ANARIN “DANTENİN YUBİLEYİ” POVESTİ TÜRKİYƏDƏ EKRANLAŞDIRILIB

03.11.2004 [16:27]
Çap et
A⁺ A^-

Azərbaycan Yazıçılar Birliyindən AZƏRTAC-a bildirmişlər ki, Türkiyənin tanınmış rejissoru Feyzi Tuna xalq yazıçısı Anarın “Dantenin yubileyi” povesti əsasında “Aktyorun əsgisi” (“Qoca aktyor”) adlı 70 dəqiqəlik bədii film çəkmişdir. Filmdə baş rolları məşhur aktyorlardan Fərhan Şənsoy və Sona Kəsgin ifa edirlər. Filmin musiqisini azərbaycanlı bəstəkar İlyas Mirzəyev yazmışdır.

Bu film TRT-nin planlaşdırdığı “Türk dünyası ədəbiyyatından örnəklər” seriyasından çəkilmiş ikinci əsərdir. Birinci film türk ədəbiyyatının klassiki Xalidə Ədib Adıvarın “Yol Palasda cinayət” romanı əsasında lentə alınmışdır. Həmin seriyadan Çingiz Aytmatovun “İlk müəllim” povestini və Yaqub Qədri Qaraosmanoğlunun bir əsərini də ekranlaşdırmaq nəzərdə tutulur.

“Aktyorun əsgisi” filmi gələn ilin yanvarında TRT-2 kanalında nümayiş etdiriləcəkdir.