Azərbaycanın peşəkar futbol klublarının prezidentləri son günlər AFFA-da baş verən hadisələrlə əlaqədar bəyanat imzalamışlar. Bəyanatda deyilir: 

Azərbaycan futbolunda dərin böhran davam edir. Peşəkar futbol klublarının, mütəxəssislərin, futbol veteranlarının səylərinə baxmayaraq, AFFA rəhbərliyi növbəti hesabat-seçki konfransının keçirilməsi, ölkə çempionatının başlanması qayğısına qalmır. Atdıqları addımların, irəli sürdükləri təkliflərin bir nəticə vermədiyini görən futbol klubları, regional və sahə futbol federasiyaları ölkə Konstitusiyasında təsbit olunmuş hüquqları pozulduğuna görə, AFFA-nın ləğv olunması tələbi ilə məhkəmə qarşısında iddia qaldırmışlar. AFFA-dakı qanun pozuntuları ilə bağlı müxtəlif dövlət orqanlarına da müraciət olunmuşdur. Vergilər Nazirliyi bu günlərdə AFFA-da apardığı ilkin yoxlamalar nəticəsində külli miqdarda vergidənyayınma halları aşkara çıxarmış, bununla əlaqədar cinayət işi qaldırılmışdır. Biz uzun illər ərzində qanunlarımızı pozanların, nəhayət, ciddi cəzalanacaqlarına əminik.

Təəssüf ki, AFFA-da aparılmış yoxlamalar bir sıra siyasi partiyaların, qeyri-hökumət təşkilatlarının kəskin reaksiyasına səbəb olmuşdur. Onlar ciddi qanun pozuntularının, vergidənyayınma hallarının aşkara çıxarılmasını dövlət orqanlarının AFFA-nın işinə müdaxiləsi kimi qiymətləndirmişlər. Əslində, burada təəccüblü heç nə yoxdur. Fuad Musayev dəfələrlə özünə yaxın bildiyi müxalifət partiyalarının rəhbərləri ilə görüşlər keçirmiş, onlara müxtəlif vədlər verərək dəstək istəmişdir. İndi, budur, çətin vəziyyətə düşən Fuad Musayev imdad diləyir, onun ölkə futbolunun vəziyyəti ilə maraqlanmayan, yalnız siyasi məqsəd güdən “dostları” isə bəyanatlar verirlər. Biz bu bəyanatları qətiyyətlə pisləyir və bildiririk ki, qanun qarşısında bütün vətəndaşların məsuliyyəti eynidir. Hər kəs öz əməlinə görə cavab verməlidir. O ki qaldı dövlətin AFFA-nın işinə müdaxiləsi ilə bağlı iddialara, bizə belə gəlir ki, əksinə, futbol məsələlərinə qarışan bəzi siyasi partiyalar, qeyri-hökumət təşkilatlarıdır. Onların bu mövqeyi yüzlərlə futbolçunun, onlarca futbol klubunun, regional futbol federasiyalarının mənafeyinə ziddir. Biz bu cəhdləri bəzi siyasi partiyaların, qeyri-hökumət təşkilatlarının AFFA-futbol klubları münasibətlərinə qarışması, futbol ictimaiyyətinə təzyiqi kimi qiymətləndiririk.

Peşəkar futbol klubları bildirirlər ki, məqsədli siyasi bəyanatlara baxmayaraq, öz mövqelərindən çəkilməyəcək, Azərbaycan futbolunun gələcəyi naminə fəaliyyətlərini davam etdirəcək, ölkədə sağlam futbol mühitinin yaradılması üçün bütün qanuni vasitələrdən istifadə edəcəklər.