Almaniyadakı Azərbaycan diasporu Novruz bayramını qeyd etmişdir
Bakı, 27 mart (AZƏRTAC). Almaniyadakı Azərbaycanlıların Əlaqələndirmə Mərkəzində (AAƏM) Novruz bayramı münasibətilə tədbir keçirilmişdir.
Diasporla İş üzrə Dövlət Komitəsinin mətbuat xidmətindən AZƏRTAC-a bildirmişlər ki, tədbirdə Azərbaycan diasporunun üzvləri və alman ictimaiyyətinin nümayəndələri iştirak etmişlər.
Mərkəzin icraçı direktoru Samira Patzer-İsmailova xalqımızın qədim bayramlarından olan Novruzun Azərbaycanın tarixindəki rolundan danışmışdır. Bildirmişdir ki, mərkəz tərəfindən ənənəvi olaraq bu cür tədbirlər keçirilir.
Tədbir iştirakçılarına mərkəzin əməkdaşı Kəmalə Məmmədovanın rəhbərliyi ilə azərbaycanlı uşaqlar tərəfindən hazırlanmış “Torpağın var qarış-qarış, Azərbaycan, Azərbaycan! ” adlı musiqili-ədəbi proqram təqdim edilmişdir. Uşaqların çıxışları böyük rəğbətlə qarşılanmışdır.
Sonda uşaqlara Novruz hədiyyələri təqdim edilmişdir.
Bölmənin digər xəbərləri
