AZƏRTAC-ın İTAR-TASS agentliyindən aldığı xəbərdə bildirilir ki, Portuqaliyada Avropa futbol çempionatı final mərhələsinin oyunlarını 40 nəfərdən ibarət hakimlər “komandası” idarə edəcək və onların 12-si baş hakim (4 nəfər ehtiyatda) olacaqdır. Baş hakimlərə bir ölkəni təmsil edən xətt hakimləri kömək göstərəcəklər. Onlar hansı görüşü idarə edəcəklərini oyuna bir gün qalmış biləcəklər.

Avropa çempionatının hər görüşünün idarə olunmasına görə hakim 10 min İsveçrə frankı və hər oyun üçün bonus qonorarı alacaqdır. Buraya 250 frank gündəlik xərclər daxil deyildir. Hakimlər briqadasının hər biri azı iki görüşü idarə etməlidir. Qrup turniri və pley-off oyunlarının haqqının ödənilməsində, eləcə də bonuslar verilməsində fərq yoxdur. Lakin, Avropa Futbol Assosiasiyaları İttifaqı (UEFA) həlledici oyunların hakimlərini əlavə olaraq mükafatlandırmaq hüququnu özündə saxlayır.