Azərbaycan səfiri Yaponiya qəzetinə müsahibəsində ölkəmizin uğurlarından danışıb
Tokio, 10 fevral, AZƏRTAC
Azərbaycanın Yaponiyadakı səfiri Gürsel İsmayılzadə Tokioda 500 min tirajla nəşr olunan “Fuji Sankei Business” qəzetinə müsahibə verib. Müsahibə Azərbaycanın bu günü və sabahı, dövlətçilik tarixi, inkişafı, siyasi, iqtisadi həyatı, xüsusilə ölkəmizdə yapon iş adamlarını maraqlandıran işgüzar mühit, eləcə də iqtisadiyyatın müxtəlif sahələrində perspektivlər kimi mövzuları əhatə edib.
Səfir qəzetin müxbirləri ilə yanaşı, “World Investors TV” internet televiziyasının prodüseri, son illər səfirliyin dəstəyi ilə Azərbaycana bir sıra ticarət missiyaları həyata keçirmiş və ölkəmiz haqqında Yaponiyada ilk bələdçi kitabın müəllifi Kazuyasu İşidanın mövzu ilə bağlı suallarını da cavablandırıb. Müsahibə zamanı K.İşidanın “Yaponların tanımadığı sürətlə inkişaf edən ölkə - Azərbaycan” kitabı ilə bağlı maraqlı məqamlar da açıqlanıb.
XX əsrin əvvəllərində mövcud olmuş Azərbaycan Xalq Cümhuriyyətinin keçdiyi tarixi yol haqqında məlumat verən səfir bildirib ki, müsəlman Şərqində ilk demokratik respublika məhz Azərbaycanda yaranıb. Müstəqilliyini bərpa etdikdən sonra müasir Azərbaycan dövlətinin formalaşmasında ümummilli lider Heydər Əliyevin əvəzsiz xidmətlərini vurğulayan diplomat son illər Prezident İlham Əliyevin rəhbərliyi ilə aparılan sürətli inkişaf və modernləşdirmə xətti nəticəsində ölkəmizin regionun lider dövlətinə çevrildiyini bildirib.
G.İsmayılzadə qeyd edib ki, həyata keçirdiyi qlobal enerji layihələri, nəqliyyat dəhlizlərinin kəsişdiyi regionda yerləşməsi Azərbaycanın geostrateji əhəmiyyətini artırır. Azərbaycanın məhz belə bir mövqedə yerləşməsi ölkə rəhbərliyinin balanslı xarici siyasət yürütməsinə geniş imkanlar açır. Son illər ərzində Azərbaycanın “soft power”ə (“yumşaq güc”ə) çevrildiyi, bu xüsusda Yaponiya ilə oxşarlığı qeyd edilib. Azərbaycanın bir sıra beynəlxalq tədbirlərə ev sahibliyi etdiyi, ölkədə təhsil, mədəniyyət, sosial və digər sahələrə daha çox diqqət və qayğının göstərildiyi vurğulanıb. Məhz bu cəhətlərinə görə Azərbaycanın həm beynəlxalq aləmdə yaxşı tanındığı, həm də sülhsevər ölkə, tolerant tərəfdaş nümunəsinə çevrildiyi qeyd olunub. Bu baxımdan bu il ilk Avropa Oyunlarının, 2016-cı ildə “Formula-1” yarışlarının, 2020-ci ildə futbol üzrə Avropa çempionatının bır sıra oyunlarının Azərbaycanda keçirilməsi ölkəmizin inkişaf hədəflərinin bariz nümunəsidir.
Azərbaycan haqqında Yaponiyada ilk bələdçi nəşr kimi K.İşidanın kitabının əhəmiyyətini yüksək qiymətləndirən səfir bildirib ki, bu nəşr həm sadə yaponların, həm də bu Gündoğar ölkənin işgüzar dairələrinin ölkəmizə artan marağının bariz nümunəsidir.
Müsahibədə zəngin tarixi abidələri, təbii gözəlliyi ilə seçilən ölkəmizdə aparılan nəhəng infrastruktur layihələri, turizmin inkişafı ilə bağlı dövlət siyasəti barədə də geniş məlumat verilib. Müasir yapon texnologiyalarının Azərbaycana gətirilməsi və tətbiqi, iki ölkə arasında kiçik və orta sahibkarlığın təşviqi məsələlərinə də toxunulub.
Qeyd edək ki, Yaponiyanın nüfuzlu “Sankey” media qrupuna daxil olan “Fuji Sankei Business” qəzeti işgüzar dairələrdə ən populyar gündəlik nəşrdir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
