Azərbaycan və İtaliya alimləri Abşeronda geodinamik vəziyyətə dair birgə tədqiqat aparmağı planlaşdırırlar
Bakı, 4 iyul (AZƏRTAC). Azərbaycan və İtaliya alimləri Abşeronda geodinamik proseslər və seysmik təhlükələrlə bağlı birgə tədqiqat aparacaqlar.
Azərbaycan Milli Elmlər Akademiyasının (AMEA) mətbuat xidmətindən AZƏRTAC-a bildirmişlər ki, bununla əlaqədar İtaliyanın Milli Tədqiqat Şurasının Ətraf Mühitin Təhlili üzrə Metodologiya İnstitutunun departament rəhbəri, professor Luçiano Selesta Azərbaycana gəlmişdir.
İtaliyalı qonaq AMEA-nın Geologiya İnstitutunun direktoru, akademik Akif Əlizadə və digər alimlərlə görüşmüşdür. Görüşdə iki elmi müəssisə arasında əməkdaşlıq imkanları müzakirə edilmişdir.
AMEA-nın Geologiya İnstitutunun geodinamika və seysmologiya şöbəsinin rəhbəri, professor Fəxrəddin Qədirov və geologiya-mineralogiya elmləri namizədi Qulam Babayev italiyalı mütəxəssisə institutda aparılmış müvafiq tədqiqatların nəticələri haqqında ətraflı məlumat vermişlər. Eyni zamanda, Abşeron yarımadasında seysmik təhlükənin qiymətləndirilməsi, seysmik monitorinqin üsulları, GPS (kosmik yertəyinetmə sistemi) tədqiqatların nəticələri müzakirə olunmuşdur.
L.Selesta institutda aparılan tədqiqatları yüksək qiymətləndirmiş və bu işlərin birgə davam etdirilməsini məqsədəuyğun hesab etmişdir.
İtaliyalı alim iyulun 7-dək azərbaycanlı həmkarlarının təcrübəsi ilə daha yaxından tanış olacaq və çöl tədqiqatlarında iştirak edəcəkdir.
Bölmənin digər xəbərləri
