Azərbaycanda yeni salınacaq zooloji park dünya standartlarına tam cavab verəcəkdir
Bakı, 11 may (AZƏRTAC). Mayın 11-də Ekologiya və Təbii Sərvətlər Nazirliyində (ETSN) Bakıda salınması nəzərdə tutulan yeni zooloji parkın layihəsinin təqdimatı olmuşdur.
AZƏRTAC xəbər verir ki, mərasimdə ETSN-in bioloji müxtəlifliyin qorunması və xüsusi mühafizə olunan təbiət ərazilərinin inkişafı departamenti direktorunun müavini Hikmət Əlizadə ölkəmizdə uğurla həyata keçirilən ekoloji layihələrdən danışmışdır. Bildirmişdir ki, dinamik inkişaf yolunu tutmuş Azərbaycanda ekologiya, elm və təhsil sahəsində bir sıra layihələr reallaşdırılmışdır. Milli parkların yaradılması və zooloji parkın qurulması kimi layihələr də dünyada mötəbər bir ölkə kimi tanınan Azərbaycanın tam haqqıdır. Yeni zooloji parkın salınması ilə bağlı Azərbaycan Prezidenti İlham Əliyev 2008-ci il dekabrın 26-da Sərəncam imzalamışdır.
H.Əlizadə qeyd etmişdir ki, Azərbaycan Təbiət Aləmi Zooloji Parkında müxtəlif qitələrdən gətirilmiş 224 növdə 1518 heyvan yerləşdiriləcəkdir. Parkda hər qitəyə uyğun təbii şərait yaradılacaqdır. Zooloji parkın salınmasının layihə dizayn işlərini Türkiyə-Almaniya birgə müəssisəsi olan “Ekodenge” şirkəti həyata keçirir.
Parkda istər heyvanların saxlanılması, onlara qulluq edilməsi, istərsə də çirkab məhsulların utilizasiyası tam dünya standartlarına uyğun hazırlanacaqdır.
Daha sonra şirkətin nümayəndəsi, layihənin dizayn rəhbəri Yavuz Yöntem layihə barədə məlumat vermişdir. Bildirmişdir ki, layihə üzərində işə 2010-cu ildə başlanılmışdır. Əvvəllər parkın Abşeron rayonunun Qobu qəsəbəsi ərazisində salınması nəzərdə tutulmuşdu. Sonradan həmin ərazinin iqlimi, coğrafi şəraiti, relyefi, infrastrukturu zooloji park üçün əlverişsiz hesab olundu. Ona görə də parkın qurulması üçün Ceyranbatan qəsəbəsində Qumyataq gölü yaxınlığındakı ərazi təyin edilmişdir. Yeni zooloji parkın ərazisi 55 hektar təşkil edəcəkdir.
Qeyd edilmişdir ki, zooloji park mərhələlərlə tikiləcəkdir. Birinci mərhələdə Bakıdakı zoopark mütəxəssislər tərəfindən müvəqqəti sığınacaqlara köçürüləcəkdir. Heyvanların bölgəyə uyğunlaşması üçün reabilitasiya işləri görüləcəkdir.
Yeni zooloji parkda uşaqlara və gənclərə təbiəti sevmə və qoruma vərdişləri aşılanmaqla, həm də onların təhsil fəaliyyəti üçün şərait yaradılacaqdır.
Bölmənin digər xəbərləri
