Bakı, 20 oktyabr, AZƏRTAC

Azərbaycanda fəaliyyət göstərən xristian dini icmalarının rəhbərləri ABŞ Konqresinin üzvü Ceki Speyer (Jackie Speier) tərəfindən oktyabrın 1-də Dağlıq Qarabağ münaqişəsi ilə əlaqədar ABŞ Konqresinə təqdim olunmuş reallıqdan uzaq və yanlış səciyyəli 1165 saylı qətnamə layihəsinə qəti etiraz edərək, bununla bağlı bu ölkənin 10-a yaxın dövlət və qeyri-dövlət qurumuna (ABŞ Dövlət katibinə, ABŞ Senatının prezidentinə, ABŞ Dövlət Departamentinin Xüsusi Tapşırıqlar – Beynəlxalq Dini Azadlıq üzrə səfirinə, ABŞ Konqresinin Nümayəndələr Palatasının spikerinə, Nümayəndələr Palatasının Demokratlar üzrə rəhbərinə, Palatanın Respublikaçılar üzrə rəhbərinə, Nümayəndələr Palatasının üzvlərinə, ABŞ-ın Beynəlxalq Din Azadlığı Komissiyasına və “Xristianların müdafiəsi” təşkilatına - “In Defense of Christians” ) etiraz müraciəti ünvanlayıblar.

Dini Qurumlarla İş Üzrə Dövlət Komitəsindən AZƏRTAC-a bildiriblər ki, müraciətdə konfessiya rəhbərləri xristian dini mənsublarının ölkəmizdə əsrlərdən bəri öz dini ibadətlərini heç bir maneə olmadan həyata keçirdiyini, öz mənəvi dəyər və mədəni ənənələrini yüksək səviyyədə yaşatdıqlarını, icmaların və ibadət evlərinin Azərbaycan dövləti tərəfindən həmişə diqqət və qayğı ilə əhatə olunduğunu ifadə ediblər.

Müraciətdə əsas diqqət Ermənistanın ölkəmizə qarşı təcavüzünə yönəldilərək, erməni hərbi birləşmələrinin Azərbaycanın Dağlıq Qarabağ bölgəsini və ona bitişik 7 rayonu işğal etdiyi, bu işğal nəticəsində xristian və digər dinlərin nümayəndələri də daxil olmaqla bir milyondan çox azərbaycanlının qaçqın və məcburi köçkün taleyi yaşadığı nəzərə çatdırılıb. Qeyd edilib ki, BMT Təhlükəsizlik Şurası tərəfindən münaqişə ilə bağlı qəbul olunmuş dörd qətnamədə Ermənistan silahlı qüvvələrinin Azərbaycanın işğal altındakı torpaqlarından qeyd-şərtsiz çıxarılmasının tələb edilməsinə baxmayaraq, Ermənistan 30 ilə yaxındır ki, buna məhəl qoymur, danışıqları məqsədyönlü şəkildə pozur, dövlətimiz isə sülhpərvər siyasət aparır, danışıqlarda konstruktiv mövqe nümayiş etdirir.

İcma rəhbərləri ermənilərin sentyabrın 27-də başlatdıqları hərbi təxribat nəticəsində Azərbaycanın münaqişə zonasına aid olmayan yaşayış məntəqələrinin – Gəncə, Mingəçevir, Naftalan, Xızı, Abşeron, Goranboy, Daşkəsən, Tərtər, Bərdə, Ağdam, Ağcabədi, Yevlax, Füzuli və Beyləqan kimi şəhər və rayonların, eləcə də tarixi-dini abidələrin mütəmadi ağır artilleriya və raket atəşlərinə məruz qaldığına diqqət çəkiblər. Oktyabrın 11-də Azərbaycanın ikinci böyük şəhəri olan Gəncəyə atılmış balistik raket zərbəsi nəticəsində dördü qadın olmaqla 10 mülki şəxsin həlak olduğunu, 30-dan çoxunun yaralandığını, onlarla mülki obyekt və yaşayış binasının dağıldığını qeyd ediblər. İşğalçı Ermənistanın bu hərəkətlərini beynəlxalq hüquq normalarına və humanitar prinsiplərə, o cümlədən 1949-cu il Cenevrə konvensiyalarına əməl etməməsinin, regionda sülh və sabitliyə ciddi təhdid olaraq qalmasının bariz nümunəsi kimi qiymətləndiriblər.

Eyni zamanda, işğal altında olan ərazilərdə digər dini məbədlərlə yanaşı, xristian abidələrinin də dağıdıldığı və ya erməniləşdirildiyi halda, Azərbaycanda erməni millətinin 30 mindən çox nümayəndəsinin sərbəst yaşadığını, paytaxt Bakının mərkəzində erməni kilsəsinin dövlət tərəfindən qorunduğunu diqqətə çatdırıblar.

Müraciətin sonunda icma rəhbərləri 1165 saylı qətnamə layihəsinin qəbul edilməyəcəyinə inandıqlarını bildirərək, onunla bağlı rədd qərarının dünyada sülhün və ədalətin bərqərar olması işinə böyük töhfə verəcəyini vurğulayıblar.

Müraciəti imzalayanlar:

Rus Pravoslav Kilsəsinin Bakı və Azərbaycan Yeparxiyasının rəhbəri - Arxiyepiskop Aleksandr İşein;

Alban-Udi Xristian dini icmasının sədri - Robert Mobili;

Bakı şəhəri “Azərbaycan Bibliya Cəmiyyəti” xristian dini icmasının sədri - Rasim Xəlilov;

“Yeni Həyat” Xristian dini icmasının sədri - Lyudmila İbrahimova;

Xristian Yevangelik Lüteranların Bakı dini icmasının sədri - Vera Nesterova;

Bakı şəhəri “Alov” xristian dini icmasının sədri - İdris Məmmədov;

Bakı şəhəri “Şərqdə Ulduz” Xristian dini icmasının sədri - Roman Jmurov;

Bakı şəhəri Nəsimi rayonu “Həyatverici Lütf” xristian dini icmasının sədri - Elşən Hüseynzadə.

Bakı şəhəri Yevangelist Məsihi Baptistlərinin “Aqape” dini icmasının sədri - Samir Sadıqov;

“Vineyard Azərbaycan” xristian dini icmasının sədri - Emil Pənahov;

Bakı şəhəri Nərimanov rayonu “Yeddinci Günün Adventistləri” dini icmasının sədri - Elşən Cabbarov;

“Bakı şəhəri Yeni Apostol” xristian dini icmasının sədri - Svetlana Albertovna Stepanova;

“Həyat Sözü” Xristian dini icmasının sədri - Yusif Fərhadov;

“Həyat Sözü - 2” Sumqayıt xristian dini icmasının sədri - Elçin Paşayev;

Sumqayıt şəhəri, “Molokan ruhani-xristian” dini icmasının sədri - Matryona Ponomaryova;

“Gəncə şəhəri Yeddinci Günün Adventistləri” xristian dini icmasının sədri - Yusif Şərifov;

Qobustan r-nu Hilmilli kəndi “Molokan ruhani-xristian” dini icmasının sədri - Tsapliva Yekaterina Nikolayevna;

Qax rayonu Qaxingiloy kəndi “Müqəddəs Giorgi” kilsəsi gürcü pravoslav xristian dini icmasının sədri - Kasiaşvili İaqo Qriqoryeviç;

Qax rayonu Əlibəyli kəndi “Müqəddəs Nino” kilsəsi gürcü pravoslav xristian dini icmasının sədri - Timuri Barixaşvili;

İsmayıllı rayonu İvanovka kəndi “Molokan-ruhani-xristian” dini icmasının sədri - Sergey Vasilyeviç Kazakov.