İQTİSADİYYAT
AZƏRBAYCAN İNFORMASİYA TEXNOLOGİYALARI SAHƏSİNDƏ BEYNƏLXALQ TƏŞKİLATLARLA ƏMƏKDAŞLIQ ETMƏK İSTƏYİR
Azərbaycan nümayəndələri İtaliyanın Kaserta şəhərində keçirilən elektron-informasiya şəbəkəsinin ictimaiyyət tərəfindən idarə olunması və inkişafına dair beynəlxalq seminarda iştirak etmişlər.
“İnformasiya-kommunikasiya texnologiyaları (İKT) üzrə milli strategiyanın işlənib hazırlanması və ilkin mərhələdə tətbiqi” layihəsinin milli əlaqələndiricisi Məleykə Abbaszadənin sözlərinə görə, beynəlxalq seminarda inkişaf etmiş ölkələrlə keçid dövrünü yaşayan ölkələr arasında informasiya texnologiyalarının idarə edilməsi sahəsində əməkdaşlıq məsələləri müzakirə olunmuşdur. O demişdir ki, Azərbaycanın dövlət qurumları bu ölkələr arasında İKT sahəsində mövcud olan fərqin (rəqəm uyğunsuzluğunun) aradan qaldırılmasına diqqət yetirməlidirlər. Məleykə Abbaszadə bildirmişdir ki, Avropa Şurasının İqtisadi Komissiyası ekspertlərinin informasiya texnologiyalarının səviyyəsi barədə hesabatında ölkəmiz MDB ölkələri arasında öncül yer tutur. Bundan əlavə, ölkənin müvafiq qurumlarının nümayəndələri BMT-nin 2003-cü ildə keçiriləcək ümumdünya zirvə toplantısına fəal hazırlaşırlar. Bu toplantıda informasiya texnologiyaları şəbəkəsinin inkişafı əsas məsələlərdən biri olacaqdır.