Azərbaycan Texniki Universitetində turizm sənayesinin inkişafı ilə bağlı TEMPUS layihəsinin təqdimatı olmuşdur
Bakı, 23 may (AZƏRTAC). Mayın 23-də Azərbaycan Texniki Universitetində (AzTU) “Gürcüstan, Azərbaycan və Moldovada turizm sənayesinin inkişafı üçün mehmanxana işinin menecmenti üzrə bakalavr-magistr hazırlığı” mövzusunda TEMPUS layihəsinin təqdimatı keçirilmişdir.
AZƏRTAC xəbər verir ki, tədbirdə AzTU-nun rektoru, professor Havar Məmmədov layihənin əhəmiyyətindən, Azərbaycanda turizm sənayesinin sürətli inkişafından danışmış, layihənin bu sahədə ixtisaslı kadrların hazırlanmasına şərait yaradacağına əminliyini bildirmişdir.
Rektor vurğulamışdır ki, AzTU-nun regional əlaqələndiricisi olduğu “Gürcüstan, Azərbaycan və Moldovada turizm sənayesinin inkişafı üçün mehmanxana işinin menecmenti üzrə bakalavr-magistr hazırlığı” adlı TEMPUS layihəsinin yerinə yetirilməsinə 2014-cü ilin fevralından başlanılmışdır. Turizmin regional birgə layihələrin prioritetləri sırasına daxil edilməsi, son illərdə ölkəmizdə, dünyada turizmin və turizm təhsilinin əhəmiyyətinin durmadan artması, Azərbaycanda turizmin qeyri-neft sektorunun aparıcı sahələrindən biri olaraq peşəkar kadrlara ehtiyacının qabarıq şəkildə ortaya çıxması layihəyə olan marağı artırır.
Qeyd olunmuşdur ki, Fransanın Qrenobl Akademiyasının koordinatorluğu ilə yerinə yetirilən bu regional layihədə üç ölkənin hər birindən səkkiz tərəfdaşın iştirakı nəzərdə tutulur. Layihənin regional və beynəlxalq tərəfdaşları Qrenobl Akademiyası tərəfindən müəyyənləşdirilmişdir. Avropa İttifaqı çərçivəsində layihədə Fransa, İspaniya, Portuqaliya və Rumıniyanın 10-dan artıq universiteti iştirak edir. Layihənin ilkin təqdimatı fevralın 10-11-də Brüsseldə keçirilmişdir.
H.Məmmədov layihənin uğurla həyata keçiriləcəyinə və bütün tərəflər üçün faydalı olacağına əminliyini ifadə etmiş, iştirakçılara uğurlar arzulamışdır.
Tədbirdə Azərbaycan Turizm İnstitutunun (ATİ) rektoru, professor Cəfər Cəfərov “Azərbaycan Respublikasında turizmin müasir vəziyyəti və inkişaf perspektivləri” mövzusunda təqdimatla çıxış etmişdir. Peşəkar kadrların hazırlanmasının vacibliyini vurğulayan rektor bildirmişdir ki, mövcud potensialı imkana çevirmək üçün yüksək ixtisaslı kadrlara böyük ehtiyac vardır. C.Cəfərov Prezident İlham Əliyevin Azərbaycan Turizm İnstitutunun yaradılması ilə bağlı 2005-ci il 25 avqust tarixli Fərmanının əhəmiyyətini qeyd etmiş, ölkənin turizm sənayesi üçün ixtisaslı kadrların hazırlanmasında bu ali məktəbin uğurlu fəaliyyətindən, qarşıda duran vəzifələrdən söz açmışdır.
Rəhbərlik etdiyi ali məktəbin beynəlxalq əlaqələrindən danışan rektor bildirmişdir ki, hazırda ATİ ilə dünyanın 30 ölkəsinin ali təhsil ocaqları və 34 beynəlxalq təşkilat arasında əlaqələr qurulmuş, müvafiq əməkdaşlıq müqavilələri imzalanmışdır.
C.Cəfərov layihənin öz məqsədlərinə nail olacağına, onun universitetlərarası əməkdaşlığın möhkəmləndirilməsinə, ölkəmizin turizm sənayesi üçün kadr hazırlığı işinə töhfə verəcəyinə əminliyini bildirmişdir.
Təqdimat mərasimində çıxış edən TEMPUS LMPH layihəsinin baş əlaqələndiricisi, Fransanın Qrenobl Akademiyası beynəlxalq əlaqələr şöbəsinin müdiri, riyaziyyat elmləri üzrə professor Jan Noel Paşut layihənin məqsədlərindən, qarşıya qoyulmuş vəzifələrdən danışmışdır. Bildirmişdir ki, layihənin əsas məqsədi Gürcüstan, Azərbaycan və Moldovada turizm sənayesinin inkişafı üçün mehmanxana işinin menecmenti üzrə bakalavr-magistr hazırlığını Avropada qəbul olunmuş metodikalarla həyata keçirməkdir.
Bu məqsədlə əvvəlcə hər üç ölkənin milli xüsusiyyətləri, mehmanxana işinin menecmentinə qoyulan tələblər araşdırılacaq və bunun əsasında konsepsiya hazırlanacaqdır. Daha sonra təhsil kreditləri, modullar, fənn proqramları, dərsliklər və s. yenidən işlənəcəkdir. Bütün bunlarla yanaşı tədris kontentləri, distant təhsil üçün baza, ikili diplomların verilməsi üçün lazımi şərait araşdırılacaqdır.
Jan Noel Paşut bildirmişdir ki, üç il ərzində həyata keçiriləcək layihədə 40-dan artıq tərəfdaş iştirak edir ki, bu da layihənin beynəlxalq əhəmiyyətini daha da artırır. Fransalı mütəxəssis layihə ilə bağlı Azərbaycanda keçirdiyi görüşlərdən danışmış, ölkələr və universitetlər arasında əlaqələrin genişlənməsində TEMPUS layihəsinin xüsusi rolunu diqqətə çatdırmışdır.
Sonda tədbir iştirakçılarının layihə ilə bağlı sualları cavablandırılmışdır.
Bölmənin digər xəbərləri
