BAKI ŞƏHƏR BAŞ POLİS İDARƏSİNDƏ 9 AYIN YEKUNLARINA DAİR ƏMƏLİYYAT MÜŞAVİRƏSİ KEÇİRİLMİŞDİR
BŞBPİ rəisinin müavini, polkovnik Şahmar Paşayev həmin müddəti əhatə edən məruzəsində bildirmişdir ki, ölkədə ictimai-siyasi sabitliyin hökm sürməsi, xalq və dövlət arasında vəhdətin yaradılması, Bakı-Tbilisi-Ceyhan əsas neft ixrac boru kəməri vasitəsilə Azərbaycan neftinin Avropaya nəql edilməsi prosesləri ölkəmizin Avrasiya regionunda güclü dövlət, Prezident İlham Əliyevin isə lider-dövlət başçısı kimi təsdiqlənməsinin bariz nümunəsidir. Öz fəaliyyətində ümummilli liderimiz Heydər Əliyevin tövsiyələrini, dövlətimizin başçısı İlham Əliyevin siyasi xəttini rəhbər tutan Bakı polisi paytaxtda ictimai asayişin qorunması, vətəndaşların təhlükəsizliyinin təmin olunması sahəsində səyini əsirgəmir.
Natiq məlumat vermişdir ki, yanvar-sentyabr aylarında Bakı şəhərində 6099, o cümlədən 680 ağır və xüsusilə ağır növ cinayətlər qeydə alınmışdır. Bu, ötən ilin eyni dövrü ilə müqayisədə cinayətlərin 18,1 və 24,3 faiz artımı deməkdir. Cinayətlərin artımı əsasən döymə, qəsdən sağlamlığa yüngül zərər vurma, dələduzluq, nəqliyyat vasitələrinin istismarı qaydalarının pozulması kimi əməliyyat şəraitinə ciddi təsir göstərməyən hadisələrin hesabına olmuşdur.
Şahmar Paşayev bildirmişdir ki, qəsdən adamöldürmə cinayətlərinin sayı 54-dən 49-dək, öldürməyə cəhdlərin sayının 25-dən 24-dək azalması, quldurluqların cəmi 4 fakt artması ümumən qabaqlayıcı profilaktik tədbirlərin düzgün təşkilinə dəlalət edir.
Polkovnik vurğulamışdır ki, hesabat dövründə baş idarənin və yerli polis orqanlarının rəhbərliyi xidmətdə fərqlənən əməkdaşları mükafatlandırmaqla yanaşı, tapşırılmış vəzifənin öhdəsindən gəlməyən, qanun pozuntularına, intizamsızlığa yol verən əməkdaşlar barəsində müvafiq intizam tədbirləri görmüşdür. Belə ki, orta rəis heyəti əməkdaşlarından 10 nəfər, sıravi və kiçik rəis heyəti əməkdaşlarından 43 nəfər daxili işlər orqanlarından xaric edilmiş, 41 əməkdaş nazirliyin və baş idarənin rəhbərliyinin əmrləri ilə tutduqları vəzifələrdən azad olunmuşlar.
BŞBPİ-nin ayrı-ayrı idarə və şöbələrinin, rayon polis idarələrinin rəisləri qazanılan uğurlardan, yol verilmiş nöqsanlardan və qarşıda duran vəzifələrdən danışmışlar.
Bakı Şəhər Baş Polis İdarəsinin rəisi, general-leytenant Məhərrəm Əliyev çıxışında bildirmişdir ki, paytaxtda ictimai-siyasi sabitliyin qorunmasına, əməliyyat-axtarış, istintaq, profilaktik tədbirlərin səmərəliliyinin artırılmasına nail olunmuşdur. Bununla belə, nöqsanlara yol vermiş hər bir əməkdaş bundan sonra da cəzalandırılacaq, məsuliyyət gücləndiriləcəkdir.
Ümummilli liderimiz Heydər Əliyevin yaratdığı sabitliyin davam etməsinin vacibliyini vurğulayan natiq əmin olduğunu bildirmişdir ki, asayiş keşikçiləri həmişə olduğu kimi, bundan sonra da dövlətimizin başçısı tərəfindən qarşıya qoyulan vəzifələrin öhdəsindən layiqincə gələcəklər.
Bölmənin digər xəbərləri
