Azərbaycan gəncləri Ukrayna parlamentində sabit inkişaf ideyasını dəstəkləmişlər
Bakı, 6 iyul (AZƏRTAC). Ukrayna Ali Radasının konfrans salonunda “Ekoloji təşəbbüslər” Elmi-Metodik Mərkəzi (EMM), Ukrayna Azərbaycanlı Gənclər İttifaqı və Ümumukrayna Gənclər Assambleyasının təşkilatçılığı ilə “Gənclər sabit inkişaf uğrunda” beynəlxalq layihəsi çərçivəsində “Sabit inkişaf konsepsiyası və onun hüquqi tənzimlənməsi” mövzusunda “dəyirmi masa” olmuşdur.
AZƏRTAC xəbər verir ki, Azərbaycan, Macarıstan, Moldova, Türkiyə və Ukraynanın gənclər təşkilatlarının liderləri sabit inkişaf proqramlarının hüquqi tənzimlənməsinə dair müxtəlif ölkələrin təcrübəsinin aktuallığı və həmin təcrübənin Ukraynada tətbiq edilməsi imkanları məsələlərinə xüsusi diqqət yetirmişlər.
Ukraynadakı diplomatik missiyaların nümayəndələri tədbirin fəxri qonaqları olmuşlar. Azərbaycanın Ukraynadakı səfirliyinin ikinci katibi Sabir Rzayev “dəyirmi masa”nın iştirakçılarının diqqətini belə bir məsələyə cəlb etmişdir ki, hər bir ölkənin sabit inkişaf konsepsiyası dünyada hamı tərəfindən qəbul edilmiş konsepsiya çərçivəsində razılaşdırılmalıdır.
“Ekoloji təşəbbüslər” EMM-nin sədri, sabit inkişaf sahəsində ekspert olan Yelena Paşşenko məruzəsində “sabit inkişaf” termini dedikdə nəyi başa düşmək lazım olduğunu göstərmiş və Ukraynada ekoloji və təbiətşünaslıq təhsili ilə bağlı vəziyyəti izah etmişdir.
Sonra çıxış edən liderlər müasir dünyanın və dövlətlərin təbiətlə harmoniya şəraitində inkişafının əhəmiyyəti barədə yekdil fikirdə olmuşlar. Beləliklə, hüquqi sistemi ekoloji hüququn möhkəmlənməsində və interpretasiyasında, ictimai maraqların müdafiə olunmasında, habelə sağlam və təhlükəsiz ətraf mühitin saxlanılmasında əhəmiyyətli rol oynayır.
Ukrayna Azərbaycanlı Gənclər İttifaqının sədri Anar Tahirov dəyirmi masanın iştirakçılarını belə bir məsələyə diqqət yetirməyə çağırmışdır ki, sabit inkişaf konsepsiyasının praktiki icrası müəyyən dövlətin qanunlarına, beynəlxalq hüququn norma və prinsiplərinə uyğun həyata keçirilməlidir və həmin məsələnin həllinin sürəti və keyfiyyəti bir çox cəhətdən məhz ictimai təşkilatlardan asılıdır.
“Dəyirmi masa”nın moderatoru, Ümumukrayna Gənclər Assambleyasının başçısı Yuna Şayxaliyeva diskussiyanı yekunlaşdırmışdır. O, sabit inkişaf məsələsini tənzimləyən beynəlxalq hüquqi sənədləri göstərərək, 2000-ci ildə Avropa İttifaqı tərəfindən qəbul edilmiş sabit inkişaf hüququnun 12 əsas prinsipini iştirakçılara xatırlatmışdır.
Y.Şayxaliyeva demişdir: “Sabit inkişafın əsaslarını fəal şəkildə möhkəmləndirərkən başa düşürsən ki, biz sabahın sabit inkişafının şüurlu liderləriyik və hazırda gələcək nəsillərə daha sülhsevər, çiçəklənən və daha ədalətli dünya qurmaq üçün yaxşı imkanlara malikik”.
Bölmənin digər xəbərləri
