Bakıda İtaliya turizminə həsr edilmiş ilk vorkşop keçirilib
Bakı, 20 fevral, AZƏRTAC
Fevralın 19-da Bakıda turizm üzrə vorkşop keçirilib. İtaliyanın “Amanda Tour” şirkəti tərəfindən təşkil olunmuş və bütünlüklə İtaliyaya həsr edilmiş bu tədbirdə İtaliyanın 50-dən çox təmsilçisi və Azərbaycanın 90-dan çox turizm şirkətinin menecerləri iştirak edirdi. İtaliyalı qonaqların əksəriyyəti həqiqətən çoxillik tarixə malik olan dəbdəbəli otelləri və unikal müəssisələri birləşdirən mehmanxana şəbəkələrini, həmçinin “Bulgari”, “Armani”, “Ferragamo” və başqa məşhur yüksək moda brendlərinə aid otelləri təmsil edirdi.
“Amanda Tour” şirkətinin Roma ofisinin direktoru Kladuio Kadeddu deyib: “Azərbaycan bazarı bizi çox maraqlandırır. Dörd ildir ki, bu bazarla sıx əməkdaşlıq edirik. Turizm fəaliyyətinin səmərəli olması üçün bu və ya digər ölkənin özünəməxsus cəhətlərini nəzərə almaq lazımdır. Azərbaycan turistlərinin üstünlük verdiyi müəyyən məqamlar var - onlar mehmanxana nömrələrinin gen-bol olmasını, “isveç süfrəsi” prinsipi üzrə səhər yeməyini, xidmətlərdə diqqətcilliyi xoşlayırlar. Bundan əlavə, Azərbaycan turistləri İtaliyanın Roma, Venesiya, Florensiya kimi klassik şəhərlərini yetərincə yaxşı tanıdıqları halda, İtaliyanın dəniz və termal kurortları barədə bilgiləri azdıq. Məhz bu boşluğu doldurmaq və iki ölkənin turizm bazarlarının yaxınlaşmasına kömək məqsədilə biz bu tədbirin təşkil etməyi özümüzə borc bildik. Əsas məqsəd Azərbaycanın və İtaliyanın turizm biznesinin aparıcı nümayəndələri arasında birbaşa əlaqə yaratmaqdır. Biz bugünkü tədbirə şirkətimizin İtaliyadakı ən yaxşı tərəfdaşlarını dəvət etmişik. Ümidvarıq ki, bu tədbirin yekunu kimi Azərbaycanda İtaliya yönümlü turizm məhsulları satışının həcmi daha da artacaq, çünki italiyalı otel sahibkarları lokal bazarın ehtiyaclarını ilk mənbədən öyrənəcək və bunu nəzərə alacaqlar”.
İtaliyadan olan bəzi iştirakçılar tədbirə hazır təkliflərlə gəlmişdi. Məsələn “Batani” otellər şəbəkəsinin satış və marketinq üzrə meneceri Loriana Massi bildirib ki, yaxın vaxtlarda otellərin birində “hər şey daxil” prinsipi üzrə yerləşmə imkanı yaranacaq. MDB ölkələrindən olan turistlərin çox xoşladığı bu prinsip İtaliya üçün hələlik ekzotik sayılır. Yeri gəlmişkən, Çezenatiko şəhərində yerləşən “Grand Hotel Da Vinci”, Rimini yaxınlığındakı “Grand Hotel Rimini” kimi məşhur otellər də bu şəbəkəyə daxildir. Dahi rejissor Federiko Fellini özünün “Şirin həyat” və “Amarkord” kimi məşhur filmləri üçün səhnələri “Grand Hotel Rimini” otelində çəkib, maestronun özünün isə həmin oteldə daimi nömrəsi vardı.
Başqa bir şirkət tərəfindən idarə edilən “Grand Hotel et de Milan” otelinin məşhur müsafirləri də az olmayıb. Milanda yerləşən və bu il 153 yaşını qeyd edən bu otel bəstəkar Cüzeppe Verdini, belə demək mümkündürsə, yaxşı xatırlayır. 20 il bu oteldə qalmış Verdi “Otello” operasını orada yazıb.
“Palazzo Parigi Grand Milano” oteli isə şəhərdə ən böyük SPA-kompleksi ilə fəxr edə bilər. Bu otel həm də ona görə məşhurdur ki, burada interyer məsələsi ilə fransalı dizayner Pyer-İv Roşon məşğul olub. Roşon bu otelin dizaynında kübar klassika ilə yüksək zövqlü manyerizmi çox uğurlu şəkildə əlaqələndirib.
Tədbirdə Romanı da çoxsaylı mehmanxanalar təmsil edirdi. Turistlərin çox xoşladığı İspan pilləkənının zirvəsində yerləşən beşulduzlu unikal “Hassler Roma” oteli dünyanın ən məşhur mehmanxanalardan biridir. 1921-ci ildən bir İsveçrə ailəsinə məxsus olan bu otel hazırda həmin sülalənin beşinci nəslinin nümayəndəsi tərəfindən idarə edilir. Otel həm də zəngin rəngkarlıq əsərlərindən və əntiq mebeldən ibarət kolleksiyası ilə seçilir.
2011-ci ilin axırlarında fəaliyyətə başlamış “Armani Hotel Milano” isə 1930-cu illərdə tikilmiş binada yerləşir. Konsepsiyası bütünlüklə Corcio Armani tərəfindən yaradılmış bu otelin interyerinin estetikası, materialların və rənglərin uzlaşdırılması şəxsən Corcio Armani təfəkkürünün məhsuludur.
Bakıda keçirilmiş tədbirdə təmsil olunmuş bütün maraqlı otellər barədə bir materialda söhbət açmaq mümkün deyil. Milanın ən məşhur otellərindən olan “Manzoni”nin baş meneceri Culio Markutçinin vurğuladığı kimi, vorkşopun bütün italiyalı iştirakçıları azərbaycanlılar ilə italyanlar arasında inanılmaz dərəcədə oxşarlıq olduğunu qeyd ediblər. O deyib: “Bu oxşarlıq xarakterlərimizdə də hiss olunur, temperamentimizdə də, tolerantlıqda da, qonaqlara səmimi münasibətdə də, ailə dəyərlərinə bağlılıqda da. Yəqin buna görədir ki, azərbaycanlılar İtaliyanı bu qədər sevirlər. Onlar orada özlərini evlərindəki kimi hiss edə bilərlər. İnanın ki, bu sevgi qarşılıqlıdır”!
Emil Eyyubov
Xüsusi olaraq AZƏRTAC üçün
Bölmənin digər xəbərləri
