Avropa Komissiyası Rusiyanın aktivləri hesabına Ukraynaya 6 milyard avro köçürəcək
Bakı, 13 noyabr, AZƏRTAC
Avropa Komissiyası Ukraynaya ERA kredit xətti çərçivəsində təxminən 6 milyard avro ayrıldığını elan edib.
AZƏRTAC xəbər verir ki, Avropa Komissiyasının Prezidenti Ursula Fon der Lyayen bu barədə Avropa Parlamentində çıxışı zamanı deyib. Onun sözlərinə görə, Avropa Komissiyasının məqsədi Ukraynada hərbi əməliyyatlar aparan Rusiyanın xərclərini artırmaqdır.
O, həmçinin Avropa Komissiyasının Belçika ilə Rusiya aktivləri hesabına Ukraynanın maliyyələşdirilməsini təmin etmək məsələsini müzakirə etdiyini vurğulayıb.
“Avropa Şurasının növbəti iki il ərzində Ukraynanın maliyyə ehtiyaclarını qarşılamaq öhdəliyini alqışlayıram. Biz bu öhdəliyin yerinə yetirilməsi variantları üzərində Belçika və bütün üzv dövlətlərlə yaxından əməkdaşlıq edirik”, – deyə o bildirib.
Ursula Fon der Lyayen müxtəlif variantların nəzərdən keçirildiyini, lakin Rusiya aktivlərinin bloklanmış vəsaiti hesabına kreditin verilməsinin əsas variant olduğunu vurğulayıb.
Qeyd edək ki, G7 ölkələri tərəfindən Rusiyanın dondurulmuş aktivlərinin yenidən sərmayə edilməsi yolu ilə əldə olunan gəlirlər hesabına formalaşan ERA kredit xəttinin ümumi həcmi 45 milyard avroya çatır.
Bölmənin digər xəbərləri
