Azərbaycan Respublikasının Prezidenti, Silahlı Qüvvələrin Ali baş komandanı İlham Əliyev mərasimdə iştirak etmək üçün əraziyə gəldi. Burada dövlətimizin başçısının şərəfinə fəxri qarovul dəstəsi düzülmüşdü.

Müdafiə naziri general-polkovnik Səfər Əbiyev Azərbaycan Prezidenti İlham Əliyevə raport verdi: “Cənab Ali Baş komandan, şəxsi heyət Dövlət bayrağı meydanının təməlqoyma mərasiminə hazırdır”.

Prezident İlham Əliyev mərasimə toplaşan dövlət və hökumət nümayəndələri ilə görüşdü, meydanın layihəsi ilə tanış oldu, meydanın və bayrağın görünüşünü əks etdirən fotoşəkillərə baxdı. Burada dövlətimizin başçısı tərəfindən bu il noyabrın 17-də imzalanmış “Azərbaycan Respublikasının paytaxtı Bakı şəhərində Dövlət bayrağı meydanının yaradılması haqqında” Sərəncamın mətni də vurulmuşdu.

Müdafiə naziri meydan üçün seçilmiş yerin Dövlət bayrağının paytaxtın müxtəlif nöqtələrindən görünməsinə imkan yaradacağını vurğuladı.

Bildirildi ki, Amerika Birləşmiş Ştatlarının “Trident Support” şirkəti tərəfindən hazırlanmış layihənin icrasını Azərbaycanın “Azenko” şirkəti yerinə yetirəcəkdir. Bütün işlər 2008-ci il mayın 24-də başa çatdırılacaq, mayın 28-i - Respublika günündə isə rəsmi açılış mərasimi keçiriləcəkdir. 20 min kvadratmetr ərazisi olacaq meydanda bütün infrastruktur yaradılacaqdır.

“Trident Support” şirkətinin təsisçisi və idarəedici direktoru Deyvid Çambers dövlətimizin başçısını salamladı və məlumat verərək dedi:

-Cənab Prezident, dəstəyinizə görə minnətdaram. Bu cür milli layihədə iştirak etmək imkanını yaratdığınıza görə Sizə təşəkkürümü bildirirəm. Şirkətimiz bir sıra ölkələrdə nəhəng Dövlət bayrağı meydanlarını tikmişdir. Sizə deməliyəm ki, ölkənizdə bu təşəbbüsə xüsusi həvəslə və milli qürur hissi ilə yanaşırlar. Budəfəki mərasim digər ölkələrdəki mərasimlərdən xeyli fərqlənir.

Şirkətimiz Fars körfəzi regionunda üç nəhəng Dövlət bayrağı meydanı tikmişdir. Abu-Dabidə 123 metrlik, Əmmanda 127 metrlik, Aqabada isə 131 metrlik bayraq dayağı quraşdırmışıq. Burada isə dayağın hündürlüyü 150 metr olacaqdır və bu, bizim üçün, sözün əsl mənasında, böyük bir sınaqdır. Ölkəniz üçün bu işi görməkdən çox məmnunuq.

İcazənizlə, Dövlət bayrağı meydanının texniki parametrləri haqqında bir neçə kəlmə deyim. Dayağın bünövrəsinin diametri 3,2 metr olacaqdır. Müqayisə üçün bildirmək istəyirəm ki, biz Aqabada diametri yalnız 2,8 metr olan bünövrədən istifadə etmişik. Bünövrənin üst hissəsinin diametri 1,09 metrdir. Dayağın alt hissəsindəki qalınlıq 40 millimetrdir. Onun bir nümunəsini Sizə göstərirəm.

İLHAM ƏLİYEV: Bu, aşağı hissədə belə olacaq?

DEYVİD ÇAMBERS: Bəli, aşağı hissədə. Dayağın yuxarı hissəsinə qədər biz 13 seksiyadan istifadə etmişik. Yəni, hündürlüyə qalxdıqca, enlik azalır və beləliklə, ən zirvədə qalınlıq 10 millimetr təşkil edir. Bu, küləyin təsirini azaltmaq məqsədi ilə hesablanmışdır. Qurğunun ümumi çəkisi 220 tondur. Dayaq küləyin sürəti saatda 209 kilometr olduqda da, davam gətirəcəkdir.

İLHAM ƏLİYEV: Hava şəraitindən, küləkdən yəqin ki, xəbəriniz var. Xüsusən də, bu ərazidə. Buradan 2 kilometr məsafədə, digər istiqamətdə külək yoxdur. Amma burada, var.

DEYVİD ÇAMBERS: Bəli, məlumatım var. Mən burada çox küləkli hava şəraitində olmuşam. Biz bunu nəzərə almışıq. Zirvədə küləyin maksimum sürəti saatda 200 kilometr olanda, 150 metrlik dayaq 4,2 metr əyiləcəkdir.

İLHAM ƏLİYEV: Lakin, bu, görünməcəyəkdir.

DEYVİD ÇAMBERS: Xeyr, görünməyəcəkdir. Normal havada dayaq üst hissədə təqribən 2-3 düym əyilir. Mən bunu bilirəm, çünki həmin hündürlükdə olmuşam. İşlərimizi başa çatdırdıqdan sonra, Sizinlə məmnuniyyətlə açılışda iştirak edəcəyik.

Bayrağın özünə gəldikdə, bildiyiniz kimi, o 35x70 metrdir. Yəni, onun sahəsi 2450 kvadratmetr təşkil edir.

DEYVİD ÇAMBERS: Bəli, çəkisi isə təqribən 350 kiloqramdır.

İLHAM ƏLİYEV: Bayrağın çəkisi 350 kiloqramdır?!

DEYVİD ÇAMBERS: Bəli, təkcə bayraq 350 kiloqramdır. Biz onun materialı üçün çox davamlı xüsusi poliest materialından istifadə edirik. O, yumşaqdır, lakin çox davamlıdır.

İLHAM ƏLİYEV: Biz binalarda dalğalanan bayraqları tez-tez dəyişməli oluruq. Bu cür bayrağın orta istifadə müddəti nə qədərdir?

DEYVİD ÇAMBERS: Üç və ya dörd həftə, təqribən bir ay. Bu, uzun müddətdir.

İLHAM ƏLİYEV: Bir ay.

DEYVİD ÇAMBERS: Bəli. Bəzi hallarda bayraqlar iki və ya üç gün istifadə olunma müddəti ilə hazırlanır. Lakin böyük bayraqlara gəldikdə, onlar davamlı olur. Biz uzun illər ərzində dayaqların dizaynı üzərində işləmişik və bayrağın möhkəm olmasına tam əminik.

İLHAM ƏLİYEV: Çox sağ olun.

DEYVİD ÇAMBERS: Cənab Prezident, Siz sağ olun, buraya gəldiyinizə görə minnətdaram.

-Azərbaycanda Dövlət bayrağı meydanı yaradılır. Mən bu barədə keçən ay Sərəncam imzaladım. Əlbəttə ki, biz o vaxta qədər müxtəlif yerlərə baxmışdıq və məhz bu yeri seçdik. Çox gözəl yerdir, bir az təpədə yerləşir və buradan şəhərə çox gözəl mənzərə açılır. Eyni zamanda, şəhərin əksər yerlərindən bu yer görünür. Xüsusilə nəzərə alsaq ki, bayrağın dayağının hündürlüyü 150 metr olacaq, Azərbaycanın bu dövlət rəmzi Bakı şəhərində dalğalanacaqdır. Bu, bizim müstəqilliyimizdir, bizim azadlığımızdır.

Bakıda, başqa şəhər və rayonlarda bizim dövlət bayraqları müxtəlif yerlərdə ucaldılır. Mən bu göstərişi vermişəm. Ancaq bu bayraq, əlbəttə, bütün başqa bayraqlardan son dərəcə fərqlənir. Həm ona görə ki, bu, çox böyük bayraqdır. Bunun ölçüləri 70x35 metrdir. Çəkisi də çox ağırdır, 350 kiloqram ancaq bayrağın çəkisi olacaqdır. Həm də ona görə fərqlənir ki, bu bayraq Dövlət bayrağı meydanında ucaldılacaqdır. Əlbəttə, bu ərazi abadlaşdırılacaqdır. Artıq burada “Azərenerji” böyük işlər görübdür, texnika gətiribdir. Çox mürəkkəb bir iş olacaqdır. Belə böyük bayrağı texniki baxımdan qurmaq çox böyük peşəkarlıq tələb edir. Bu, bizdə var, texnika var, peşəkarlıq var. Əminəm ki, bizim bayrağımız, milli rəmzimiz bizi Azərbaycanın xoşbəxt gələcəyinə aparacaqdır. Bayrağımız həmişə uca olacaqdır.

İLHAM ƏLİYEV: Çox yaxşı. Mən Azərbaycanda Dövlət bayrağı meydanının yaradılması haqqında Sərəncamı bu il noyabrın 17-də imzaladım. Bu da təsadüfi deyildir. Çünki məhz 1990-cı il noyabrın 17-də ilk dəfə olaraq Azərbaycanda, Naxçıvanda, Naxçıvan Ali Məclisinin ulu öndər Heydər Əliyevin rəhbərliyi ilə keçirilən sessiyasında Azərbaycan Xalq Cümhuriyyətinin bayrağı Naxçıvanın dövlət bayrağı kimi qaldırılmışdı. Bildiyiniz kimi, bizim bayrağımız 1918-ci ildə ucaldılmışdır. Azərbaycan Xalq Cümhuriyyəti, müstəqil Azərbaycan dövləti yarananda bu bayraq Azərbaycanın Dövlət bayrağı elan edilmişdi. Ancaq 1920-ci ildə Xalq Cümhuriyyəti süqut edəndə, əlbəttə, bayraq da dəyişdirildi. 1990-cı ildə, - onda hələ Azərbaycan müstəqil deyildi, - ulu öndərimiz bu bayrağı Azərbaycanın və Naxçıvanın rəsmi bayrağı kimi elan etdi. Bir neçə aydan sonra isə, 1991-ci ilin fevral ayında bu bayraq Azərbaycanın Dövlət bayrağı kimi elan edildi. Yəni bu, tarixdir. Bu, bir daha onu göstərir ki, ulu öndərimiz Azərbaycanın müstəqilliyi üçün çox böyük işlər görmüşdür. Hələ o zaman ki, Azərbaycan müstəqil dövlət deyildi, bu bayraq Azərbaycanın, bizim müstəqilliyimizin simvolu oldu.

Azərbaycan xalqı əsrlər boyu müstəqillikdən məhrum olmuşdur. Bizim öz dövlətimiz yox idi və azərbaycanlılar başqa ölkələrin tərkibində yaşayırdılar. Müstəqillik ən böyük sərvətdir, ən böyük xoşbəxtlikdir. Biz öz taleyimizi özümüz həll edirik. Bizim müstəqil Azərbaycan dövlətimiz var və bu dövlət günü-gündən möhkəmlənir. Hər bir dövlətin rəsmi simvolları var. Ancaq bu simvollarla yanaşı, müstəqil siyasət aparmaq heç də hər bir dövlətin işi deyildir. Bizi bir sıra ölkələrdən, o cümlədən bizim bölgədə yerləşən bəzi ölkələrdən fərqləndirən odur ki, biz müstəqil siyasət aparırıq. Azərbaycan, sözün əsl mənasında, müstəqil dövlətdir və bu müstəqillik bizim üçün ən böyük sərvətdir, ən böyük xoşbəxtlikdir. Bizim müstəqilliyimizi əks etdirən, onun rəsmi rəmzi olan bayrağımız dalğalanmalıdır. Bu gözəl bayraq Bakının bütün yerlərindən görünəcəkdir.

Sonra təməlqoyma mərasimi başlandı. Fəxri qarovul dəstəsinin rəisi Azərbaycan Prezidentinə raport verdi: “Möhtərəm Azərbaycan Respublikasının Prezidenti, Silahlı Qüvvələrin Ali baş komandanı! Fəxri qarovul Sizin hərbi hissəyə gəlməyiniz münasibətilə düzülmüşdür”.

Prezident İlham Əliyev fəxri qarovulun əsgərlərini salamladı.

Dövlətimizin başçısı gilizi təmələ qoydu və beton qarışığı tökdü. Bu işi dövlət və hökumət nümayəndələri də icra etdilər.

Prezident İlham Əliyev gələcəkdə ilin bütün aylarında turistlərin və paytaxta gələn qonaqların buranı görməsi, tədbirlərin keçirilməsi baxımından da əhəmiyyət daşıdığını söylədi.

Dövlətimizin başçısı meydanın yerləşəcəyi ərazinin ətrafında abadlıq işlərinin də ən yüksək səviyyədə aparılması ilə bağlı tapşırıq və tövsiyələrini verdi, mərasim iştirakçılarını qarşıdan gələn bayramlar münasibətilə təbrik etdi.