Azərbaycan diasporu Ulyanovskda mini futbol turniri təşkil edib
Bakı, 27 fevral, AZƏRTAC
Ulyanovsk şəhərindəki “Novoye pokoleniye” idman kompleksində mini futbol üzrə ənənəvi turnir - Xalqlar Dostluğu Kuboku keçirilib.
AZƏRTAC xəbər verir ki, 11 ildən bəri keçirilən bu ənənəvi turnirin təşkilatçısı yerli Azərbaycan icmasıdır. İcmanın rəhbəri Ulyanovsk Regional Azərbaycan Milli-Mədəni Muxtariyyətinin (URANKA) sədri İslam Hüseynovdur. Builki idman bayramının təşkilinə Rusiyanın Azərbaycanlı Gənclər Birliyinin (RAGB) regional nümayəndəliyinin fəalları da töhfə veriblər. Onlar eyniadlı komanda da yaradıb və 27 başqa kollektivlə bərabər, mükafat uğrunda mübarizəyə qoşulublar.
Turnirin açılış mərasimində çıxış edən Ulyanovsk vilayətinin qubernatoru Sergey Morozov deyib: “İdman insanları heç vaxt ayırmır, əksinə, onları birləşdirir. Ulyanovsk vilayətinin milli siyasəti də belədir. Biz nə ediriksə, sülh naminə edirik. Artıq 11-ci dəfədir ki, bu zalda toplaşmışıq. Bizim üçün bu cür imkan yaradılmasına görə turnirin təşkilatçılarına və konkret olaraq İslam Hüseynova təşəkkür edirəm. Bu gün görürük ki, vaxtilə şəhərdaxili miqyaslı kiçik bir tədbir kimi başlanmış bu turnir genişlənərək regionlararası, hətta beynəlxalq miqyas alıb”.
URANKA-nın sədri İslam Hüseynov cavab nitqi söyləyib. O, millətlərarası hərəkatın hərtərəfli dəstəklənməsinə görə Ulyanovsk qubernatoruna, vilayət administrasiyasına, vilayət mərkəzinin rəhbərliyinə təşəkkürünü bildirib. Azərbaycan diasporunun rəhbəri deyib: “Biz bu regionun ictimai həyatında iştirak etməyə, bütün millətləri təmsil edən insanlar arasında harmonik münasibətlərin inkişafına şərait yaradan bu cür layihələri təşkil etməyə şadıq, çünki bu, hər bir sivil cəmiyyətin əsas dəyərlərindən biridir”.
Topa ilk zərbə vurmaq hüququ Sergey Morozova verilib. Bundan dərhal sonra ilk komandalar meydana çıxıblar. Turnir olimpiya sistemi üzrə təşkil edilib (uduzan çıxır), buna görə də idmançıların səhv etməyə haqqı yox idi. Hər bir matç maraqlı və gərgin keçib. Finala dörd komanda çıxıb: turnirin debütantları - “Russkiy dom” ictimai təşkilatının komandası, “Molniya” ordu idman klubunun təcrübəli oyunçuları, Ulyanovsk Dövlət Pedaqoji Universitetinin və Ulyanovsk Dövlət Texniki Universitetinin yığmaları. Yeri gəlmişkən, “politexnikləri” dünya yığması adlandırmaq olar, çünki bu drujinaya Anqola, Qvineya-Bisau, İraq və Türkmənistandan olan əcnəbi tələbələr daxildir. Sürətli və emosional oyunu ilə tamaşaçıları valeh etmiş “politexniklər” finalda “Russkiy dom” təşkilatından olan debütantlara qalib gələrək birinci yeri tutublar. Gərgin şəraitdə keçən matçın əsas vaxtı heç-heçə (1:1) başa çatıb. Buna görə də Xalqlar Dostluğu kubokunun taleyi penaltilər seriyasında həll edilib. Texniki Universitetin komandasının qapıçısı bu görüşün qəhrəmanı olub. O, rəqiblərin forvardının güclü zərbəsini dəf edərək öz klubuna qələbə gətirib.
Gələcək müəllimlərin komandasına 4:3 hesabı ilə qalib gəlmiş “Molniya” üçüncü yeri tutub. RAGB komandası da pis çıxış etməyib: o, dörddəbir finala qədər irəliləyib, bu mərhələdə isə gələcək çempionlara uduzub.
İdmançılara medalları və kuboku Ulyanovsk Futbol Federasiyasının prezidenti Valeri Korobkov təqdim edib. Turnirin ən yaxşı iştirakçıları da təltif edilib: Albert Nemov “ən yaxşı qapıçı”, Dmitri Yelimov “ən yaxşı meydan oyunçusu”, Andre Edmilson isə “tamaşaçı rəğbəti mükafatı” nominasiyasında birinci olub.
Sonda çıxış edən İslam Hüseynov deyib: “Bütün iştirakçılara təşəkkürümü bildirirəm. Onlar futbol meydanında fədakarcasına mübarizə apardılar, tamaşaçılara səmimi emosiyalar bəxş etdilər. İstərdim ki, bir ildən sonra 12-ci Xalqlar Dostluğu Kubokunda sizinlə hökmən yenidən görüşək”.
Bölmənin digər xəbərləri
