Azərbaycan-Misir əməkdaşlığı ölkələrimizin ənənəvi dostluğunun təcəssümüdür
Bakı, 14 oktyabr, AZƏRTAC
Azərbaycanın xarici işlər naziri Elmar Məmmədyarov Misir Prezidentinin Misirin BMT Təhlükəsizlik Şurasına namizədliyi məsələləri üzrə xüsusi nümayəndəsi, səfir Məhəmməd Əlahəddin Ali Şouki əl-Hədidi ilə görüşüb.
Xarici İşlər Nazirliyinin mətbuat xidmətindən AZƏRTAC-a bildiriblər ki, qonaq Misir Prezidenti Əbdülfəttah əl-Sisinin səmimi salamlarının və xoş arzularının Azərbaycan Prezidenti İlham Əliyevə çatdırılmasını xahiş edib.
Görüşdə Azərbaycan və Misir arasında ikitərəfli əlaqələrin inkişafının məmnunluq doğurduğu qeyd olunub. İqtisadi-ticarət əlaqələrinin və turizm sahəsində əməkdaşlığın inkişafı üçün qarşılıqlı şəkildə səylərin artırılmasının vacibliyi vurğulanıb.
Beynəlxalq təşkilatlar çərçivəsində Azərbaycan-Misir əməkdaşlığının, qarşılıqlı dəstəyinin ölkələrimiz arasındakı ənənəvi dostluğun təcəssümü olduğu bildirilib.
Səfir Məhəmməd Əlahəddin Ali Şouki əl-Hədidi Misirin Azərbaycanın ərazi bütövlüyünü və suverenliyini dəstəklədiyini, Ermənistan-Azərbaycan münaqişəsinin sülh yolu ilə beynəlxalq hüququn norma və prinsipləri, BMT Nizamnaməsi əsasında həllinin tərəfdarı olduğunu diqqətə çatdırıb. O, BMT Təhlükəsizlik Şurasının qeyri-daimi üzvü seçiləcəyi təqdirdə terrorizmə və onun ideoloji aspektlərinə qarşı mübarizənin Misirin əsas prioritetlərindən biri olacağını vurğulayıb.
Elmar Məmmədyarov Ermənistan-Azərbaycan münaqişəsinin həlli prosesində beynəlxalq hüququn norma və prinsipləri əsasında Azərbaycanın ədalətli mövqeyinə verdiyi dəstəyə görə təşəkkürünü ifadə edib. O, dövlətlərin beynəlxalq səviyyədə tanınmış sərhədlərinin dəyişdirilməsi cəhdlərinin qəbuledilməz olduğunu nəzərə çatdırıb. Ermənistanın Azərbaycana qarşı işğal və təcavüzünü pərdələmək üçün münaqişəyə dini çalarlar verməkdən belə çəkinmədiyini deyən nazir Azərbaycanın nümunəvi multikulturalizm, mədəniyyətlər və dinlərarası dialoq təcrübəsinin olduğunu qeyd edib. Mötədil İslam mədəniyyətinə malik ölkələr kimi, Azərbaycanın və Misirin islamofobiya meyillərinə qarşı mübarizəsinin vacibliyini bildirib.
Elmar Məmmədyarov BMT Təhlükəsizlik Şurasının 2012-2013-cü illər üzrə qeyri-daimi üzvü olduğu dövrdə terrorizmə qarşı mübarizənin Azərbaycanın da prioritetlərindən biri olduğunu deyib. Nazir Azərbaycanın terrorizmdən əziyyət çəkən ölkə olduğunu və Ermənistan tərəfindən Azərbaycanın nəqliyyat infrastrukturunda və digər ictimai yerlərdə 30-dan artıq müxtəlif terror aktının törədildiyini, minlərlə günahsız insanın bu terror aktlarının qurbanı olduğunu vurğulayıb.
Xarici siyasət idarəsinin rəhbəri Azərbaycanın BMT Təhlükəsizlik Şurasının qeyri-daimi üzvü olduğu zaman qurumun və İslam Əməkdaşlıq Təşkilatının ilk birgə iclasının keçirilməsinin təşəbbüskarı olduğunu xatırladaraq, bu mexanizmin davam etdirilməsinin əhəmiyyətli olduğunu deyib.
Nazir BMT Təhlükəsizlik Şurasına seçkilərdə Misirə uğurlar arzu edib.
Bölmənin digər xəbərləri
