“Azərbaycançılıq institutu” Kiyevdəki bir sıra məktəblərdə Azərbaycan siniflərinə uğurla hamilik edir
Kiyev, 5 oktyabr (AZƏRTAC). Sahibkar və mesenat, sərbəst güləş üzrə Azərbaycanın Əməkdar İdman Ustası və Azərbaycanın Əməkdar Məşqçisi Oleq Krapivinin rəhbərlik etdiyi “Azərbaycançılıq institutu” beynəlxalq ictimai təşkilatı (BİT) artıq neçə ildir ki, Ukrayna paytaxtındakı 37, 188, 247 və 291 nömrəli məktəblərdə Azərbaycan siniflərinə maddi dəstək verir. İnstitut müəllimlərə məvacib ödəyir, sinifləri fərdi kompyuterlər və noutbuklarla təchiz edir.
Bu gün, oktyabrın 5-də Ukraynada müəllim günü qeyd edilir. Bu münasibətlə Kiyev şəhərinin Desna rayonundakı 247 nömrəli ümumtəhsil məktəbində pedaqoq Səfayə Naibovanın rəhbərliyi ilə azərbaycanlı şagirdlərin ifasında tamaşa göstərilmişdir.
Tədbirin rəsmi hissəsində Azərbaycanın Ukraynadakı səfirliyinin birinci katibi Asim Osmanov səfir Eynulla Mədətlinin adından, “Azərbaycançılıq institutu” BİT-in birinci vitse-prezidenti Seyidəli Qədiməliyev isə Oleq Krapivinin adından məktəbin direktoru Tatyana Vişnevskayanı və müəllimə Səfayə Naibovanı peşə bayramı münasibətilə təbrik etmiş, onlara çiçək dəstələri və xatirə hədiyyələri təqdim etmişlər.
S.Naibovanın həyat yoldaşı, hüquq elmləri doktoru, Ukrayna Milli Aviasiya Universitetinin beynəlxalq münasibətlər institutunun beynəlxalq hüquq kafedrasının professoru, “Xalq diplomatiyası institutu” ictimai təşkilatının idarə heyətinin sədri, Ukraynanın əməkdar təhsil işçisi Arif Quliyev də Tatyana Vişnevskayaya gül dəstəsi təqdim etmiş, özünün “Xarici əlaqələr hüququ” kitabını məktəb kitabxanasına hədiyyə etmişdir.
Sonra bayram konserti olmuşdur.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
