. Belə vəziyyətdə Azərbaycan səbirli şəkildə öz sülh gündəliyini irəli aparmaqdadır. Nəticə etibarilə də bu sülh gündəliyi mütərəqqi qüvvələr tərəfindən də dəstəklənir. Yəni bir daha dünyanın gözündə Ermənistanın destruktiv mövqedə olan ölkə olduğu sübuta yetirildi. Təcavüzkar ölkənin müxtəlif siyasi oyunlar və alətlər üçün istifadə olunduğu bir daha məlum oldu. Düşmən ölkənin bu mövqeyi onun havadarlarının Ermənistan üzərindəki hökmündən irəli gələn məsələdir. Ermənistan hər zaman Cənubi Qafqazda sülhə təhlükə yaradacaq. Ona görə ki, Ermənistan bölgədə təhlükəsizliyə zidd vəziyyətin yaranmasında maraqlı olan siyasi güclərin hər zaman aləti olub.
“Faktiki Laçın yolu ətrafında Avropa İttifaqının oradakı missiyası olan ərazidə müəyyən proseslər baş verir. Xüsusilə də şərti sərhəddə, eləcə də Rusiya sülhməramlı qüvvələrinin nəzarətindəki ərazilərdə qanunsuz erməni hərbi birləşmələri mütəmadi təxribatlar törədir. Eləcə də fortifikasiya işləri aparılır, minalar basdırılır. Bundan başqa, Azərbaycanın həmin ərazidə olan konstitusion hüququnun bərpasına maneçilik törədən fəaliyyətlərə yol verilir, qondarma prezident seçkiləri keçirilir. Bu məsələlər bir daha onu göstərir ki, Ermənistanın müxtəlif siyasi qüvvələri separatçı rejimi birbaşa olaraq idarə edirlər. Bu isə separatçılıq meyillərinin əhali arasında geniş yayılmasına səbəb olur. Beləliklə, Xankəndidə yaşayan erməniəsilli vətəndaşlarımızı öz təzyiqi və təsiri altında müəyyən qorxu hissi içində saxlamağa üstünlük verirlər.
Ermənistana havadarlıq edən beynəlxalq qüvvələr Cənubi Qafqazda separatçılıq ocağını alovlandırmağa və bununla da öz mənfəətlərini güdməyə çalışırlar. Təəssüflər olsun ki, Ermənistan 2020-ci il noyabrın 10-da imzalanmış üçtərəfli Bəyanatda əksini tapmış bir sıra vacib bəndlərin icrasından yayınır və buna da məhz həmin xarici havadarlarının fəal dəstəyi sayəsində müvəffəq olub. Amma haqq Azərbaycanın tərəfindədir və əminəm ki, qısa müddətdə ölkəmiz bu prosesdən də uğurla çıxacaq və biz Ağdam-Xankəndi yolunun tam funksionallığı ilə işə düşməsinin şahidi olacağıq”, - deyə A.Allahverənov söyləyib.
Bölmənin digər xəbərləri
