Avqustda Almaniyada işsizliyin səviyyəsi artıb
Berlin, 29 avqust, AZƏRTAC
Avqustda Almaniyada işsizlərin sayı 46 min nəfər artaraq 3 milyon 25 min nəfərə çatıb. Bu, ötən ilin avqust ayı ilə müqayisədə 153 min nəfər çoxdur. Ölkədə işsizlərin sayı sonuncu dəfə 2015-ci ilin fevralında 3 milyondan yuxarı olub.
AZƏRTAC xəbər verir ki, bu göstəricilər Federal Əmək Agentliyinin açıqlamasında əksini tapıb.
Avqustda işsizliyin səviyyəsi iyulla müqayisədə 0,1 faiz artaraq 6,4 faizə yüksəlib. İyulda ölkədə 2 milyon 979 min işsiz şəxs qeydə alınıb.
Agentliyin açıqlamasında qeyd olunub ki, ölkədə işsizlik göstəriciləri adətən yay aylarında çox olur. Buna səbəb şirkətlərin tətil ərəfəsində daha az işçi qəbul etməsi və bəzi tədris müəssisələrində əmək müqavilələrinin başa çatmasıdır. Lakin avqust ayının göstəriciləri son 15 ildə heç vaxt belə yüksək olmayıb.
Ən yüksək işsizlik səviyyəsi Bremen (11,8 faiz) və Berlində (10,5 faiz), ən aşağı göstərici isə Bavariya (4,2 faiz), Baden-Vürtemberqdə (4,7 faiz) qeydə alınıb.
Federal Əmək Agentliyinin rəhbəri Andrea Nahles bildirib ki, əmək bazarı son illərin iqtisadi durğunluğunun təsiri altında olsa da, sabitləşmənin ilk əlamətləri müşahidə edilməkdədir.
Berlin
Bölmənin digər xəbərləri
