Azərbaycan Ordusu - Zəfərin və suverenliyin simvolu
Bakı, 24 iyun, AZƏRTAC
Müzəffər Ali Baş Komandanın rəhbərliyi ilə 26 İyun – Silahlı Qüvvələr Günü təkcə hərbi bayram deyil, eyni zamanda, dövlətçilik tariximizin, milli təhlükəsizlik strategiyamızın və müstəqilliyimizin möhkəmləndirilməsi istiqamətində əldə olunmuş nailiyyətlərin təntənəsidir.
Bu fikirləri AZƏRTAC-a açıqlamasında Milli Məclisin deputatı Mehriban Vəliyeva bildirib.
Deputat qeyd edib ki, bu tarix Azərbaycan Ordusunun keçdiyi şərəfli inkişaf yolunu, dövlətimizin müdafiə potensialının gücləndirilməsi istiqamətində həyata keçirilən ardıcıl siyasətin nəticələrini və xalq–ordu birliyinin gücünü özündə əks etdirir.
Onun sözlərinə görə, Ulu Öndər Heydər Əliyevin müəyyən etdiyi milli dövlət quruculuğu strategiyasında ordu məsələsi hər zaman xüsusi yer tutub: “Ümummilli Liderin rəhbərliyi dövründə milli hərbi kadrların hazırlanması strateji vəzifə kimi müəyyənləşdirilib, 1971-ci ildə Cəmşid Naxçıvanski adına hərbi məktəbin yaradılması və azərbaycanlı gənclərin keçmiş SSRİ-nin nüfuzlu hərbi təhsil müəssisələrinə göndərilməsi gələcək müstəqil Azərbaycanın peşəkar zabit korpusunun formalaşmasına xidmət edib. Müstəqilliyin ilk illərində ölkənin üzləşdiyi əsas problemlərdən biri nizami ordunun olmaması və müxtəlif silahlı dəstələrin fəaliyyət göstərməsi idi. 1993-cü ildə xalqın təkidli tələbi ilə hakimiyyətə qayıdan Ulu Öndər Heydər Əliyev ölkədə siyasi sabitliyi təmin etməklə yanaşı, peşəkar və vahid komandanlığa tabe olan Milli Ordunun formalaşdırılmasına başladı. Məhz həmin dövrdən etibarən Azərbaycan Silahlı Qüvvələri keyfiyyətcə yeni inkişaf mərhələsinə qədəm qoydu”.
M.Vəliyeva bildirib ki, 1994-cü ildə atəşkəsin əldə olunması ordunun struktur baxımından möhkəmləndirilməsi, maddi-texniki bazasının gücləndirilməsi və döyüş hazırlığının yüksəldilməsi üçün əlverişli şərait yaratdı. NATO ilə əməkdaşlıq proqramlarına qoşulma, beynəlxalq sülhməramlı əməliyyatlarda iştirak və hərbi təhsil sisteminin inkişafı Azərbaycan Ordusunun müasir standartlara uyğunlaşdırılmasında mühüm rol oynadı.
Deputat qeyd edib ki, Ulu Öndər Heydər Əliyevin 1998-ci il 22 may tarixli Fərmanı ilə iyunun 26-sının Silahlı Qüvvələr Günü elan olunması ordu quruculuğuna verilən yüksək dövlət qiymətinin ifadəsi oldu. Prezident, Silahlı Qüvvələrin Ali Baş Komandanı İlham Əliyevin rəhbərliyi ilə ordu quruculuğu siyasəti yeni mərhələyə yüksəlib. Dövlət başçısının həyata keçirdiyi məqsədyönlü siyasət nəticəsində Silahlı Qüvvələrin maddi-texniki təchizatı əsaslı şəkildə yenilənib, hərbi büdcə dəfələrlə artırılıb, ən müasir silah və texnologiyalar arsenalımıza daxil edilib. Nəticədə Azərbaycan Ordusu regionun ən güclü hərbi qüvvələrindən birinə çevrilib.
“Azərbaycan Ordusunun gücü real döyüş meydanlarında öz təsdiqini tapıb. 2016-cı ilin Aprel döyüşləri və 2018-ci ilin Günnüt əməliyyatı Silahlı Qüvvələrimizin yüksək döyüş hazırlığını nümayiş etdirib. 2020-ci ilin 44 günlük Vətən müharibəsində isə Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusu işğal altındakı torpaqları azad edərək tarixi ədaləti və ölkənin ərazi bütövlüyünü bərpa edib. 2023-cü ilin sentyabr ayında həyata keçirilən lokal xarakterli antiterror tədbirləri nəticəsində Azərbaycanın dövlət suverenliyi ölkənin bütün ərazisində tam təmin olunub. Cəmi bir gün davam edən əməliyyat Azərbaycan Ordusunun çevikliyini, peşəkarlığını və müasir döyüş imkanlarını bir daha nümayiş etdirib”, - deyə o əlavə edib.
M.Vəliyeva vurğulayıb ki, bu gün Azərbaycan Ordusu yalnız regionun deyil, Avrasiyanın ən müasir və peşəkar Silahlı Qüvvələrindən biri hesab olunur. Komando birliklərinin yaradılması, Milli Müdafiə Universitetinin fəaliyyətə başlaması, Türkiyə Silahlı Qüvvələrinin təcrübəsinə uyğun struktur islahatlarının həyata keçirilməsi ordunun gələcək inkişafının əsas istiqamətlərini müəyyən edir. Müdafiə sənayesinin inkişafı da milli təhlükəsizlik sisteminin mühüm komponentinə çevrilib. Yerli hərbi sənaye müəssisələrində istehsal olunan müasir silah və texnika ölkənin müdafiə imkanlarını genişləndirməklə yanaşı, strateji müstəqilliyi də gücləndirir. Hərbi qulluqçuların sosial müdafiəsinin gücləndirilməsi, mənzil təminatı, əməkhaqlarının artırılması və sosial təminat mexanizmlərinin təkmilləşdirilməsi dövlətin hərbçilərə göstərdiyi xüsusi diqqət və qayğının göstəricisidir.
Sonda M.Vəliyeva vurğulayıb ki, Müzəffər Ali Baş Komandanın rəhbərliyi ilə Azərbaycan Ordusu bundan sonra da dövlətimizin təhlükəsizliyinin, xalqımızın rifahının və milli maraqlarının etibarlı təminatçısı olaraq qalacaq. Güclü dövlətin güclü ordusu var və bu gün həmin ordu Azərbaycanın qürur mənbəyidir.
Bölmənin digər xəbərləri
