Azərbaycan tolerantlığı Berlində böyük marağa səbəb olub VİDEO
Belin, 26 iyun, AZƏRTAC
Azərbaycanın Almaniyadakı səfirliyinin və Dini Qurumlarla İş üzrə Dövlət Komitəsinin təşkilatçılığı ilə iyunun 25-də Berlindəki Azərbaycan Mədəniyyət Mərkəzində “Müxtəliflikdə birlik: Azərbaycandan dinlərarası səslər dialoqda” adlı geniş tədbir keçirilib.
AZƏRTAC xəbər verir ki, tədbirdə Almaniyanın Xarici İşlər Nazirliyinin və digər dövlət orqanların yüksək vəzifəli nümayəndələri, səfirlər, Almaniyanın müxtəlif dini icmalarının rəhbərləri, tanınmış jurnalistlər, elm və mədəniyyət xadimləri və icma fəalları iştirak ediblər.
Əvvəlcə Azərbaycanda tolerantlıq və muıtikulturalizm mühitindən bəhs edən qısa film nümayiş olunub.
Azərbaycanın Almaniyadakı səfiri Nəsimi Ağayev tədbirin keçirilməsində əsas məqsədin dinlərarası dialoqun təşviqi, müxtəlif mədəniyyətlərə və dinlərə mənsub insanlar arasında qarşılıqlı anlayış, tolerantlığın gücləndirilməsi olduğunu bildirib. Azərbaycanda etnik və dini rəngarəngliyin qorunmasına yönələn, uğurla həyata keçirilən dövlət siyasətinin multikulturalizm və tolerantlıq sahəsində əsrlər boyu formalaşmış tarixi ənənənin daha da möhkəmlənməsinə yol açdığını qeyd edib.
Dini Qurumlarla İş üzrə Dövlət Komitəsinin sədri Ramin Məmmədov bildirib ki, dünyəvi və multikultural bir ölkə kimi Azərbaycan dinlərarası dialoqa böyük diqqətlə yanaşır. Prezident İlham Əliyevin rəhbərliyi ilə dövlət dini azadlıqların qorunmasını və multikultural dəyərlərin təşviqini daxili siyasətin və beynəlxalq əlaqələrin əsas elementlərindən biri kimi qəbul edir. Dövlət yalnız dini azadlıqları təmin etməklə və dinlərarası dialoqu təşviq etməklə kifayətlənmir, eyni zamanda, müxtəlif konfessiyaların irsinin qorunmasına da qayğı göstərir.
ABŞ-dakı nüfuzlu Simon Vizental Mərkəzinin sədr müavini ravvin Abraham Kuper müxtəlif dövrlərdə Azərbaycana səfərləri zamanı ölkəmizdə qədim və zəngin tolerantlıq mühitinin və multukultural ənənələrin şahidi olduğunu qeyd edib. Ölkəmizdə digər dini icmalar kimi yəhudi icmasına da yüksək diqqət və qayğı göstərildiyini vurğulayan A.Kuper Azərbaycanın dini tolerantlıq modelinin bütün dünyada geniş təbliğ olunmasının vacibliyini qeyd edib.
Çıxışlardan sonra Sonuncu Gün Müqəddəsləri İsa Məsih Kilsəsinin Avropa üzrə direktor müavini Ralf Qrünkenin moderatorluğu ilə panel müzakirə keçirilib. Müzakirədə Azərbaycan şiə icmasının imamı Rüfət Qarayev, sünni icmasının imamı Hafiz Abbasov, Azərbaycan İlahiyyat İnstitutunun İlahiyyat fakültəsinin dekanı Elnurə Əzizova, Sefard yəhudilərinin dini icmasının baş ravvini Zamir İsayev, Avropa yəhudiləri dini icmasının baş ravvini Şneor Seqal və Alban-udi xristian dini icmasının sədri Robert Mobili ölkəmizin zəngin tolerantlıq ənənələrindən geniş danışıblar.
Tədbirdə Azərbaycan dağ yəhudiləri dini icmasının sədri Milix Yevdayevin ölkəmizin multikulturalizm ənənələrinin təbliğində fəal rolu da xüsusi qeyd olunub.
Azərbaycanın unikal tolerantlıq modeli böyük maraq və rəğbətə səbəb olub.
Müzakirələrdən sonra möhtəşəm konsert proqramı təqdim olunub. Müsəlman, xristian və yəhudi musiqiçilərdən ibarət “Əcəm” quartetinin konserti tədbir iştirakçıları tərəfindən sürəkli alqışlarla qarşılanıb.
Xatırladaq ki, Dini Qurumlarla İş üzrə Dövlət Komitəsinin sədri Ramin Məmmədovun rəhbərlik etdiyi nümayəndə heyəti iyunun 24-25-də Almaniyaya səfəri çərçivəsində Bundestaqın Xarici siyasət Komitəsinin sədri Armin Laşet, Bundestaqın digər üzvləri və Almaniya Federal Hökumətinin dini azadlıq üzrə komissarı Tomas Raxel ilə görüşlər keçirib.
Nümayəndə heyəti, həmçinin Almaniya Müsəlmanları Mərkəzi Şurasının sədri Abdassamad El-Yezidi, Almaniya Yəhudiləri Mərkəzi Şurasının icraçı direktoru Daniel Botman ilə görüşüb, Almaniyadakı Süryani Pravoslav Kilsəsini, Şəhitlik Məscidini və Sonuncu Gün Müqəddəsləri İsa Məsih Kilsəsini ziyarət edib.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
