Azərbaycan beynəlxalq dialoq və qlobal əməkdaşlıq üçün etibarlı platforma kimi tanınır
Bakı, 21 may, AZƏRTAC
Bu gün Azərbaycan beynəlxalq dialoq və qlobal əməkdaşlıq üçün etibarlı platforma kimi tanınır. COP29-dan sonra WUF13-ün uğurla təşkili beynəlxalq ictimaiyyətin ölkəmizə göstərdiyi etimadın bariz nümunəsidir.
AZƏRTAC xəbər verir ki, bu fikirləri Qeyri-Hökumət Təşkilatlarına Dövlət Dəstəyi Agentliyinin İdarə Heyətinin sədri Aygün Əliyeva Ümumdünya Şəhərsalma Forumunun 13-cü Sessiyası (WUF13) çərçivəsində keçirilən “İcma əsaslı və Vətəndaş Cəmiyyəti Təşkilatlarının Dəyirmi Masası: İqlim böhranı şəraitində adekvat mənzil, torpaq və əsas xidmətlərin təmin olunması üçün aşağıdan yuxarıya icmayönümlü fəaliyyət” mövzusunda dəyirmi masada açılış nitqi zamanı deyib.
Aygün Əliyeva bildirib ki, WUF13 Azərbaycan üçün də xüsusi əhəmiyyət daşıyır.
“Hazırda ölkəmiz işğaldan azad edilmiş Qarabağ və Şərqi Zəngəzurda dünyanın ən böyük postmünaqişə yenidənqurma və şəhər bərpası proseslərindən birini həyata keçirir. Dağıdılmış şəhər və kəndlər yenidən qurulur, “ağıllı şəhər” və “ağıllı kənd” konsepsiyaları əsasında müasir yaşayış ekosistemləri formalaşdırılır.
Lakin şəhərlərin yenidən qurulması yalnız yolların, binaların və infrastrukturun tikilməsi demək deyil. Əsas məsələ insan hüquqlarının, sosial etimadın və insanların gələcəyə inamının bərpasıdır. Məhz bu baxımdan, vətəndaş cəmiyyəti təşkilatlarının fəaliyyəti xüsusi əhəmiyyət daşıyır”, - deyə Aygün Əliyeva əlavə edib.
Müxbir - Səbinə Əlizadə
Bölmənin digər xəbərləri
