AMERİKA BİRLƏŞMİŞ ŞTATLARI AZƏRBAYCANIN DÜNYA TİCARƏT TƏŞKİLATINA ÜZV QƏBUL EDİLMƏSİNİ DƏSTƏKLƏYİR
Xarici İşlər Nazirliyinin mətbuat mərkəzindən bildirmişlər ki, nazir Elmar Məmmədyarov Azərbaycanın bölgədəki əhəmiyyətindən, ölkəmizdə gedən sosial-iqtisadi tərəqqi, həyata keçirilən irimiqyaslı regional və infrastruktur layihələr və respublikamızın rəhbərliyinin qeyri-neft sektorunun inkişafına xüsusi diqqət yetirməsi barədə qonağa ətraflı məlumat vermişdir. Nazir ölkəmizin DTT-yə üzv olmaq məqsədi ilə dövlət rəhbərliyi tərəfindən aparılan işləri vurğulamış, bu məqsədlə həyata keçirilən tədbirlərdən və aparılan danışıqlardan söhbət açmışdır.
Səfir Peter Allgeier ABŞ rəhbərliyinin Cənubi Qafqazda mühüm rol oynayan Azərbaycan ilə əlaqələrə xüsusi önəm verdiyini, ölkəmizin tezliklə Dünya Ticarət Təşkilatına üzv qəbul edilməsinə tərəfdar olduğunu və üzvlük üçün tələb olunan ölkədaxili müvafiq prosedurların tezliklə həyata keçirilməsinin vacibliyini qeyd etmişdir. P.Allgeier Birləşmiş Ştatların Azərbaycan ilə bu sahədə əməkdaşlıq etməyə hazır olduğunu nazir E.Məmmədyarovun diqqətinə çatdırmışdır.
Görüşdə qarşılıqlı maraq doğuran digər məsələlər ətrafında fikir mübadiləsi aparılmışdır.
Bölmənin digər xəbərləri
