AZƏRBAYCAN PREZİDENTİ İLHAM ƏLİYEV BOLQARISTANIN ÖLKƏMİZDƏKİ MÜVƏQQƏTİ İŞLƏR VƏKİLİNİ QƏBUL ETMİŞDİR
Qəbula görə səmimi minnətdarlığını bildirən müvəqqəti işlər vəkili Palçev Azərbaycanın dövlət başçısı İlham Əliyevə Prezident Heydər Əliyevin vəfatı ilə əlaqədar bir daha başsağlığı vermiş və bildirmişdir ki, bu görkəmli siyasi və dövlət xadimini Bolqarıstanda ötən əsrin 70-ci illərindən tanıyırlar. Lakin Azərbaycan Respublikasının Prezidenti Heydər Əliyevin Bolqarıstana 1995-ci ildəki səfəri, bu səfər çərçivəsində aparılmış danışıqlar nəticəsində Azərbaycan-Bolqarıstan münasibətləri yeni inkişaf mərhələsinə qədəm qoymuş, dostluq münasibətləri səviyyəsinə qalxmışdır.
Ölkələrimizin bir sıra məsələlərdə maraqlarının üst-üstə düşdüyünü qeyd edən bolqarıstanlı diplomat Avropa və Avroatlantika strukturlarına inteqrasiya sahəsində siyasi əməkdaşlıq üçün geniş imkanların olduğunu bildirmişdir. O, Dağlıq Qarabağ probleminin tezliklə ədalətli həllinə Bolqarıstanın tərəfdar olduğunu, Azərbaycanın münaqişənin sülh yolu ilə nizamlanmasına yönəlmiş səylərini dəstəklədiyini vurğulamışdır.
Bu ilin birinci yarısında Bolqarıstanın ATƏT-ə sədrlik edəcəyini bildirən diplomat demişdir ki, onun ölkəsi regionun ağrılı problemi olan Ermənistan-Azərbaycan, Dağlıq Qarabağ probleminin danışıqlar vasitəsilə, beynəlxalq hüquq normaları və prinsiplərinə uyğun həlli üçün səylərini əsirgəməyəcəkdir.
İqtisadi və mədəni əlaqələrdən söhbət açan müvəqqəti işlər vəkili bildirmişdir ki, cari il ərzində Azərbaycan-Bolqarıstan hökumətlərarası komissiyasının iclası, Bolqarıstanda Azərbaycan mədəniyyəti günləri, Azərbaycanda isə Bolqarıstan mədəniyyəti günləri keçiriləcəkdir.
Prezident İlham Əliyev ölkələrimizin münasibətlərindən razılığını bildirərək, Azərbaycanla Bolqarıstan arasında siyasi münasibətləri daha yüksək səviyyəyə qaldırmağın və bu istiqamətdə dialoqun davam etdirilməsinin vacibliyini qeyd etmişdir. Bolqarıstanın müdafiə nazirinin Bakıya səfərini xatırlayan ölkə başçısı, yüksək səviyyəli hökumət və parlament nümayəndə heyətlərinin səfərlərinin tez-tez həyata keçiriləcəyinə əminliyini söyləmişdir.
Prezident İlham Əliyev ümidvar olduğunu bildirmişdir ki, Bolqarıstan ATƏT-in fəaliyyətdə olan sədri kimi, Ermənistan-Azərbaycan, Dağlıq Qarabağ münaqişəsinin həllinə konkret töhfəsini verəcəkdir.
Sonda müvəqqəti işlər vəkili İvan Palçev Azərbaycan Respublikasının Prezidenti İlham Əliyevə qəbula görə bir daha səmimi minnətdarlığını bildirmişdir.
Azərbaycan Respublikası Prezidentinin,
mətbuat xidməti.
Bölmənin digər xəbərləri
