Azərbaycan və yəhudi diaspor təşkilatları arasında əməkdaşlıq əlaqələri inkişaf etdirilir
Bakı, 18 iyul (AZƏRTAC). Diasporla İş üzrə Dövlət Komitəsinin (DİDK) sədri Nazim İbrahimov Bakıda səfərdə olan ABŞ-ın Kaliforniya ştatında tanınmış ictimai xadim, yəhudi mənşəli Şeron Nəzəryan ilə görüşmüşdür.
DİDK-dən AZƏRTAC-a bildirmişlər ki, komitə sədri “Y&S” Nəzəryan Ailə Fondunun rəhbəri, ABŞ-ın tanınmış “RAND Corporation” beyin mərkəzinin məşvərət şurasının üzvü, Kaliforniya Universitetinin professoru Ş.Nəzəryana rəhbərlik etdiyi qurumun fəaliyyəti haqqında məlumat vermişdir.
Azərbaycan və yəhudi diaspor təşkilatları arasında mövcud əməkdaşlığa toxunan Nazim İbrahimov onun daha da inkişaf etdirilməsinin vacibliyini vurğulamışdır.
Ş.Nəzəryan isə öz növbəsində rəhbərlik etdiyi Y&S Nəzəryan Ailə Fondu və Diasporla İş üzrə Dövlət Komitəsi arasında əməkdaşlığa başlanmasının təklif etmişdir. Kaliforniya Universitetinin professoru bu əməkdaşlığın gələcəkdə Azərbaycan-yəhudi diaspor təşkilatları arasında əlaqələrin daha da güclənməsinə öz töhfəsini verəcəyini demişdir. Qonaq iki qurum arasında əməkdaşlığın başlanğıcı olaraq N.İbrahimova ABŞ-ın tanınmış Kaliforniya Universitetində diaspor siyasəti mövzusunda məruzə ilə çıxış etməyi təklif etmişdir.
N.İbrahimov qonağın təklifini müsbət qarşılayaraq, rəhbərlik etdiyi qurumun belə bir əməkdaşlığa həmişə hazır olduğunu bildirmişdir. Dövlət Komitəsinin sədri erməni lobbisinin güclü olduğu Kaliforniyada Fond ilə əlaqələrin qurulmasının müsbət nəticələr verəcəyinə ümidvar olduğunu vurğulamışdır.
Komitə sədri demişdir ki, bu əməkdaşlıq bölgədə Azərbaycan icmalarının fəallığının artmasında, eləcə də erməni lobbisi tərəfindən aparılan təbliğat işlərinin qarşısının alınmasında mühüm rol oynayacaqdır.
Şeron Nəzəryanın ailəsi İran inqilabı zamanı Amerika Birləşmiş Ştatlarına mühacirət etmiş və onlar ABŞ-ın İran yəhudiləri icmasının aparıcı simalarındandır. Ailənin nümayəndələri Yunis və Pərviz Nəzəryan qardaşları Azərbaycanın yaxın dostları sayılır. Ş.Nəzəryanın rəhbərlik etdiyi və atası ilə anasının adını daşıyan (Yunis və Sürəyya) Fond isə 2000-ci ildə yaradılmışdır. Fond əsasən humanitar sahələrdə, o cümlədən təhsil, mədəniyyət və incəsənət, eləcə də ictimai siyasət, enerji sahələrində olan tədqiqatların maliyyələşdirilməsini həyata keçirir.
Ş.Nəzəryan Bakıya səfəri çərçivəsində bir sıra dövlət qurumlarında görüşlər keçirmiş, həmçinin yəhudi icmasının nümayəndələri ilə görüşmüş və Qubadakı Qırmızı Qəsəbəyə baş çəkmişdir.
Bölmənin digər xəbərləri
