Azərbaycan enerji diplomatiyasının ön sıralarında yer alır ŞƏRH
Bakı, 8 iyun, AZƏRTAC
Baku Expo Mərkəzində başlanan Bakı Enerji Həftəsi, Azərbaycan Prezidenti İlham Əliyevin açılış mərasimində iştirakı və çıxışı növbəti dəfə öz tarixi və strateji mesajları ilə ölkəmizi bir daha dünyanın diqqət mərkəzinə çevirdi.
Bunu AZƏRTAC-a açıqlamasında Milli Məclisin deputatı Jalə Əliyeva deyib.
O bildirib ki, Prezident İlham Əliyev çıxışına 1994-cü ildə imzalanmış və Azərbaycanın energetika xəritəsini dəyişən “Əsrin müqaviləsi”nə istinad edərək başladı. Dövlətimizin başçısı Ulu Öndər Heydər Əliyevin uzaqgörən siyasəti sayəsində bu müqavilənin Ermənistanın işğalına və 1000 faizə çatan inflyasiyaya malik çətin iqtisadi vəziyyətdə imzalandığını xatırlatdı. Bu müqavilə Azərbaycanın müstəqilliyini bir daha tanıtdı və regionu enerji xəritəsinə çevirdi.
Prezident İlham Əliyev Azərbaycanda neft-qaz sektorunun ÜDM-də payının 30 faizi keçdiyini, ölkənin iqtisadi islahatlarla gücləndiyini və xarici borcun ÜDM-in cəmi 7 faizi səviyyəsində olduğunu qeyd etdi. Əlbəttə ki, maliyyə ehtiyatlarının bu borcdan 14 dəfə üstün olması və yoxsulluq səviyyəsinin 5 faizə düşməsi ölkə daxilində sosial rifaha göstərilən diqqətin bariz nümunəsidir.
Ölkə Prezidenti Azərbaycanın nəqliyyat və enerji infrastrukturuna yönəlmiş məsuliyyətli siyasətini xüsusi vurğulayıb. Cənub Qaz Dəhlizi vasitəsilə qazın Xəzər dənizindən İtaliyaya qədər, 3500 kilometr məsafəni qət edərək çatdırılması Azərbaycanın enerji təhlükəsizliyindəki rolunu əhəmiyyətli dərəcədə artırır. Bu baxımdan boru kəmərləri təkcə iqtisadi əhəmiyyət daşımır, eyni zamanda, geosiyasi güc amilinə çevrilir.
“Dövlətimizin başçısı qeyd edib ki, 2024-cü ildə Azərbaycan 12 ölkəyə təbii qaz ixrac edib. O, həmçinin bu ilin may ayından etibarən qaz ixrac edilən ölkələrin sayının 8 dövlət artırılacağını bildirib. Azərbaycan Prezidenti vurğulayıb ki, 2024-cü ildə ölkə ümumilikdə 25 milyard kubmetr qaz ixrac edib və 2030-cu ilədək bu həcmin 33 milyard kubmetrə çatdırılması planlaşdırılır. Qaz ixracındakı artım isə beş mövcud və ya yeni yatağın istismarı hesabına təmin ediləcək.
Ölkə Prezidenti çıxışında bildirib ki, “Şəfəq-Asiman” blokunun inkişafı istiqamətində SOCAR, BP və Türkiyənin TPAO şirkətləri arasında əməkdaşlıq razılaşdırılıb. Xəzər dənizinin 125 kilometr dərinliyində yerləşən bu blokda TPAO 30 faiz payla iştirak edəcək. Azərbaycan və Türkiyə arasında enerji infrastrukturu sahəsində əməkdaşlıq uğurla davam edir. Bu kontekstdə 2023-cü ildə istismara verilmiş İğdır–Naxçıvan qaz boru kəməri layihəsi xüsusi əhəmiyyət daşıyır. Bununla yanaşı, Azərbaycan 2030-cu ilədək bərpaolunan enerji üzrə gücünü 6,5 giqavat səviyyəsinə çatdırmağı planlaşdırır ki, bu da ölkənin enerji şəbəkəsinin təxminən 35 faizini təşkil edəcək. BP şirkəti ilə əməkdaşlıq çərçivəsində Qarabağda inşası nəzərdə tutulan 240 meqavatlıq günəş elektrik stansiyası yaşıl enerji strategiyasının konkret təzahürüdür. Stansiyanın tikinti işlərinin 2027-ci ildə tamamlanması planlaşdırılır”, - deyə Jalə Əliyeva vurğulayıb.
Onun sözlərinə görə, Prezident İlham Əliyevin çıxışı bir daha göstərdi ki, Azərbaycan güclü enerji ölkəsinə çevrilmək yolunda inamla irəliləyir. Neft və qaz ixracı, BP, ExxonMobil və TPAO kimi beynəlxalq tərəfdaşlarla əməkdaşlıqlar, irimiqyaslı infrastruktur layihələri və yaşıl enerji strategiyası bu istiqamətdə atılan mühüm addımlardır. Bu kompleks strategiya Azərbaycanın təkcə iqtisadi və geosiyasi mövqeyini möhkəmləndirməyə deyil, eyni zamanda, qlobal enerji təhlükəsizliyinə töhfə verməyə sadiq olduğunu nümayiş etdirir. Ölkəmizin bu sahədəki uğurları isə Türkiyə ilə sıx əməkdaşlıq, maliyyə sabitliyi, sosial rifah və səmərəli idarəçiliklə birgə təmin olunur.
“Bakı Enerji Həftəsi çərçivəsində keçirilən Forumda Prezident İlham Əliyevin geniş və əhatəli çıxışı bir daha təsdiqlədi ki, Azərbaycan enerji xəritəsində strateji və etibarlı tərəfdaş kimi mövqeyini möhkəmləndirib və enerji diplomatiyasının ön sıralarında yer almaqdadır”, - deyən deputat fikirlərini yekunlaşdırıb.
Bölmənin digər xəbərləri
