Azərbaycanın böyük uğurları ölkə rəhbərliyinin uzaqgörən siyasəti ilə bağlıdır
Əmman, 3 dekabr, AZƏRTAC
Azərbaycan inkişaf üçün çox böyük potensiala malik olan müasir, dinamik inkişaf edən və çox gözəl ölkədir. Bakı şəxsən mənə parlaq və silinməz təəssüratlar bağışlayıb. İnkişaf səviyyəsinə və tikintilərin miqyasına görə Bakını yəqin ki, Dubay və Əbu-Dabi ilə müqayisə etmək olar. Lakin sizin ölkənin iqlimi mülayim olduğundan, məncə, Bakı daha cəlbedici, bənzərsiz və qonaqpərvər şəhərdir.
İordaniya Haşimilər Krallığının Gənclərlə İş üzrə Ali Şurasının direktoru, bu il oktyabrın 28-29-da Azərbaycan Respublikası Gənclər və İdman Nazirliyinin, BMT İnkişaf Proqramının, BMT Baş katibinin Gənclərlə İş üzrə xüsusi nümayəndəsinin ofisinin, UNESCO-nun və Avropa Şurasının dəstəyi ilə Bakıda keçirilmiş Gənclər Siyasəti üzrə Birinci Qlobal Forumun iştirakçısı Əhməd Nəvaf Raci bu sözləri AZƏRTAC-ın müxbirinə müsahibəsində söyləyib.
Onun fikrincə, Azərbaycanın böyük uğurları bilavasitə ölkənin müdrik rəhbərliyinin yürütdüyü uzaqgörən siyasətlə bağlıdır. O deyib: “Prezident İlham Əliyevin şəxsində Azərbaycanın siyasi rəhbərliyi Azərbaycan xalqının milli maraqlarını və tələbatını əsas tutaraq ölkədə bütün istiqamətlər üzrə hərtərəfli düşünülmüş və müdrik idarəçilik siyasəti yürüdür. Aşkar görünür ki, Azərbaycan hökuməti ölkənin iqtisadi inkişafı, respublikaya investisiyalar cəlb edilməsi üçün böyük səy göstərir və bu gün ölkədə əlverişli investisiya şəraiti yaradılıb. Mübaliğəsiz demək olar ki, Azərbaycan rəhbərliyi ölkənin inkişafında və çiçəklənməsində maraqlıdır. Azərbaycana ilk dəfə gələn insan başa düşür ki, bu, böyük gələcəyi olan perspektivli ölkədir”.
Əhməd Nəvaf Raci Prezident İlham Əliyevin forum iştirakçılarına müraciətini yüksək qiymətləndirib. O vurğulayıb: “Bu, bütövlükdə ölkənin siyasətini, o cümlədən gənclərlə iş sahəsində siyasəti səciyyələndirən səmimi, ifadəli və geniş əhatəli çıxış idi. Bununla bərabər, həmin çıxışda vəziyyətin dürüst dərk edilməsi, dərindən başa düşülməsi və öz ölkəsi üçün həqiqətən böyük nəticələrə nail olmaq arzusu görünürdü. Gəncliyə diqqət bu siyasətin mühüm tərkib hissəsidir. Bu onu göstərir ki, Azərbaycan perspektivli, gələcəyi aydın olan ölkədir. Biz hiss etdik ki, burada səmərəli gənclik siyasəti həyata keçirilir, gəncləri dəstəkləmək üçün milli strategiya var və onun inkişafı üçün böyük səy göstərilir. Gəncliyin hərtərəfli inkişafı dövlət siyasətinin mühüm istiqamətidirsə, deməli bu ölkənin gözəl perspektivləri var”.
Gənclərlə İş üzrə Ali Şuranın rəhbəri ölkəmizin idman nailiyyətləri və 2015-ci ildə Birinci Avropa oyunlarının Azərbaycanda keçirilməsi mövzusuna toxunaraq qeyd edib ki, Azərbaycanın idman həyatında yüksəliş müşahidə olunur, burada sanballı idman infrastrukturu, müasir standartlara cavab verən futbol stadionları və bir sıra başqa idman obyektləri yaradılıb.
Əhməd Nəvaf Raci deyib: “Biz bilirik ki, 2015-ci ildə Bakı dünyada Birinci Avropa Oyunlarına ev sahibliyi edəcək və bu, möhtəşəm hadisədir. Azərbaycanda müxtəlif idman yarışları keçirilməsi üçün hər cür imkan var və bu siyasət davam etdirilərsə, Bakı dünyanın idman paytaxtına çevrilə bilər”.
O, Azərbaycanın və İordaniyanın gənclər təşkilatları arasında qarşılıqlı əlaqələrin gələcəyi barədə söhbət açaraq bildirib ki, Bakıda keçirilən Forumda əməkdaşlığın möhkəmlənməsinin və daha sıx inteqrasiyanın təməli qoyulub. Onun fikrincə, bu münasibətləri daha praqmatik məcraya yönəltmək, daha konkret proqramlar və layihələr üzrə əməkdaşlığı fəallaşdırmaq lazımdır. O deyib: “Biz bu işdə maraqlıyıq və daha sıx qarşılıqlı fəaliyyətə hazırıq”.
Əhməd Nəvaf Raci Azərbaycanın İordaniyadakı səfirliyinin səmərəli fəaliyyətinə və iki ölkə arasında münasibətləri möhkəmlətməyə çalışdığına görə təşəkkürünü bildirib. İordaniyanın Gənclər İş üzrə Ali Şurasının direktoru deyib: “Azərbaycan bizə yaxın və dost ölkədir, tərəfdaşlıq münasibətlərimiz bundan sonra da dərinləşəcək. Bir daha vurğulamaq istəyirəm, Azərbaycandan çox xoş təəssüratlarla qayıtmışıq, ölkənizə və xalqınıza ən səmimi arzularımızı bildiririk. Sizin ölkənin rəhbərliyini və Azərbaycan xalqını səciyyələndirən qonaqpərvərliyi xüsusi qeyd etmək istəyirik, əminəm ki, Bakıda olan hər kəs məmnuniyyətlə bir də oraya qayıtmaq istərdi. Əminəm ki, sizin ölkənizi daha böyük uğurlar gözləyir”.
Asya Hacızadə
AZƏRTAC-ın xüsusi müxbiri
Əmman
Bölmənin digər xəbərləri
