Azərbaycan xalqının iradəsi və milli birliyi sarsılmazdır ŞƏRH
Bakı, 26 sentyabr, AZƏRTAC
27 Sentyabr müasir tariximizin şərəf və qəhrəmanlıqla yazılmış səhifələrindən biri olan Vətən müharibəsinin başlanmasının 5-ci ildönümüdür. Bu tarix yalnız savaşın başlanğıcı deyil, Azərbaycanın ərazi bütövlüyü və suverenliyi uğrunda milli iradəsinin təntənəsidir. Beş il öncə Azərbaycan xalqı bir yumruq kimi birləşərək, işğal altında olan torpaqlarımızı azad etmək naminə mübarizəyə qalxdı. Müzəffər Ali Baş Komandan, Prezident İlham Əliyevin rəhbərliyi, rəşadətli Ordumuzun şücaəti və xalqımızın sarsılmaz birliyi sayəsində 44 gün ərzində tarix yazıldı.
Bu fikirləri AZƏRTAC-a açıqlamasında Milli Məclisin deputatı Fatma Yıldırım deyib.
O qeyd edib ki, bu Qələbə təkcə torpaqların azad olunması deyil, eyni zamanda, tarixi ədalətin bərpası, milli ləyaqətin dirçəlişi, beynəlxalq hüququn zəfəri idi. Anım Günü bizə həm də bu mübarizəni unutmağa qoymayan bir ümumxalq yaddaş çağırışıdır.
“Anım Günü, həmçinin həm qürur, həm də ehtiram günüdür. Qürurluyuq, çünki biz işğal altında olan torpaqlarımızı öz gücümüz, birliyimiz və haqq savaşımızla azad etdik. Ehtiramlıyıq, çünki bu Zəfərin memarı olan şəhidlərimizi və qazilərimizi dərin minnətlə yad edirik. Çünki biz o müqəddəs canların bahasına 30 illik işğala son qoyduq. Təkcə torpaqlarımızı deyil, eyni zamanda, ləyaqətimizi, milli kimliyimizi, tarixi ədaləti bərpa etdik.
Artıq Qarabağda yeni həyat başlayıb. İnfrastruktur qurulur, yollar çəkilir, məktəblər, xəstəxanalar, mədəniyyət ocaqları inşa olunur. Prezident İlham Əliyevin siyasi iradəsi və dövlətimizin strateji baxışı sayəsində "Böyük Qayıdış" reallığa çevrilməkdədir. Artıq azad edilmiş torpaqlarda Azərbaycan Bayrağı dalğalanır, o torpaqlar yeni həyatla nəfəs alır”, - deyə deputat diqqətə çatdırıb.
Onun fikrincə, eyni zamanda, biz bu günü qeyd edərkən Ermənistanla sülh prosesinə də aydın baxışla yanaşmalıyıq. Əldə olunmuş reallıqlar fonunda Ermənistan konstitusiyasının dəyişdirilməsi qonşuluq münasibətlərinə və beynəlxalq hüquqa hörmət prinsipləri əsasında bölgədə davamlı sülhə aparan vacib addımlardan biridir. Azərbaycanın mövqeyi açıq və prinsipialdır: regionda dayanıqlı sülh yalnız qarşılıqlı tanınma və ədalətə əsaslana bilər.
“Azərbaycan xalqının iradəsi, ruhu və milli birliyi sarsılmazdır. Bu birlik bizim ən güclü silahımızdır və gələcəkdə dövlətimizi daha da gücləndirəcək əsas amildir”, - deyə Fatma Yıldırım vurğulayıb.
Bölmənin digər xəbərləri
