BAKI-TBİLİSİ-CEYHAN LAYİHƏSİNİN HƏYATA KEÇİRİLMƏSİNƏ HEÇ KİM MANE OLA BİLMƏYƏCƏK
Bu bəyanatı Kvemo Kartli - Borçalı bölgəsinin qubernatoru Levan Mamaladze Bakı-Tbilisi-Ceyhan (BTC) əsas ixrac boru kəməri layihəsinə dair Rustavidə keçirilmiş müşavirədə vermişdir.
Müşavirədə Borçalıda ərazisindən boru kəməri keçəcək rayonların rəhbərləri, bölgənin azərbaycanlı və gürcü ziyalıları, mütəxəssislər, Gürcüstan parlamentinin bir qrup deputatı iştirak edirdilər.
Qubernator Bakı-Tbilisi-Ceyhan boru kəmərinin Gürcüstan üçün də çox böyük əhəmiyyət daşıdığını, onun hər il dövlət büdcəsinə 62 milyon dollar gəlir verəcəyini xüsusi vurğuladı. O dedi ki, kəmərin nəzərdə tutulan müddətdə çəkilib istifadəyə veriləcəyinə heç kim şəkk-şübhə etməsin, çünki bu işin başında Heydər Əliyev və Eduard Şevardnadze kimi dünya şöhrətli siyasətçilər dururlar.
Neft kəmərinin Borjomi dərəsinin ekologiyasına guya böyük zərər vuracağı barədə Gürcüstanda bəzi qüvvələrin qaldırdığı hay-küyə gəldikdə, cənab Mamaladze bunu bədxahların uydurması adlandırdı və Bakı-Tbilisi-Ceyhan boru kəməri layihəsinə dair qərarda ətraf mühitin mühafizəsi üçün çox ciddi tədbirlər nəzərdə tutulduğunu, habelə xəttin keçəcəyi torpaqdan istifadə üçün haqqı onların sahiblərinə səhmdarların bilavasitə ödəyəcəyini, bundan əlavə, 48 kənddə sosial-mədəni tədbirlər görəcəyini xatırlatdı.
Gürcüstan parlamentinin deputatlarından Ramiz Bəkirov, Vaja Leluaşvili, Məmməd Məmmədov, Prezidentin İcra Aparatının ərazi idarəetmə və regional siyasət məsələləri şöbəsi müdirinin müavini İmir Məmmədli, qubernatorun müavini Əli Yüzbaşov, Gürcüstan Azərbaycanlı Ziyalılar Birliyinin sədri Novruz Bayramov və “Gürcüstan” qəzetinin baş redaktoru Süleyman Süleymanov çıxış edərək Bakı-Tbilisi-Ceyhan boru kəməri məsələsinə Gürcüstanın dövlətçiliyi mövqeyindən yanaşmağın, onun gerçəkləşməsinə əngəl törətməyə, bölgədə sabitliyi pozmağa can atan qüvvələri cəsarətlə ifşa etməyin, qayda-qanunu möhkəmlətməyin, Borçalının neft kəməri keçən kəndlərində sakinlərlə görüşüb layihənin əhəmiyyətini açıqlamağın zəruriliyini diqqətə çatdırdılar.
Müşavirədə Bakı-Tbilisi-Ceyhan marşrutu ilə bağlı problemlərin və təkliflərin vaxtında nəzərə alınıb qərar çıxarılması üçün Kvemo Kartli - Borçalı qubernatoru yanında bölgə ictimiyyətinin nümayəndələrindən ibarət daimi fəaliyyət göstərən məsləhət şurası yaradılması qərara alındı.
Şahismayıl Məmmədov
AZƏRTAC-ın xüsusi müxbiri
Rustavi
Bölmənin digər xəbərləri
