İQTİSADİYYAT
AZƏRBAYCANIN KVOTASI 130 TONA ÇATDIRILMIŞDIR
Azərbaycanın Xəzərdə su bioloji ehtiyatlarının ovlanması kvotası 130 tona çatdırılmışdır. Bunun 10 tonundan elmi tədqiqat məqsədləri üçün, 25 tonundan isə qiymətli balıqyetişdirmə materialı kimi istifadə olunacaqdır. Bunu ekologiya və təbii sərvətlər naziri Hüseynqulu Bağırov dekabrın 27-də keçirilən mətbuat konfransında açıqlamışdır.
O bildirmişdir ki, bu qərar beş Xəzəryanı ölkənin təbiəti mühafizə idarələrinin təmsilçilərindən ibarət Komissiyanın dekabrın 9-11-də Bakıda keçirilən 18-ci iclasında Azərbaycan hökumətinin prinsipial mövqeyi sayəsində qəbul edilmişdir. Azərbaycan nərə balıqlarının və digər qiymətli balıq növlərinin sənaye üsulu ilə yetişdirilməsi səviyyəsinə görə bu ölkələr arasında üçüncü yer tutur. Netçalada iri balıqyetişdirmə zavodu tikintisinin başa çatdırılması, habelə Azərbaycanda təbii kürütökmə yerlərinin olması ölkəmizin kvotasını gələcəkdə də artırmağa imkan verəcəkdir.
Komissiyanın rotasiya haqqında qəbul etdiyi qaydalara uyğun olaraq, sədrlik Azərbaycandan sonra Rusiyaya keçmişdir. Ölkəmizin sədrlik etdiyi dövrdə, cari il ərzində Komissiyanın üç iclası keçirilmiş, bu strukturun mövcud olduğu 10 ildə ilk dəfə işçi qrupları yaradılmışdır.
Nazir vurğulamışdır ki, indi Komissiyanın statusunun müəyyənləşdirilməsi böyük aktuallıq kəsb edir ki, bu da Xəzər dənizinin statusunu müəyyənləşdirmək zərurəti ilə bilavasitə bağlıdır.
Mətbuat konfransında Azərbaycanda heyvandarlığın və əkinçiliyin inkişafı ilə əlaqədar otlaqlardan və biçənəklərdən səmərəli istifadə edilməsinə, dağ yamaclarında torpaqların eroziyaya uğramasının, dağətəyi və düzən rayonlarda şoranlaşmanın qarşısının alınmasına dair milli proqramın təqdimatı da keçirilmişdir. Bu proqram səhrəlaşmaya qarşı mübarizə ilə bağlı qəbul edilmiş kompleks tədbirlər proqramına uyğun olaraq yaradılmışdır. Hazırda Azərbaycan torpaqlarının yarısı səhrəlaşmaya və eroziyaya məruz qalmışdır ki, bunun da səbəbi, əsasən, antropogen xarakterli proseslərdir.
Hüseynqulu Bağırov bildirmişdir ki, əhalinin daha yaxşı məlumatlandırılması üçün nazirlik Azərbaycan Respublikasının ətraf mühitə dair qanunvericilik aktlarının toplusunu hazırlamışdır.