ALMANİYADAKI FOX TÜRK TELEVİZİYASINDA QARABAG MÜNAQİŞƏSİ HAQQINDA VERİLİŞ YAYIMLANACAQDIR
Bakı, 1 may (AZƏRTAC). Mayın 3-də Avropa Azərbaycanlıları Konqresinin (AAK) təşkilatçılığı ilə Almaniyanın Frankfurt şəhərində fəaliyyət göstərən “FOX TÜRK” televiziya kanalında Dağlıq Qarabağ münaqişəsi haqqında iki saat yarımlıq veriliş yayımlanacaqdır. AAK-ın prezidenti Başar Kömür Diaspor ilə İş üzrə Dövlət Komitəsinə bildirmişdir ki, veriliş Almaniya vaxtı ilə saat 17.30-da (Bakı vaxtı ilə 20.30-da) başlanacaqdır.
Zəki Şahinin müəllif olduğu proqramda Ermənistan-Azərbaycan Dağlıq Qarabağ münaqişəsinin başlanması səbəbləri, işğal olunan ərazilərimizdə yaşayan insanların başına gətirilən müsibətlər, yüz minlərlə soydaşımızın evsiz-eşiksiz qalması, müharibənin Azərbaycan xalqına və dövlətinə vurduğu ziyan, eləcə də problemin sülh yolu ilə həlli istiqamətində aparılan danışıqlar barədə məlumat veriləcəkdir. Verilişdə AAK-ın prezidenti Başar Kömür, Almaniyadakı Azərbaycanlıların Koordinasiya Mərkəzinin rəhbəri Samirə Patzer-İsmayılova, Avropa Türk İş Adamları Mərkəzinin prezidenti Əhməd Sərdar Yenicə, “Almaniya Türk Toplumu”nun təmsilçiləri Sener Sargut və Arif Arslanər, yazıçı-jurnalist Mehmet Qoca, tədqiqatçı Sabriye Supcun iştirak edəcəklər.
Bölmənin digər xəbərləri
