ALMANİYA AZƏRBAYCANLA ƏMƏKDAŞLIĞI GENİŞLƏNDİRMƏK İSTƏYİR
AFR-in ölkəmizdəki səfiri Klaus Qrevlix Azərbaycan-Almaniya əməkdaşlığının inkişaf perspektivlərinə, habelə respublikamızın qeyri-neft sektorunun potensialının genişləndirilməsi imkanlarına həsr olunmuş mətbuat konfransı keçirmişdir.
Cənab Qrevlix bildirmişdir ki, bu mövzulara tələbələr üçün Kappelhausda oxunacaq silsilə mühazirələrdə də toxunulacaqdır. Hüquqi dövlət quruculuğu problemlərinə, Azərbaycanın Avropa strukturlarına inteqrasiyasına, ölkənin ictimai-siyasi həyatında İnternetin roluna həsr olunan mühazirələrə gələn ilin yayında keçirilməsi nəzərdə tutulan seminarda yekun vurulacaqdır.
Səfir Azərbaycan-Almaniya əlaqələrinin səviyyəsinin artmasından danışaraq dedi ki, 1993-cü ildən bəri Almaniya hökuməti ikitərəfli münasibətlər çərçivəsində Azərbaycana 250 milyon avro məbləğində maliyyə yardımı göstərmişdir. Bundan əlavə, Almaniya öz əməkdaşlığını Avropa Birliyinin layihələri çərçivəsində də həyata keçirir. Avropa Birliyinin 369 milyon avro məbləğində ümumi maliyyə yardımının (bu, tranş şəklində tam həcmdə 2004-cü ildə alınacaqdır) 133 milyonu Almaniyanın payına düşür. 2003-2004-cü illərdə Almaniya hökuməti maliyyə əməkdaşlığı və texniki əməkdaşlıq layihələrinin həyata keçirilməsinə 18 milyon avro, kredit fonduna isə 2 milyon avro ayırmışdır. Alman maliyyəçiləri yaxın günlərdə açılacaq Azərbaycan Mikrokreditləşdirmə Bankının yaradılmasında da fəal iştirak edirlər. Almaniya İnkişaf Bankı 20 faizlik iştirak payı ilə onun tərəfdaşlarından biri olacaqdır. Yeni bank 1000 avrodan 10 min avroyadək məbləğdə kreditlər verəcəkdir.
Almaniya tərəfi çirkli suların təmizlənməsi, İmişli, Gəncə və Şəkidə suyun keyfiyyətinə nəzarətin təşkili üçün ümumi dəyəri 40 milyon avro olan layihələri də həyata keçirmişdir.
Klaus Qrevlix vurğuladı ki, onun ölkəsi Azərbaycanın əsas ticarət tərəfdaşlarından biridir və Almaniya hökuməti təkcə neft sektorunda deyil, iqtisadiyyatın başqa sahələrində də respublikamızla əməkdaşlığı genişləndirmək istəyir. O dedi ki, Azərbaycanla Almaniya arasında ədliyyə və qanunvericilik sistemi sahəsində əməkdaşlıq davam etdiriləcək və 2003-2004-cü illərdə bunun üçün 16 milyon avro ayrılacaqdır.
Bölmənin digər xəbərləri
