Azərbaycan Bayrağı xalqımızın azadlıq məfkurəsinə, milli mənəvi dəyərlərə sadiqliyini nümayiş etdirir
Bakı, 12 noyabr, AZƏRTAC
Müstəqil Azərbaycanın milli suverenliyinin rəmzi olan bayrağımız insanları vahid məfkurə ətrafında birləşdirərək qürur mənbəyimizə çevrilib. Ən müqəddəs dövlət rəmzi və özünütəsdiq simvolu olan bayraq bu gün ölkəmizin hər bir məkanında məğrur-məğrur dalğalanır. Milli kimliyimizi sübut edir, milli kimliyimizdən danışır. Azərbaycan Respublikasının Konstitusiyasında qeyd olunduğu kimi, Azərbaycan Respublikasının dövlət rəmzləri Dövlət Bayrağı, Dövlət Gerbi və Dövlət Himnidir. Zəfər çalmış Azərbaycanın işğaldan azad olunan ərazilərində üçrəngli bayrağımız dalğalanır. Bu gün Azərbaycan bayrağının Şərqi Zəngəzurda, Qarabağda, o cümlədən Şuşada dalğalanması böyük rəmzi məna daşıyır. Biz bu torpaqlara qayıtmışıq, əbədi olaraq əzəli məkanlarımızda yaşayacaq və bayrağımız başımızın üstündə əbədi dalğalanacaq.
Bunu AZƏRTAC-a açıqlamasında Yeni Azərbaycan Partiyası Nəsimi rayon təşkilatının sədri Azər Süleymanov söyləyib.
“Qürurverici haldır ki, 9 noyabr tarixi ölkəmizdə Dövlət Bayrağı Günü kimi qeyd olunur. Azərbaycan Prezidenti İlham Əliyevin 2009-cu il 17 noyabr tarixli Sərəncamı ilə Dövlət Bayrağı Günü ölkəmizdə noyabrın 9-da qeyd olunmağa başlandı. Tarixə nəzər salsaq görərik ki, Azərbaycan Xalq Cümhuriyyətinin yadigarı olan Dövlət Bayrağı 1918-ci il noyabrın 9-da Azərbaycan Xalq Cümhuriyyəti Hökumətinin iclasında qəbul edilib. 1920-ci il aprelin 28-də Azərbaycan Xalq Cümhuriyyətinin süqut etməsi və sovet hakimiyyətinin qurulması ilə üçrəngli bayrağımızın yüksəklikdə dalğalanmasına sədd qoyulsa da, bu, xalqın təfəkküründə dərin iz salmışdı. Hər kəs bu böyük amalla Azərbaycan bayrağının Vətən torpağında dalğalanması arzusu ilə yaşamışdı. Yalnız 70 ildən sonra Azərbaycanın üçrəngli bayrağı milli şüurun oyanışı ilə yenidən xalqımızın milli müstəqilliyinin və iradəsinin ifadəsi kimi dalğalanmağa başladı”, - deyə A.Süleymanov qeyd edib.
O bildirib ki, 1990-cı illərin çətin, ağır günlərində Ulu Öndər Heydər Əliyevin rəhbərliyi ilə Naxçıvanda mühüm dövlətçilik fəaliyyəti həyata keçirilərək milli dövlətçilik ənənələrinin əsası qoyuldu. Azərbaycan Xalq Cümhuriyyətinin yadigarı olan bayraq 1990-cı il noyabrın 17-də Naxçıvan Muxtar Respublikası Ali Məclisinin Sədri, xalqımızın ümummilli lideri Heydər Əliyevin təşəbbüsü və rəhbərliyi ilə keçirilən sessiyada Naxçıvan Muxtar Respublikasının dövlət bayrağı kimi təsdiqlənib. 1991-ci il fevralın 5-də Azərbaycan Respublikası Ali Soveti bu bayrağın yenidən Azərbaycanın Dövlət Bayrağı kimi qəbul olunması haqqında qərar qəbul edib.
“Hər bir vətəndaş Azərbaycan bayrağının mahiyyət və əzəmətini dərindən dərk edərək, onun yüksəklikdə dalğalanması yolunda böyük mübarizə olduğunu unutmamalıdır, bu müstəqillik rəmzinin qədrini bilməlidir. Bayrağımızda olan hər bir rəng Azərbaycan xalqına məxsus dəyərləri özündə ehtiva edir. Bayrağın üzərindəki hər rəng və simvol bir özəl məna daşıyır. Qeyd edək ki, müstəqil Azərbaycanın Dövlət Bayrağındakı üç rəngin ifadə etdiyi və XX əsrin əvvəllərindəki milli istiqlal ideologiyamızın üç təməl prinsipini təşkil edən "türkçülük, islamçılıq və müasirlik" formulunun müəllifi Azərbaycan mütəfəkkiri Əli bəy Hüseynzadədir. Göy rəng Azərbaycan xalqının türk mənşəli olmasını göstərir, türkçülük ideyası ilə bağlıdır. Qırmızı rəng müasir cəmiyyət qurmaq, demokratiyanı inkişaf etdirmək, bir sözlə, müasirləşməni və inkişaf istəyini ifadə edir. Yaşıl rəng isə İslam sivilizasiyasına və İslam dininə mənsubluğun göstəricisidir. Demək, bayrağımız üzərindəki hər bir rəng Azərbaycan tarixini ilə sıx bağlıdır. Onun tarixindən, bu günündən danışır. Ən yüksək zirvələrdə dalğalanan üçrəngli bayrağımız Azərbaycan dövlətinin gücünü və xalqımızın milli birliyini nümayiş etdirir. Azərbaycan Prezidenti çıxışlarının birində bildirib: "Bayrağımız qürur mənbəyimizdir. Bizim bayrağımız canımızdır, ürəyimizdir". Azərbaycan Xalq Cümhuriyyətinin yadigarı olan Azərbaycan bayrağı xalqımızın azadlıq məfkurəsinə, milli mənəvi dəyərlərə və ümumbəşəri ideallara sadiqliyini nümayiş etdirir”, - deyə Azər Süleymanov diqqətə çatdırıb.
Bölmənin digər xəbərləri
