ANKARADA ULU ÖNDƏR HEYDƏR ƏLİYEVİN ADINI DAŞIYAN PARKIN TƏMƏLİ QOYULMUŞDUR
Mərasimə toplaşan Türkiyənin hökumət nümayəndələri, millət vəkilləri, türkdilli ölkələrin Ankaradakı səfirləri, qardaş ölkədə yaşayan və işləyən azərbaycanlılar, parkın salındığı Yeniməhəllə rayonundakı Heydər Əliyev adına orta məktəbin müəllim və şagirdləri türk dünyasının dahi şəxsiyyətləri Heydər Əliyevin və Mustafa Kamal Atatürkün əziz xatirələrini birdəqiqəlik sükutla yad etdilər. Azərbaycanın və Türkiyənin dövlət himnləri səsləndi, ulu öndərimiz Heydər Əliyevin və böyük Mustafa Kamal Atatürkün ruhlarına dua oxundu.
Mərasimi giriş sözü ilə açan ölkəmizin Ankaradakı səfiri Zakir Həşimov müstəqil Azərbaycan dövlətinin memarı və qurucusu Heydər Əliyevin Türkiyə-Azərbaycan münasibətlərinin möhkəmlənməsindəki misilsiz xidmətlərindən, onun bu siyasətinin Prezident İlham Əliyev tərəfindən uğurla davam etdirilməsindən danışdı, mərasimdə iştirak edən Türkiyənin hökumət nümayəndələrinə və millət vəkillərinə, səfirlərə minnətdarlığını bildirdi.
Azərbaycan xarici işlər nazirinin müavini Vaqif Sadıqov məhz Heydər Əliyevin memarı olduğu Bakı-Tbilisi-Ceyhan neft, Bakı-Tbilisi-Ərzurum qaz kəmərlərinin, habelə Qars-Axalkalaki-Bakı dəmir yolu layihəsinin Türkiyə ilə Azərbaycan arasında qardaşlıq və dostluq münasibətlərinin yüksək səviyyəsinin göstəricisi olduğunu vurğuladı. O, siyasi sahədə də ölkələrimizin bir-birinə arxa olduqlarını bildirərək dedi ki, Azərbaycan qondarma “erməni soyqırımı” ilə bağlı qardaş Türkiyənin mövqeyini dəstəkləyir və daim dəstəkləyəcəkdir.
Türkiyənin keçmiş naziri İsmət Sezgin türk dünyasının dahi şəxsiyyəti Heydər Əliyevin adını daşıyan bu parkın salınmasını ulu öndərə Türkiyədə olan hörmət və ehtiramın daha bir nümunəsi kimi səciyyələndirdi. O vurğuladı ki, Türkiyə xalqı türkdilli xalqların birlik və bərabərliyi üçün böyük xidmətlər göstərmiş Heydər Əliyevin əziz xatirəsini yaşadacaq və onu daim ehtiramla anacaqdır.
Türkiyə Böyük Millət Məclisi sədrinin müavini İsmayıl Aytəkin Heydər Əliyev parkının məhz Atatürk Ormanının mərkəzində salınmasını türk dünyasının bu iki dahi şəxsiyyətinin bir yerdə olmasının rəmzi əlaməti kimi dəyərləndirərək dedi: “Buraya gələn hər bir ankaralı, şəhərimizin qonaqları Heydər Əliyevi və Mustafa Kamal Atatürkü rəhmətlə və ehtiramla yad edəcəklər”.
Türkiyə-Azərbaycan parlamentlərarası dostluq qrupunun sədri, millət vəkili Haluk İpək Azərbaycan Prezidenti İlham Əliyevin burada fidanlar əkdiyini və indi onların boy atdığını xatırlatdı. O bildirdi ki, Azərbaycanın ağır günlərində xilaskarlıq missiyasını yerinə yetirmiş və güclü, inkişaf edən bir dövlət qurmuş Heydər Əliyevin əziz xatirəsi Türkiyədə də hər zaman böyük ehtiramla anılacaqdır.
Sonra parkın rəmzi təməli qoyuldu, bu əlamətdar hadisə münasibətilə qurbanlar kəsilərək, Ankaradakı yaşlılar və uşaq evlərinə göndərildi.
Bölmənin digər xəbərləri
