Əziz naxçıvanlılar!

Hörmətli xanımlar və cənablar!

Qədim Naxçıvan torpağında sizi böyük məmnunluq hissi ilə salamlayıram. İcazənizlə, Naxçıvan Muxtar Respublikasının yaradılmasının 80 illik yubileyi, qarşıdan gələn 28 May - Respublika günü və Naxçıvan beynəlxalq hava limanının açılışı münasibətilə hamınızı ürəkdən təbrik edirəm.

Möhtərəm cənab Prezident!

İlk öncə, mülki aviasiya işçilərimizin dərin minnətdarlığını və xoş arzularını Sizə çatdırmağı özümə borc bilirəm. Çünki ümummilli liderimiz Heydər Əlirza oğlu Əliyevin xatirəsinin əbədiləşdirilməsi haqqında imzaladığınız 2004-cü il 10 mart tarixli Fərman aviatorlarımızın ürəyincə olmuşdur. Bu gün beynəlxalq aeroporta Heydər Əliyevin adının verilməsindən çox haqlı olaraq qürur duyuruq.

Əziz mərasim iştirakçıları!

İki gün öncə ümummilli liderimiz, Azərbaycanın böyük oğlu Heydər Əliyevin anadan olmasının 81-ci ildönümünü qeyd etmişik. Hələ də bu tarixi günün – ulu öndərimizin doğum gününün xoş duyğularını yaşayırıq. Bu gün isə Heydər Əliyevin təşəbbüsü ilə yenidən qurulmuş Naxçıvan hava limanının açılış mərasiminə toplaşmışıq. Çox xoşbəxt adamlarıq ki, bu gün Heydər Əliyevin doğulduğu qədim diyarda, Naxçıvandayıq. Əlbəttə, mayın 12-i Naxçıvan beynəlxalq hava limanının istifadəyə verildiyi gün kimi tarixdə qalacaqdır.

Təqribən iki il əvvəl Heydər Əliyevin Naxçıvan Muxtar Respublikasının Ali Məclisində dediyi sözlər onun arzusunu bir daha açıq-aşkar əks etdirir. Ümummilli liderimiz demişdir: “Mən çoxdan bu fikirdə idim ki, Naxçıvan hava limanını yenidən quraq, yəni, yeni bir hava limanı tikək. Birincisi, gərək elə edək ki, təyyarələr buradan təkcə Bakıya, Gəncəyə yox, bir çox istiqamətlərə uçsun. İkincisi də, Naxçıvan öz coğrafi vəziyyətinə görə elə yer tutur ki, burada beynəlxalq standartlara uyğun hava limanının olması təkcə Naxçıvan üçün yox, bütün qonşu ölkələr üçün də çox əhəmiyyətli olacaqdır. Bunları nəzərə alaraq, mən belə bir qərara gəldim”.

Sevinirik ki, onun dediyi bu sözlər artıq həqiqətə çevrilmiş, bütünlüklə yenidən qurulmuş Naxçıvan hava limanı öz qapılarını dünyaya açmışdır.

Bu gün həm Naxçıvanda, həm də bütün Azərbaycanda bayramdır. Aviatorlarımız isə ikiqat bayram keçirirlər. Bildiyiniz kimi, Naxçıvan hava limanı bilavasitə ümummilli liderimiz Heydər Əliyevin təşəbbüsü və şəxsi göstərişi ilə yenidən qurulmuşdur. Onun şəxsi nüfuzu, ardıcıl nəzarəti və tələbkarlığı nəticəsində qısa bir zamanda Naxçıvan hava limanında yenidənqurma işləri başa çatdırılmışdır. Biz bu gün bir daha dərindən dərk edirik ki, mülki aviasiyamızın infrastrukturunun dəyişilməsində Heydər Əliyevin xidmətləri olduqca müstəsna əhəmiyyətə malikdir.

Böyük öndərimizin işıqlı ideyaları, həyatı və şərəfli ömür yolu mülki aviasiyamızın tarixində yaşayır və bizim bütün uğurlarımızda həmişə davam edəcəkdir. Nə qədər ki, Azərbaycan var, Heydər Əliyev də daim ürəklərdə yaşayacaqdır.

Hamımız yaxşı bilirik ki, mülki aviasiyamızda baş vermiş bütün quruculuq işləri, dirçəliş və tərəqqi üçün, ilk növbədə, ümummilli liderimiz Heydər Əliyevə borcluyuq. Xüsusilə, Bakı beynəlxalq aerovağzal kompleksi şəxsən Heydər Əliyevin təşəbbüsü ilə tikilib istifadəyə verilmişdir. Bu kompleksin isə böyük bir tarixi vardır və onu heç vaxt unutmaq olmaz.

Bildiyiniz kimi, aerovağzal kompleksinin təməlini 1981-ci ildə Heydər Əliyev qoymuşdur. Çox təəssüf ki, sonrakı dövrdə tikinti yubanmışdır. Azərbaycan Respublikasına başçılıq edə bilməməsi ucbatından burada heç bir iş görülməmiş, tikinti tamamilə dayandırılmışdı. Yalnız Heydər Əliyev Azərbaycan rəhbərliyinə qayıtdıqdan sonra kompleksin tikintisinin başa çatdırılması barədə qərar vermişdir.

Əziz mərasim iştirakçıları!

Beş il əvvəl Bakıda aerovağzal kompleksinin açılış mərasimində Heydər Əliyevin iştirakını indi də xoş duyğularla xatırlayırıq. Ulu öndərimizin həmin mərasimdə dediyi sözlər bu gün üçün daha da aktual səslənir və böyük əhəmiyyət daşıyır. O demişdir: “Bu aerovağzal kompleksinin istifadəyə verilməsi sayəsində Azərbaycanın dünya ilə əlaqələri daha da sürətlənəcək. Mən əminəm ki, aerovağzal kompleksi bu qədər gözəl olduğu kimi, o qədər gözəl istismar olunacaqdır. Biz Azərbaycan Mülki Aviasiyasına, “Azal” Konserninə böyük qiymətə malik, hamımız üçün sevimli olan bir bina – aerovağzal kompleksi təqdim edirik. Onların vəzifəsi bundan səmərəli istifadə etmək, onu göz bəbəyi kimi qorumaqdan ibarətdir”.

Ümummilli liderimizin 1999-cu il sentyabrın 30-da aerovağzal kompleksinin açılışı mərasimində dediyi bu sözlər indi hər bir mülki aviasiya işçisi üçün əməli fəaliyyət proqramıdır. Bu fəaliyyət proqramı artıq gündəlik vəzifəmizə çevrilmişdir.

Əziz naxçıvanlılar, sizin də vəzifəniz ondan ibarətdir ki, ulu öndərimizin dediyi kimi, Naxçıvan beynəlxalq hava limanından səmərəli istifadə edəsiniz, onu göz bəbəyi kimi qoruyasınız. Çünki bu hava limanı gələcək nəsillərə ümummilli liderimiz Heydər Əliyevdən qiymətli yadigardır.

Möhtərəm cənab Prezident!

Fürsətdən istifadə edib, mülki aviasiya işçilərinin bir arzusunu Sizə çatdırmağı özümə borc bilirəm. Biz təklif edirik ki, hər il Heydər Əliyevin doğum günü ümumxalq bayramı kimi qeyd olunsun.

Əziz mərasim iştirakçıları!

Heydər Əliyevin qurucusu və memarı olduğu Azərbaycan mülki aviasiyası bu gün daha da inkişaf yolundadır və onun siyasi varisi olan möhtərəm Prezidentimiz cənab İlham Əliyevin diqqət mərkəzindədir. Prezidentimizin bu gün muxtar respublikaya gəlməsi və Naxçıvan beynəlxalq hava limanının açılış mərasimində iştirak etməsi onun mülki aviasiyamıza qayğısını bir daha sübut edir. Bu isə bizə böyük ümidlər verir.

Hörmətli mərasim iştirakçıları!

Mülki aviasiyamızın bugünkü tərəqqisi Heydər Əliyevin möhkəm iradəsinin, dərin zəkasının və müdrik siyasətinin qələbəsidir. Bu siyasəti müstəqilliyimizin on üçüncü ildönümündə ölkəmizin Prezidenti cənab İlham Əliyev uğurla davam etdirir, yeni Azərbaycanı daha yüksək zirvələrə inamla aparır. Elə buna görə də biz çox haqlı olaraq, böyük iftixar hissi keçiririk. Çünki bizim cənab İlham Əliyev kimi güclü, ədalətli, mərhəmətli Prezidentimiz vardır.

Yeri gəlmişkən, demək istəyirəm ki, bu gün Heydər Əliyev siyasi xəttinin layiqli davamçısı, möhtərəm Prezidentimiz İlham Əliyev ölkəmizin tərəqqisi yolunda ardıcıl tədbirlər həyata keçirir. Regionların inkişafı ilə bağlı qəbul edilmiş Dövlət proqramı buna ən yaxşı sübutdur. Bu proqramın həyata keçirilməsinə kömək göstərmək bizim də əsas vəzifəmizdir.

Möhtərəm cənab Prezident, Sizə məruzə etmək istəyirəm ki, Naxçıvan beynəlxalq hava limanının yenidən qurulması layihəsi nəticəsində burada 200-dən çox yeni iş yeri açmışıq. Ümidvarıq ki, muxtar respublikanın əhalisi bu hava limanının bəhrəsini daha çox görəcəkdir. Bu isə Dövlət proqramının yerinə yetirilməsinə, az da olsa, bizim ilkin töhfəmizdir.

Möhtərəm cənab Prezident!

Bildiyiniz kimi, Naxçıvan hava limanının yenidən qurulması layihəsinin ümumi dəyəri 193,5 milyard manatdır. Bu vəsaitin 115 milyard manatı dövlət büdcəsindən ayrılmışdır. 63,5 milyard manatı isə “Azərbaycan Hava Yolları” Dövlət Konserninin daxili imkanları hesabına ödənilmişdir. Azərbaycan Respublikası Nazirlər Kabinetinin qərarı ilə Naxçıvan hava limanına beynəlxalq status verilmişdir. Bu status Naxçıvandan dünyanın istənilən ölkəsinə uçuşlar yerinə yetirməyə imkan yaradır.

Hörmətli cənab Prezident!

Çox işlər görülmüş, böyük inşaat proqramı yerinə yetirilmişdir. Bu gün Naxçıvan beynəlxalq hava limanı tanınmaz hala gəlmişdir. Əlbəttə, bu çox sevindiricidir. Ona görə də, icazənizlə, bu layihənin həyata keçirilməsində əməyi olan bütün mütəxəssislərə, qonşu Türkiyə inşaatçılarına, “Eren port” şirkətinə, Azərbaycan tərəfindən olan tikinti işçilərinə və inşaatda iştirak etmiş bütün insanlara minnətdarlığımı və təşəkkürümü bildirirəm.

Cənab Prezident, biz təhlükəsiz uçuşlar yerinə yetirməklə müstəqil Azərbaycanın tərəqqisi yolunda var gücümüzlə çalışacağıq. Yeri gəlmişkən, bəyan edirəm ki, biz, aviatorlar Azərbaycanın Prezidenti kimi Sizi dəstəkləyir və ətrafınızda sıx birləşirik. Bu fürsətdən istifadə edib, mülki aviasiyamıza qayğı göstərdiyinizə görə, “Azərbaycan Hava Yolları” Dövlət Konserninin 8 minlik kollektivi adından Sizə dərin minnətdarlığımı bildirirəm. Qarşıdan gələn Respublika günü münasibətilə Sizi səmimi qəlbdən təbrik edir, yeni, müstəqil Azərbaycanın tərəqqisi naminə böyük uğurlar arzulayıram.

Diqqətinizə görə sağ olun.