ALMANİYA RƏSSAMIN GÖZÜ İLƏ

19.09.2006 [17:24]
Çap et
A⁺ A^-

Almaniyanın ölkəmizdəki səfirliyi “Qız qalası” rəsm qalereyası, Azərbaycan Dövlət Rəssamlıq Akademiyası, Almaniya-Azərbaycan İqtisadi Yardım İttifaqı ilə birlikdə “Almaniya qara, qırmızı və qızılı rənglərdə bir rəssamın gözü ilə” mövzusunda müsabiqə elan edir.

Səfirliyin mətbuat xidmətindən AZƏRTAC-a bildirmişlər ki, Azərbaycan rəssamları üçün təşkil olunan müsabiqəyə əsərlər eni 60-80, uzunluğu 60-100 santimetr olan kətanda yalnız qara, qırmızı və qızılı rənglərdə təqdim edilməlidir. Mövzu seçimi zövqə görədir.

Tablolar səfirliyə oktyabrın 31-dən gec olmayaraq göndərilməlidir (Nizami küçəsi, 340, İSR Plaza, 10-cu mərtəbə).

İştirakçılar müsabiqənin təşkilatçılarına şəkillərin həm Azərbaycanda, həm də xaricdə keçirilən sərgilərdə təmənnasız nümayiş etdirilməsi üçün razılıq verməlidirlər. Bu əsərlər geri qaytarılmayacaqdır.

Münsiflər heyəti oktyabrın 31-dən sonra 2 əsər seçəcəkdir.

Almaniyaya səfər edəcək laureatları geniş yaradıcılıq proqramı və təcrübə mübadiləsi gözləyir.

Əlavə məlumatı 492-74-81 nömrəli telefonla almaq olar.