Azərbaycan Prezidentinin andiçmə mərasimindəki nitqi konseptual xarakterli yol xəritəsidir ŞƏRH
Bakı, 15 fevral, AZƏRTAC
Azərbaycan Respublikasının ərazi bütövlüyü bərpa edildikdən və suverenliyi bütün ölkə ərazisində təmin olunduqdan sonra keçirilən ilk inauqurasiya mərasimi müasir tariximizin ən mühüm siyasi hadisələrindəndir. İlham Əliyevin fevralın 14-də Milli Məclisdə təşkil olunmuş andiçmə mərasimindəki nitqi qarşıdakı 7 ildə dövlətimizin bütün istiqamətlər üzrə prioritetlərinin dəqiq müəyyən olunduğu konseptual xarakterli yol xəritəsidir.
Bunu AZƏRTAC-a açıqlamasında “Demokratik Azərbaycan Naminə” İctimai Birliyin (DANİB) sədri Elməddin Behbud söyləyib.
“Prezident İlham Əliyevin dövlətimizin daxili və xarici siyasətindəki hədəfləri aydın göstərən çıxışının ana leytmotivini gözlənildiyi kimi 44 günlük Vətən müharibəsi nəticəsində ərazi bütövlüyümüzün bərpası, suverenliyimizin ölkənin bütün ərazisində təmin edilməsi, ordu quruculuğu, dayanıqlı sülhün və təhlükəsizliyin formalaşdırılması üçün yeganə qarantorun silahlı qüvvələrimizin olması təşkil etdi. Prezident antiterror tədbirləri nəticəsində Azərbaycan ərazisində separatizmin kökünün kəsilməsini çoxəsrlik tariximizdə xüsusi yerə malik tarixi hadisə adlandırması bir daha müasiri olduğumuz tarixi proseslərin nə qədər dərin siyasi və hərbi əhəmiyyət daşıdığını göstərir”, - deyə Elməddin Behbud bildirib.
O qeyd edib ki, dövlətimizin başçısının inauqurasiya mərasimindəki çıxışında ən mühüm vurğulardan biri də gənc nəslin milli ruhda tərbiyəsi və beləliklə şəhidlərimizin qanı bahasına əldə olunan tarixi nailiyyətlərin gələcəkdə də qorunması üçün hər bir ailənin qarşısında mühüm vəzifənin durması ilə bağlı bildirdikləridir. Prezident İlham Əliyevin “Biz elə bir gənc nəsil yetişdirməliyik ki, onlar da daim bizim kimi milli ənənələrə, milli-mənəvi dəyərlərə sadiq olsunlar, onların beyinləri saf olsun. Heç kim onların beyinlərini zəhərləmək istəyəndə uğura nail olmasın və burada, əlbəttə ki, ilk növbədə, ailə tərbiyəsi ön plana çıxır” fikri hesab edirəm ki, müvafiq dövlət qurumları və vətəndaş cəmiyyəti institutlarının üzərinə düşən sosial və ictimai missiyanı tamlıqla və dolğun şəkildə, həmçinin yeni çağırışlara adekvat səviyyədə həyata keçirə bilmək üçün yenidən səfərbər olmağa vadar etməlidir.
“Azərbaycan dövlətinin xarici siyasət kursunda ən önəmli istiqamətlərdən biri olan Türk dünyası ailəsinin inteqrasiyasının gücləndirilməsinin bundan sonra da prioritet olaraq qalacağı çox sevindiricidir. Çünki Prezident İlham Əliyevin öz təbirincə desək “Bizim başqa ailəmiz yoxdur. Bizim ailəmiz Türk dünyasıdır”.
Ölkə Prezidentinin andiçmə mərasimindəki çıxışı ümumilikdə geosiyasi toqquşmaların Üçüncü Dünya müharibəsinə gətirib çıxardığı hazırkı gərgin dövrdə ideoloji işin, milli həmrəyliyin, silahlı qüvvələrimizin və iqtisadiyyatın daha da gücləndirilməsi, ailə dəyərlərinin, milli ənənələrin qorunması vasitəsilə Azərbaycan Respublikasının öz təhlükəsizliyini təmin etməyə qadir olduğunu və beynəlxalq münasibətlər sistemində özünəməxsus yerə malik aktor kimi bundan sonra nüfuzunu və imkanlarını artıracağını göstərir”, - deyə Elməddin Behbud vurğulayıb.
Bölmənin digər xəbərləri
